سۋرەت: elordainfo.kz
وقۋ-اعارتۋ مينيسترلىگىنىڭ ۇيىمداستىرۋىمەن وتكەن ءىس-شارادا ەلىمىزدىڭ بارلىق وڭىرىنەن 825 قاتىسۋشى جانە 719 ەكسپەرت باق سىنادى. وندىرىستىك, ينجەنەرلىك, اقپاراتتىق تەحنولوگيالار, سەرۆيس, قۇرىلىس, الەۋمەتتىك قىزمەتتەر جانە كرەاتيۆتى يندۋستريالار سالاسى بويىنشا 45 قۇزىرەتتىلىك سايىس ءوتىپ, جاستاردىڭ وسى باعىتتاعى بىلىكتىلىگىن ارتتىردى.
ەلىمىزدە «WorldSkills Kazakhstan» جوباسى 2015 جىلدان بەرى ءوتىپ كەلەدى. جوبانىڭ ۇلتتىق وپەراتورى – «Talap» كەاق, ول قازاقستاننىڭ اتىنان «WorldSkills International» جانە «WorldSkills Europe» ۇيىمدارىندا وكىلدىك ەتەدى.
مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ەلىمىزدىڭ كادرلىق الەۋەتىن بىرتىندەپ ارتتىرۋ وتە ماڭىزدى ەكەنىن اتاپ وتكەن بولاتىن. ەلىمىز ءۇشىن قازىرگى ساتتە بولاشاقتا سۇرانىسقا يە بولاتىن كاسىپتەر ءۇشىن بىلىكتى ماماندار دايارلاۋدى مىقتاپ قولعا الۋ كەرەك ەكەنى ءسوزسىز. سونداي-اق پرەزيدەنت ساپالى ءبىلىم بەرۋ ماسەلەسىنە ەرەكشە توقتالدى. مەملەكەت باسشىسىنىڭ ايتۋىنشا, قوعامدا ەڭبەكقورلىق, كاسىبيلىك سياقتى قاسيەتتەر وتە جوعارى باعالانۋى ءتيىس. ءوز كاسىبىن جەتىك مەڭگەرگەن ماماندار ۇلت ساپاسىن ارتتىرۋعا كۇش قوسادى. اتالعان چەمپيونات تەحنيكالىق جانە كاسىپتىك ءبىلىم بەرۋ جۇيەسىن دامىتۋ, جۇمىسشى ماماندىقتاردىڭ بەدەلىن ارتتىرۋ جانە كادر دايارلاۋ ساپاسىن جەتىلدىرۋ ماقساتىندا جىل سايىن ءداستۇرلى تۇردە وتكىزىلىپ كەلەدى.
چەمپيوناتتىڭ اشىلۋ سالتاناتىندا ءسوز سويلەگەن وقۋ-اعارتۋ ۆيتسە-ءمينيسترى شىنار اقپاروۆا مەملەكەت باسشىسىنىڭ تاپسىرماسىمەن ەلىمىزدە ەڭبەك ادامىنىڭ قوعامداعى مارتەبەسىن ارتتىرۋ, تەحنيكالىق جانە كاسىپتىك ءبىلىم سالاسىن ترانسفورماتسيالاۋ بويىنشا اۋقىمدى جۇمىستار جۇرگىزىلىپ جاتقانىن ايتتى.
«ەلىمىزدىڭ بولاشاعى ءۇشىن جاس ماماندارعا سەرپىن بەرىپ, الەۋەتىن ارتتىرۋ ماقساتىندا ۇيىمداستىرىلىپ وتىرعان بۇل سايىستىڭ بەرەرى مول. بيىلعى جۇمىسشى ماماندىقتار جىلى تەحنيكالىق جانە كاسىپتىك ءبىلىم سالاسىن جاڭا دەڭگەيگە كوتەرگەن ەرەكشە جىل بولدى. «WorldSkills» قوزعالىسى وسى مىندەتتى جۇزەگە اسىراتىن جوباعا اينالدى. الەمدىك تاجىريبە بۇل باستامانىڭ ميلليونداعان جاس ماماننىڭ تاعدىرىن وزگەرتەتىنىن دالەلدەپ كەلەدى. «WorldSkills» – ءبىلىم, داعدى, تاباندىلىق سىنالاتىن ۇلكەن سىن. بۇل – وتاندىق كاسىپتىك ءبىلىم بەرۋ سالاسىن الەمدىك ستاندارتقا جاقىنداتقان رەفورمانىڭ كاتاليزاتورى», دەدى ۆيتسە-مينيستر.
اتالعان شەبەرلىك سايىسىنا اقتوبە, الماتى, اتىراۋ, شىعىس قازاقستان وبلىستارىنىڭ جاستارى قاتىستى. شىندىعىندا, ءاربىر جەتىستىك – تەك جەكە قاتىسۋشىنىڭ تابىسى عانا ەمەس, ەلىمىزدىڭ كاسىبي شەبەرلىك دەڭگەيىنىڭ كورسەتكىشى. «WorldSkills Kazakhstan» ەلىمىزدە كاسىبي ستاندارتتاردى جاڭارتۋعا, تەحنيكالىق جانە كاسىپتىك ءبىلىم بەرۋ جۇيەسىن دامىتۋعا, جۇمىس ماماندىقتارىنىڭ بەدەلىن كوتەرۋگە ايتارلىقتاي ۇلەس قوسا بەرمەك.
«WorldSkills» قوزعالىسىنىڭ ەلىمىزدەگى ونجىلدىعىن اتاپ ءوتۋ – وسى شارانىڭ باستى ماقساتى. وسى ون جىل ىشىندە مىقتى كاسىبي قاۋىمداستىق قۇرىلىپ, ستۋدەنتتەر, تالىمگەرلەر جانە ساراپشىلار بىرىگىپ, شەبەرلىكتى دامىتۋعا, حالىقارالىق ستاندارتتارعا سايكەس كاسىبي دەڭگەيدى كوتەرۋگە مۇمكىندىك الدى. بۇل ونجىلدىق بولاشاق ۇرپاققا شابىت بەرىپ, كاسىبي ءبىلىم مەن شەبەرلىكتىڭ مارتەبەسىن كوتەرۋگە نەگىز بولا الادى. ءبىر سوزبەن ايتقاندا, «WorldSkills» – ادالدىققا, سىيلاستىققا, كاسىبيلىككە جانە شەبەرلىكتى جەتىلدىرۋگە نەگىزدەلگەن قوزعالىس.
