وتىرىس بارىسىندا ۇقشۇ پا كەڭەسىنىڭ قاتىسۋشىلارى اسسامبلەيانىڭ وسى جىلعى قىزمەتىن قورىتىندىلادى. پارلامەنتشىلەر ۇيىمعا مۇشە مەملەكەتتەردىڭ زاڭنامالارىن ۇيلەستىرۋ جانە دامىتۋ بويىنشا بەلسەندى جۇمىس اتقاردى. ءارتۇرلى باعىتتا قاۋىپسىزدىكتى نىعايتۋعا ارنالعان جاڭا مودەلدىك زاڭدار مەن ۇسىنىمداردى قابىلداۋ جونىندە جوسپارلى جۇمىس جۇرگىزىلدى. ولاردىڭ قاتارىندا ەسىرتكى بيزنەسىمەن, كيبەرقىلمىسپەن, ترانسۇلتتىق تەرروريزممەن, ادام ساۋداسىمەن, قارۋدى زاڭسىز تاراتۋمەن جانە باسقا دا قىلمىس تۇرلەرىمەن كۇرەس ماسەلەلەرى بار.
ءوز سوزىندە ەرلان قوشانوۆ ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەياسى جاھاندىق جانە وڭىرلىك سىن-قاتەرلەرگە جەدەل ءارى ءتيىمدى تۇردە جاۋاپ بەرىپ, ۇيىمعا مۇشە بارلىق ەلدىڭ مۇددەلەرىن ەسكەرىپ, شەشىمدەر قابىلدانۋىن قامتاماسىز ەتىپ وتىرعانىن ەرەكشە اتاپ ءوتتى. سونداي-اق دەپۋتاتتار ورتاق تاريحتى ساقتاۋ باعىتىندا بەلسەندى ءارى جۇيەلى جۇمىس جۇرگىزۋدە. وسى تۇرعىدا 2025 جىلى ۇقشۇ ەلدەرىندەگى باستى وقيعا – ۇلى جەڭىستىڭ 80 جىلدىعىن اتاپ ءوتۋ بولدى.
بۇدان بولەك, ءماجىلىس سپيكەرى گەوساياسي تۇراقسىزدىققا قاراماستان, بيىل حالىقارالىق دەڭگەيدە قابىلدانعان بىرقاتار ماڭىزدى شەشىمگە نازار اۋداردى. ولار – ازەربايجان مەن ارمەنيا اراسىنداعى قاقتىعىستىڭ رەتتەلۋى, گازا سەكتورىندا بىتىمگە كەلۋ تۋرالى كەلىسىمگە قول قويىلۋى, قىرعىزستاننىڭ يادرولىق قارۋعا تىيىم سالۋ تۋرالى شارتقا قوسىلۋى, سونداي-اق اۋعانستان مەن پاكىستان شەكاراسىندا اتىستى توقتاتۋ جونىندە كەلىسىمگە قول جەتكىزىلۋى.
ەرلان قوشانوۆ قازاقستاننىڭ اۋعان حالقىنا قولداۋ كورسەتۋگە باعىتتالعان كۇش-جىگەرى تۋرالى دا ايتتى. بيىل قازاقستان اۋعانستانعا 2 500 توننادان اسا گۋمانيتارلىق جۇك جونەلتتى, ونىڭ ىشىندە ازىق-ت ۇلىك, كۇندەلىكتى قاجەت زاتتار جانە ءدارى-دارمەك بار. ول ۇقشۇ ەلدەرىنىڭ پارلامەنتشىلەرىن الماتىدا ورنالاسقان بۇۇ-نىڭ ورتالىق ازيا مەن اۋعانستانعا ارنالعان وڭىرلىك ورتالىعىنىڭ الەۋەتىن حالىقارالىق كومەكتى ۇيلەستىرۋ ماقساتىمەن بەلسەندى پايدالانۋعا شاقىردى.
كەزدەسۋ بارىسىندا قاتىسۋشىلار بىرقاتار مودەلدىك زاڭ مەن ۇسىنىمداردى, سونىڭ ىشىندە قازاقستان تاراپى دايىنداعان «تەرروريزمگە قارسى ءىس-قيمىل تۋرالى» زاڭدى قابىلدادى. ول تەرروريزمگە قارسى ءىس-ارەكەت سالاسىنداعى مەملەكەتتىك ورگانداردىڭ ءوزارا بايلانىسىن, ىقتيمال تەرروريستىك شابۋىل نىساندارىن قورعاۋ شارالارىن, تەرروريزمگە قارسى وپەراتسيالاردى جۇرگىزۋ شارتتارىن جانە باسقا دا ماسەلەلەردى رەتتەيدى.
سونداي-اق ۇيىمعا مۇشە مەملەكەتتەردىڭ ازاماتتىق قورعانىس, اقپاراتتىق قاۋىپسىزدىك جانە باسقا دا سالالارداعى زاڭناماسىن جەتىلدىرۋگە قاتىستى ۇسىنىستار قارالدى.
كەزدەسۋ قورىتىندىسى بويىنشا پارلامەنتشىلەر دامۋشى كوپپوليارلى الەمدە حالىقارالىق قاۋىپسىزدىكتى قامتاماسىز ەتۋ تۋرالى مالىمدەمە قابىلدادى.
ماسكەۋدە وتكەن ۇقشۇ پا ءىس-شارالارى اياسىندا پارلامەنتتىك دەلەگاتسيالاردىڭ باسشىلارىن رەسەي پرەزيدەنتى ۆلاديمير پۋتين قابىلدادى.
2026 جىلدىڭ 1 قاڭتارىنان باستاپ ۇقشۇ توراعالىعى رەسەي فەدەراتسياسىنا وتەدى.
