ەكسپەديتسيا مۇشەلەرىنىڭ ايتۋىنشا, جانۋارلاردىڭ ولەكسەلەرى ۇزاق ۋاقىت دالادا جاتقان. بۇل ولاردىڭ ءبىر ساتتە ەمەس, بىرتىندەپ قىرىلعانىن بىلدىرەدى.
Turan قاۋىمداستىعى باسقارما توراعاسى جانە ەكسپەديتسيا جەتەكشىسى جانىبەك كەنجەباەۆتىڭ ايتۋىنشا جاعدايدىڭ ىقتيمال سەبەپتەرىنىڭ ءبىرى – كوبەيۋ كەزەڭىمەن بايلانىستى تابيعي بيولوگيالىق ۇدەرىستەر. بۇل ۋاقىتتا اقبوكەندەر السىرەپ, سىرتقى قاۋىپتەرگە توزىمدىلىگى تومەندەيدى.
دەگەنمەن, ناقتى قورىتىندى جاساۋ ءۇشىن قوسىمشا عىلىمي زەرتتەۋلەر قاجەت ەكەنى اتاپ ءوتىلدى.
ەكسپەديتسيا جۇمىسى جالعاسىپ جاتىر. قاتىسۋشىلار دالاداعى احۋالدى باقىلاپ, دەرەكتەر جيناپ جاتىر. جينالعان ماتەريالدار كەيىن مال شارۋاشىلىعى سالاسىنىڭ جاعدايىن جانە تابيعي تەپە-تەڭدىكتى تەرەڭ تالداۋعا نەگىز بولماق.
ايتا كەتەيىك, Dala.Camp ۇلتتىق مال شارۋاشىلىعى ەكسپەديتسياسى 2026 جىلدىڭ 1 مامىرىندا Astana قالاسىندا باستالعان. جوبا قازاقستاننىڭ Turan مال شارۋاشىلىعى قاۋىمداستىعى ۇيىمداستىرعان 16 كۇندىك دالالىق مەدياجوبا رەتىندە جۇزەگە اسىپ جاتىر.
ەكسپەديتسيا شامامەن 10 ءوڭىردى قامتىپ, 6000 شاقىرىمنان استام جولدى ەڭسەرۋدى كوزدەيدى. وعان 40-قا جۋىق فەرمەر, ساراپشى جانە سالا ماماندارى قاتىسۋدا. جوبا اياسىندا ناقتى شارۋاشىلىقتاردا تاجىريبە الماسۋ, مال شارۋاشىلىعىنىڭ ەكونوميكالىق جاعدايىن تالداۋ جانە سالانىڭ نەگىزگى ماسەلەلەرىن انىقتاۋ جوسپارلانعان.
ەكسپەديتسيا سوڭىندا قازاقستانداعى ەت باعىتىنداعى مال شارۋاشىلىعى بويىنشا اناليتيكالىق ەسەپ ازىرلەنىپ, كوپسەريالى دەرەكتى فيلم مەن رەاليتي فورماتىنداعى جوبا شىعارىلماق.
