بايلانىس وپەراتورلارىنىڭ كەڭەسى

ينۆەستيتسيالار جانە دامۋ مينيسترلىگى بايلانىس, اقپاراتتاندىرۋ جانە اقپارات كوميتەتىندە ۆيتسە-مينيستر اسقار جۇما­عا­ليەۆ­تىڭ توراعالىعىمەن «كسەلل» اق, «كار-تەل» جشس, «موبايل تەلەكوم-سەرۆيس» جشس جانە «التەل» جشس بايلانىس وپەرا­تور­لارىنىڭ كەڭەسى ءوتتى. وپەراتورلار اراسىنداعى كەلىسسوزدەر ناتيجەسىندە 2015 جىلدىڭ 1 قاڭتارىنان باستاپ ينتەركوننەكت مولشەرلەمەسىن مينۋتىنا 11,10 تەڭگەدەن 8 تەڭگەگە (ققس-سىز) دەيىن تومەندەتۋ تۋرالى شەشىم قابىلداندى. «ءبىز وپەراتورلارعا ءبىر جەردە جينالىپ, ءبىر شەشىمگە كەلۋگە مۇمكىندىك بەردىك. ناتيجەسىندە, ينتەركوننەكت بيىل 28%-عا ءتو­مەن­دەيدى. بۇل ۇيالى بايلانىس قىز­مەت­تەرى نارىعىنداعى باسەكەلەستىكتى دامىتىپ, ابونەنتتەردىڭ شى­عىن­دارىن ازايتادى», دەپ اتاپ ءوتتى اسقار جۇماعاليەۆ. بۇدان باسقا, اسقار جۇما­عاليەۆتىڭ ايتۋىنشا, كەزدەسۋ بارىسىندا وپەراتورلار 2016 جىلدىڭ 1 قاڭتارىنان باستاپ بارلىق ۇيالى وپەراتورلار ءۇشىن ينتەركوننەكت مولشەرلەمەسىن مينۋتىنا (ققس-سىز) 5 تەڭگە كولەمىندە بەكىتۋگە كەلىستى. ەستەرىڭىزگە سالا كەتەيىك, ينتەر­كوننەكت – وپەراتورلار اراسىن­داعى جەلىارالىق بايلانىس. ين­تەركوننەكت مولشەرلەمەسى ءبىر وپەرا­تور­دىڭ باسقا وپەراتورعا ءوز ابو­نەن­تىنىڭ جەلىدەن تىس قوڭىراۋ شال­عاندا سويلەسۋدىڭ ءاربىر مينۋتى ءۇشىن تولەيتىن سومانى انىقتايدى. قازاقستاندا ينتەركوننەكت ستاۆكاسى 11 جىل بويى وزگەرمەي, (ققس-سىز) 19,98 تەڭگە قۇراعان. 2010-2012 جىلدار ارالىعىندا ۇيالى بايلانىس وپەراتورلارىمەن كەلىسىم بويىنشا ينتەركوننەكت مولشەرلەمەسى 19,98 تەڭگەدەن 15,3 تەڭگەگە دەيىن (ققس-سىز) ءتو­­مەن­­­دەتىلگەن. 2012 جىلدىڭ جەل­­توق­­­سان­ىندا ۇيالى بايلانىس وپە­را­تور­لارى ءۇش جىل ىشىندە جىل سايىن 15%-عا ينتەركوننەكت مولشەر­لە­مەسىن تومەندەتۋ ءجو­نىن­دەگى مەمو­راندۋمعا قول قويعان. سونىمەن قاتار, قر يدم بايلانىس, اقپاراتتاندىرۋ جانە اقپارات كوميتەتى «كسەلل» اق جانە «كار-تەل» جشس ينتەركوننەكت باعاسىنا ساراپتاما وتكىزگەن بولاتىن. ساراپتاما قورىتىندىسى بويىنشا وپەراتورلارعا 2015 جىلعى 1 قاڭتاردان باستاپ ينتەركوننەكت مولشەرلەمەسىن 11,10 تەڭگەدەن 8,88 تەڭگەگە (ققس-سىز) دەيىن تومەندەتۋ قاجەتتىلىگى تۋرالى قورىتىندى جىبەرىلدى. «ەگەمەن-اقپارات».