اقش-تا ەگىزدەردىڭ ەكى ءتۇرلى اكەدەن پايدا بولعانى انىقتالدى

استانا. 9 مامىر. قۇراما شتاتتاردا مۇسىلمان سۋدياعا ەرەكشە ءىستى قاراۋدىڭ ورايى كەلدى – ەگىز بالاسىنا اكەسىنەن اليمەنت الۋعا نيەتتەنگەن ايەلدىڭ پەرزەنتتەرىن دنك تەستى بويىنشا تەكسەرە كەلگەندە, ولاردىڭ ەكەۋىنىڭ ەكى ءتۇرلى ەركەكتەن پايدا بولعانى انىقتالدى. بۇل تۋرالى The Daily Mail حابارلادى. ەگىز بالالاردىڭ ءارتۇرلى اكەدەن پايدا بولۋى سياقتى سيرەك كەزدەسەتىن قۇبىلىس گەتەرپاتەرەنالدى سۋپەرفكۋنداتسيا دەپ اتالادى. باسىلىمنىڭ مالىمەتى بويىنشا, 1997 جىلى جۇرگىزىلگەن اليمەنت الۋ جونىندەگى تالاپ-ارىزدىڭ ءاربىر 13 مىڭىنشىسىندا وسىنداي دەرەك تىركەلگەن. فيزيولوگيالىق تۇرعىدان كەلگەندە, ەگىزدەردىڭ تابيعي جاعدايدا ءارتۇرلى اكەدەن پايدا بولۋى تەك ايەل ەكى ەركەكپەن وتە قىسقا مەرزىم ارالىعىندا (بىرنەشە كۇنگە دەيىن) جىنىستىق قاتىناسقا بارىپ, ەكى جۇمىرتقا كلەتكاسىنىڭ ۇرىق بەرۋشى بولىپ شىققان جاعدايىندا عانا مۇمكىن بولىپ تابىلادى. اتاپ ءوتۋ كەرەك, جانۋارلار اراسىندا مۇنداي قۇبىلىس ادامدارعا قاراعاندا جيىرەك كەزدەسەدى ەكەن. وسى وزگەشە ءىستى قاراعان نيۋ-دجەرسي شتاتى پاسسايك وكرۋگىنىڭ سۋدياسى سۋحايل مۋحاممادقا ارحيۆتەن ءبىراز جىلعى سوت تاجىريجەسىن اقتارىپ قاراپ شىعۋعا تۋرا كەلدى. وسىنىڭ ناتيجەسىندە ول ءارتۇرلى اكەدەن رايدا بولعان ەگىزدەردىڭ 2 دەرەگىنە كەزىكتى. بۇل جولى سول قۇبىلىستىڭ ورىن العانىنا كوزى جەتكەن سۋديا ءىستى قاراۋ قورىتىندىسىندا جاۋاپ بەرۋشىنىڭ ءوزى بيولوگيالىق اكەسى بولىپ تابىلاتىن بالاعا عانا اليمەنت تولەيتىنى تۋرالى شەشىم شىعارىپ بەردى. سۋديا سۋحايل مۋحامماد – تەگى ءۇندى مۇسىلمان. ول اۋەلى ينجەنەر ماماندىعىن الىپ شىعادى, سوسىن زاڭگەر بولۋعا بەت بۇرادى. ال ادۆوكات بولىپ جۇرگەن كەزىندە, 2011 جىلى 11 قىركۇيەكتە بولعان اتاقتى لاڭكەستىك وقيعاسىنا بايلانىستى نەگىزسىز ۇستالعان ونداعان مۇسىلماننىڭ مۇددەسىن قورعاعان. قۇرىش نۇرىمبەت. دەرەك, سۋرەت: The Daily Mail.