فوتو: قتج ءباسپاسوز قىزمەتى
ونىڭ ايتۋىنشا, 11 ايداعى كورسەتكىش كيلومەترىنە 264 ملرد بولدى. بۇل وتكەن جىلدىڭ سايكەس كەزەڭىمەن سالىستىرعاندا 7,4%-عا جوعارى. ەلدىڭ جۇيە قۇراۋشى كاسىپورىندارىنان ەكسپورتتىق جۇكتەردى تاسىمالداۋ 80 ملن توننانى (+6,5%) قۇرادى. بۇل رەتتە ەڭ بەلسەندى ديناميكا شىعىس باعىتتا بايقالادى. ساۋدا-ساتتىققا ۇزىندىعى 836 شاقىرىم بولاتىن دوستىق – مويىنتى ۋچاسكەسىندە جۇمىسشى قوزعالىسى اشىلعان ەكىنشى جولداردىڭ قۇرىلىسى اياقتالدى.
«بۇدان بولەك, جىلدىڭ 11 ايىندا ترانزيت تاسىمالى دا جىل سايىن ارتىپ وتىر. دوستىق – مويىنتى ۋچاسكەسىندەگى ەكىنشى جولداردىڭ اشىلۋى سەرپىن بەرىپ, قىتايعا باعىتتالاتىن وتاندىق ەكسپورت 11% ءوستى», دەپ اتاپ ءوتتى تالعات الدىبەرگەنوۆ.
سونىمەن قاتار مەملەكەت باسشىسىنىڭ ينفراقۇرىلىمدى جاڭارتۋ جونىندەگى تاپسىرماسىن ورىنداۋ شەڭبەرىندە وسى جىلى بۇكىل ەل بويىنشا تەمىر جولداردىڭ ەلەۋلى ۋچاسكەلەرى كۇردەلى جوندەۋمەن قامتىلدى. پرەزيدەنت قوزعالىس قاۋىپسىزدىگىن قامتاماسىز ەتۋ جانە پويىزداردىڭ جىلدامدىعىن ارتتىرۋ ءۇشىن 11 مىڭ شاقىرىم تەمىر جولعا جوندەۋ جۇمىستارىن جۇرگىزۋ مىندەتىن قويدى.
ۇلتتىق كومپانيا باسشىسى بايانداعانداي, جۇمىستار كەستە بويىنشا جۇرگىزىلىپ كەلەدى. بۇگىنگى تاڭدا 4 375 شاقىرىم جول جوندەلدى. قولدانىستاعى جەلىلەردى جوندەۋمەن قاتار جاڭا جەلىلەردىڭ بەلسەندى قۇرىلىسى جانە جالپى ۇزىندىعى شامامەن 3 مىڭ شاقىرىم ۋچاسكەلەردە زاماناۋي اۆتوبلوكتاۋ جۇيەلەرىن ەنگىزۋ جۇرگىزىلۋدە.
«مەملەكەت باسشىسىنىڭ 11 مىڭ شاقىرىم تەمىر جولدى جوندەۋ جونىندەگى تاپسىرمالارىن ورىنداۋ اياسىندا بۇگىنگى كۇنى 4 375 شاقىرىم جوندەۋ جۇمىستارى جالعاسىپ جاتىر. سونداي-اق 7 ۋچاسكەدە اۆتوبلوكتاۋدى جاڭعىرتۋ جانە ەنگىزۋ بويىنشا جۇمىستار جۇرگىزىلۋدە. جۇمىستاردى اياقتاۋ كەلەسى جىلعا جوسپارلاندى», دەپ اتاپ ءوتتى «قتج» باسقارما توراعاسى.ايتا كەتەيىك, بۇعان دەيىن قازاقستان 42 ەلمەن اۆتوكولىك ارقىلى جۇك تاسىمالىن جۇزەگە اسىراتىنىن حابارلاعان ەدىك.
