OPEC+ ءباا ۇيىمنان شىققاننان كەيىن, 3 مامىردا العاش رەت ونلاين فورماتتا جيىن ۇيىمداستىردى. جيىنعا قاتىسۋشى ەلدەر نارىقتاعى جاعدايعا بايلانىستى ءوندىرىس كولەمىن قايتا قاراستىرۋعا دايىن ەكەنىن اتاپ ءوتتى. ياعني, مۇناي نارىعىنداعى باعا مەن سۇرانىسقا قاراي يكەمدى ساياسات ساقتالادى.
كەلىسىمگە سايكەس, قازاقستان ءۇشىن بەلگىلەنگەن كۆوتا – تاۋلىگىنە 1,599 ملن باررەل مۇناي. بۇل سوڭعى ايلاردا ءوندىرىس كولەمىن قاتارىنان ءۇشىنشى رەت ارتتىرۋ بولىپ وتىر.
Reuters اگەنتتىگىنىڭ مالىمەتىنشە, ءوندىرىستى ارتتىرۋ تۋرالى شەشىمنىڭ ەكى نەگىزگى سەبەبى بار. ءبىرىنشىسى – تاياۋ شىعىستاعى گەوساياسي جاعداي مەن جەتكىزىلىمدەرگە قاتىستى شەكتەۋلەر, بۇل مۇناي باعاسىنىڭ وسۋىنە الىپ كەلۋى مۇمكىن. ەكىنشىسى – OPEC+ ۇيىمىنىڭ بىرتۇتاستىعىن ساقتاپ, ءباا ۇيىمنان شىققاننان كەيىن دە جۇيەنىڭ جۇمىس ىستەپ تۇرعانىن كورسەتۋ.
ءباا 28 ساۋىردە OPEC پەن OPEC+ قۇرامىنان شىعاتىنىن مالىمدەگەن ەدى. ولار بۇل قادامدى مۇناي سالاسىنا كوبىرەك ينۆەستيتسيا سالىپ, ءوندىرۋ كولەمىن شەكتەۋسىز ارتتىرۋ قاجەتتىلىگىمەن تۇسىندىرگەن.
قازىر OPEC قۇرامىندا 11 مەملەكەت قالدى, ال OPEC+ اياسىندا بۇدان بولەك تاعى بىرنەشە مۇناي ءوندىرۋشى ەل, سونىڭ ىشىندە قازاقستان دا بار.
