كۇنى كەشە اتالعان كىتاپحانادا جازۋشىلار وداعىنىڭ مۇشەسى, قاراعاندىلىق اقىن مۇسىركەپ سەيداحمەتتىڭ «جوقشى» اتتى جىر كىتابى تانىستىرىلدى جانە اۆتوردىڭ 70 جاسىنا وراي «كاۋسارىن جىردىڭ اتقىلاپ, تاس جارىپ شىققان قاينارمىن» اتتى كەزدەسۋ ۇيىمداستىرىلدى. اقىننىڭ جىر جيناعىنا تۋعان ەل مەن جەرگە دەگەن سۇيىسپەنشىلىگى, ۇلتتىق بولمىسقا, تاريحي جادىعا دەگەن ساعىنىشى, رۋحاني ىزدەنىسى مەن پايىمى تۋرالى تولعانىستارى توپتاستىرىلعان. «جوقشى» – قازاقتىڭ جوعىن جوقتاپ, بارىن باعالاۋعا ۇندەيتىن سىرشىل تۋىندى.
اقىن-جازۋشى سەرىك ساعىنتاي تىزگىندەگەن كەزدەسۋ كەشىندە مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ كىتاپ ءىسى باسقارماسىنىڭ باسشىسى الماس مىرزاحمەت اقىنعا ءمينيستردىڭ قۇتتىقتاۋ حاتىن تابىستادى. جازۋشىلار وداعى استانا قالالىق فيليالىنىڭ توراعاسى, اقىن باۋىرجان باباجان ۇلى مەرەيتوي يەسىنە وداقتىڭ باسقارما توراعاسى مەرەكە قۇلكەنوۆتىڭ قۇتتىقتاۋ حاتىن وقىپ, يىعىنا شاپان جاپتى. اقىن مۇحاربەك جاكەي كىتاپ اۆتورىنىڭ جىر شۋماقتارىنا توقتالىپ, شۇرايلى تۇستارىنان ءۇزىندى كەلتىردى. زامانداس باۋىرى, بەلگىلى اقىن داۋرەن بەرىكقاجى ۇلى:
«جاقسى ولەڭ جازسام بولدى دەپ
جۇرەتىن اقىن كوپ جۇدەپ,
جۇرەگىن ۇستاپ تاپ-تازا
جەتپىسكە كەلدى مولدىرەپ.
قيالىنا ون تۇنەپ
قازاعىن ويلاپ توڭدى كوپ,
پەش قالاپ ءجۇرىپ اۋىلدا
قوي باققان اقىن سوڭعى رەت.
ۇستاعان قولى مول كۇرەك
ءومىردى ولەڭ كوردى تەك.
پاڭسىعان جۇرتتىڭ بارىنە
پايعامبار سىندى ەلجىرەپ», دەگەن شۋماقتارىمەن جولدادى لەبىزىن.
كەش بارىسىندا ولەڭ وقىلىپ, ءان شىرقالىپ, وقىرماندار اۆتوردان قولتاڭبا الدى.
