اۋدانداعى 35 مەكتەپتىڭ ىشىندە جاڭا فورماتتاعى, كەڭ اۋقىمدى مۇمكىندىكتەرمەن جابدىقتالعان بۇل مەكتەپ ءبىلىم ساپاسىن ارتتىرۋعا, قاۋىپسىز ءارى جايلى ورتا قالىپتاستىرۋعا باعىتتالعان. وقۋ عيماراتى ۇلتتىق ستاندارتتارعا ساي سالىنىپ, زاماناۋي ءپان كابينەتتەرىمەن, تسيفرلىق تەحنولوگيالارمەن جانە وقۋشى قاجەتتىلىكتەرىنە بەيىمدەلگەن كەڭ وقۋ الاڭدارىمەن قامتاماسىز ەتىلگەن.
سوزاق اۋدانىنىڭ ءبىلىم بەرۋ جۇيەسى بۇگىندە تۇراقتى دامۋ جولىندا. اۋداندا 3-6 جاستاعى بالالاردى مەكتەپكە دەيىنگى تاربيەمەن قامتۋ 100 پايىزعا جەتكەن, مەكتەپتەردىڭ بارلىعى ينتەرنەتپەن تولىق قامتاماسىز ەتىلگەن. مۇنداي كورسەتكىشتەرگە قول جەتكىزۋدە كەلەشەك مەكتەپتىڭ اشىلۋى ءبىلىم سالاسىنداعى جۇيەلى وزگەرىستەردىڭ ناقتى كورىنىسى دەۋگە بولادى.
سوزاق اۋدانىنىڭ ءبىلىم ءبولىمى باسشىسى اباي شارىپبەك ۇلى جاڭا مەكتەپتىڭ ماڭىزىنا ەرەكشە توقتالدى:
«كەلەشەك مەكتەپتەرى – بۇل تەك جاڭا عيمارات ەمەس. بۇل – بولاشاق ۇرپاقتىڭ ساپالى ءبىلىم الۋىنا جاسالعان ستراتەگيالىق قادام. ى.التىنسارين اتىنداعى مەكتەپ اۋدانداعى ۇزدىك ءبىلىم وردالارىنىڭ بىرىنە اينالاتىنىنا سەنىمىمىز مول. مۇندا بالالاردىڭ جان-جاقتى دامۋىنا, زاماناۋي ءبىلىم الۋىنا بارلىق جاعداي جاسالعان. بۇل – مەملەكەت باسشىسىنىڭ ءبىلىم سالاسىنا بەرگەن تاپسىرمالارىنىڭ سوزاق اۋدانىندا ناقتى جۇزەگە اسىپ وتىرعانىنىڭ ايقىن دالەلى. قازىرگى تاڭدا «كەلەشەك مەكتەپتەرى» جوباسىنىڭ ارقاسىندا وقۋ ۇلگەرىمى كورسەتكىشتەرىندە وڭ وزگەرىستەر بايقالۋدا. وقۋشىلاردىڭ پاندىك ساۋاتتىلىعى, زەرتتەۋشىلىك داعدىلارى, فۋنكتسيونالدىق وقۋ كورسەتكىشتەرى جىل سايىن ءوسىپ كەلەدى. بۇل – جوبانىڭ تيىمدىلىگىنىڭ ناقتى دالەلى», دەدى ءبىلىم ءبولىمىنىڭ باسشىسى.
ايتا كەتەيىك, 2025-2026 وقۋ جىلىندا اۋدان بويىنشا 15 470 وقۋشى ءبىلىم الۋدا, ال جاڭا وقۋ فورماتىنداعى مەكتەپتىڭ ىسكە قوسىلۋى وقۋشى ورىندارىنىڭ تاپشىلىعىن ازايتىپ, اتا-انالار ءۇشىن دە ۇلكەن قولايلىلىق تۋعىزدى.
مامانداردىڭ ايتۋىنشا, كەلەشەك مەكتەپ تەك بۇگىننىڭ ەمەس, ەرتەڭنىڭ دە سۇرانىسىنا جاۋاپ بەرەتىن ءبىلىم ورداسى رەتىندە اۋداننىڭ ءبىلىم ساپاسىن جاڭا دەڭگەيگە كوتەرمەك. بۇل مەكتەپ – سوزاقتىڭ بولاشاعىنا سالىنعان بەرىك ىرگەتاس.
