ۋكراينادان ءىس-ءتۇسسىز كەتكەن قازاق جاۋىنگەرىنىڭ جەرلەنگەن جەرى تابىلدى

استانا. 10 مامىر. ۇلى وتان سوعىسىنا اتتانىپ, ءىس-ءتۇسسىز كەتكەن قازاقستاندىق جاۋىنگەر اقان توقباەۆتىڭ تاعدىرى 70 جىلدان كەيىن بەلگىلى بولدى. ىزدەۋ ەكسپەديتسياسى كەزىندە ونىڭ ۋكرايناداعى سۋديلكو اۋىلىندا باۋىرلاستار زيراتىنا جەرلەنگەنى انىقتالدى. بۇل تۋرالى 24.kz حابارلادى. وسىعان بايلانىستى جاۋىنگەردىڭ تۋىستارى ونىڭ تۋعان اۋىلى شىعىس قازاقستان وبلىسى, ءۇرجار اۋدانى, ايتباي اۋىلىندا ەسكە الۋ ءراسىمىن وتكىزدى. وعان ءوڭىر تۇرعىندارى قاتىستى. اقان توقباەۆ سوعىسقا 1941 جىلى كەتكەن. ەكى جىلدان كەيىن ونىمەن بايلانىس ۇزىلگەن. ال, تۋعان-تۋىستارىنا توقباەۆتىڭ ءىس-ءتۇسسىز جوعالىپ كەتكەنى تۋرالى حابار جەتكەن. «ءبىز ىزدەۋ جۇمىستارىن ۇزدىكسىز جۇرگىزدىك. وسى ماقساتتا كوپتەگەن جەرلەرگە حات جازدىق. ناتيجەسىندە اعامىز تۋرالى دەرەككە قول جەتكىزىپ وتىرمىز. بىزگە باۋىرلاستار زيراتىنداعى ەسكى تاقتانىڭ سۋرەتىن جىبەردى. وندا اعامىزدىڭ اتى-ءجونى جازىلعان. ودان باسقا دا بۇل دەرەكتى ناقتىلايتىن قۇجاتتار قولىمىزعا ءتيدى», – دەيدى جاۋىنگەردىڭ قارىنداسى ءمارزيا ايتبايقىزى. سونىمەن قاتار, اقان اتانىڭ تۋىستارى ونىڭ اسكەر قاتارىنا الىنعاننان كەيىن الاتاۋ تاۋىنداعى اسكەري بولىمدەردىڭ بىرىندە دايىندىقتان وتكەنىن, سول جەردەن تىكەلەي جاۋ تىلىنا جىبەرىلگەنىن انىقتاعان. تۋىستارىنىڭ ايتۋىنشا, اقان توقباەۆتى 208-ءشى ديۆيزيانىڭ ءبولىم كومانديرى ەتىپ تاعايىنداعان. ايتباي اۋىلىندا سوعىسقا اتتانعان 54 ارداگەردىڭ قۇرمەتىنە ەسكەرتكىش تاقتا ورناتىلعانىن ايتا كەتەيىك. ەلامان قوڭىر. دەرەك, سۋرەت: 24.kz.