فيليال باسشىسى ءادىلجان ساۋلەباەۆتىڭ ايتۋىنشا, بانك قارجى ينستيتۋتى عانا ەمەس, ءاربىر وتباسىنىڭ بولاشاعىنا اسەر ەتەتىن ۇيىمعا اينالدى.
جارمەڭكەگە كەلۋشىلەردى قىزىقتىرعان بانكتىڭ «ارمانعا جول» ءونىمى – وتە ءتيىمدى قۇرال. الدىمەن كليەنت دەپوزيت اشادى دا, جۇمىس بەرۋشى مەكەمەسىنىڭ بۋحگالتەرىمەن كەلىسىم جاسايدى. بۋحگالتەر جالاقىسىنان بەلگىلەنگەن سومانى اي سايىن دەپوزيتىنە اۋدارادى. باسپانا الۋدى ارماندايتىن, بىراق جالاقى العاندا دەپوزيت تولىقتىرۋدى كەيىنگە شەگەرەتىن, ۇمىتىپ كەتەتىن جاندار ءۇشىن بۇل وتە قولايلى.
سالىمشى ۇلتاي ەشيموۆا دا بۇگىنگى شاراعا كەلىپتى. ول بۇرىندارى پاتەرلەرىن دوللارلىق نەسيەمەن راسىمدەگەندىكتەن تولەي الماعانىن ەسكە الادى.
ء–بارىن ساتىپ, قارىزدى جابۋعا تۋرا كەلدى. كەيىن وسى وتباسى بانككە اقشا جيناۋعا بولاتىنىن ءبىلدىم. بىراق الدىنداعى تاجىريبەم ءساتسىز اياقتالعاندىقتان, بەتتەمەدىم. جولداسىم تۇراقتى سالىمشى بولدى. العاشقى ءۇيدىڭ جارتى سوماسىن جينادىق. ەكىنشى باسپاناعا كولىگىمىزدى ساتىپ, اقشاسىن سالدىق. ءۇشىنشى پاتەرگە زەينەتاقى قورىنداعى شەكتى سومادان اسقان قارجىنى پايدالاندىق. ءسويتىپ «وتباسى بانكتىڭ» ارقاسىندا ساتۋعا ءماجبۇر بولعان پاتەرلەردى قايتا تۇگەندەدىك, دەيدى بانك سالىمشىسى.
قىزىلوردادا 2024 جىلدان بەرى جاس وتباسىلارعا ارنالعان «سىر جاستارى» اتتى وڭىرلىك باعدارلاما بار. وبلىس اكىمىنىڭ قولداۋىمەن جەرگىلىكتى بيۋدجەتتەن جىل سايىن 1,2 ملرد تەڭگە, بانكتەن 500 ملن تەڭگە بولىنەدى. وسىعان دەيىن 100 جاس وتباسى باسپانالى بولدى, بيىل تاعى 100 وتباسىعا نەسيە راسىمدەلۋدە.
سول جاعالاۋداعى جاڭا ۇيدەن پاتەر العان باقىتجان رساەۆ – وبلىستىق كوپبەيىندى اۋرۋحانانىڭ رەانيماتولوگ دارىگەرى.
«جۇمىس ورنىم جالعا بەرگەن پاتەرگە 80-100 مىڭ تەڭگە تولەپ تۇردىم. بالالار وسكەن سايىن قالايدا ءوز باسپانامىز بولۋ كەرەك دەپ ويلايسىڭ. وڭتايلى مۇمكىندىكتەردى ىزدەستىرىپ, «سىر جاستارى» باعدارلاماسى تۋرالى بىلدىك. ءسويتىپ ءبىزدى ءۇيلى ەتەتىن ەڭ قولايلى ءارى ءتيىمدى باعدارلاما بولعاندىقتان «وتباسى بانككە» اي سايىن 100 مىڭ تەڭگەدەن اقشا سالدىق. مەجەلى 2 ميلليون اقشا جينالىپ, يپوتەكانى 13 جىلعا راسىمدەدىك. ايىنا 175 مىڭ تەڭگەدەن تولەيمىن. باستىسى – ءوز ءۇيىمىز, جىلى ۇيامىز», دەيدى جاس مامان.
بۇل باعدارلامانىڭ قارىز بويىنشا سىياقى مولشەرلەمەسى جىلدىق 5% (جتسم 5,2% باستاپ 5,7% دەيىن) بولعاندىقتان, باسپانالى بولۋعا ۇمتىلاتىندار سانى كوپ.
ادام ءومىرىنىڭ ساۋلەلى ءساتى – باسپانالى بولعان كەز. «وتباسى بانك» بارشاعا وسى باقىتتى سىيلاپ كەلەدى.
