بوكستان الەم چەمپيوناتىن قازاقستاندا وتكىزۋدى حالىقارالىق ۋنيۆەرسيتەتتەر سپورتى فەدەراتسياسى ۇسىنىپ وتىر. 28 قاراشا كۇنى قىتايدىڭ ماكاو قالاسىندا ازيا ۋنيۆەرسيتەتتىك سپورت فەدەراتسياسىنىڭ باس اسسامبلەياسى ءوتتى. بۇل جيىنعا قازاقستان ۇلتتىق ستۋدەنتتەر سپورت وداعىنىڭ پرەزيدەنتى قايرات زاكيريانوۆ تا قاتىستى. ءىس-شارا اياسىندا وڭىردەگى ۋنيۆەرسيتەتتىك سپورتتى دامىتۋعا قاتىستى نەگىزگى ماسەلەلەر, ىنتىماقتاستىق ستراتەگيالارى مەن ورتالىق ازياداعى ستۋدەنتتىك سپورت جوبالارىن ىلگەرىلەتۋگە باعىتتالعان جاڭا باستامالار تالقىلاندى.
حالىقارالىق ۋنيۆەرسيتەتتەر سپورتى فەدەراتسياسىنىڭ پرەزيدەنتى لەونتس ەدەر قازاقستاننىڭ حالىقارالىق ءىرى جارىستاردى ۇيىمداستىرۋدا تاجىريبەسى مول ەكەنىن ايتتى. 2017 جىلى ەلىمىزدە بۇكىلالەمدىك قىسقى ۋنيۆەرسيادا جوعارى دەڭگەيدە ۇيىمداستىرىلدى.
بوكستان ستۋدەنتتەر اراسىنداعى الەم چەمپيوناتىن وتانداسىمىز گەننادي گولوۆكين باسقاراتىن WORLD Boxing حالىقارالىق ۇيىمنىڭ قولداۋىمەن وتكىزۋى مۇمكىندىگى جان-جاقتى قاراستىرىلىپ جاتىر.
سونداي-اق حالىقارالىق ۋنيۆەرسيتەتتەر سپورتى فەدەراتسياسى 2029 جىلعى بۇكىلالەمدىك قىسقى ۋنيۆەرسيادا ويىندارىن دا قازاقستاندا ەكىنشى رەت وتكىزۋ ماسەلەسىن كوتەردى.
بۇگىن الماتىدا وتكەن ءباسپاسوز ءماسليحاتىندا قايرات زاكيريانوۆ ستۋدەنتتەر اراسىندا الەم چەمپيوناتىن وتكىزۋ ماڭىزدى ەكەنىن ايتتى. «بۇل حالىقارالىق ۋنيۆەرسيتەتتەر سپورتى فەدەراتسياسى, باسقا دا حالىقارالىق سپورت ۇيىمدارىنىڭ ەلىمىزگە دەگەن سەنىمى جوعارى ەكەنىن ايقىنداي تۇسەدى. سونداي-اق ەلىمىزدە بۇعان دەيىن دە سپورت تۇرلەرىنەن الەمدىك دودالار ۇيىمداستىرىلىپ ءجۇر. مۇنداي اۋقىمدى سايىستاردى وتكىزۋگە تاجىريبەمىز دە جەتكىلىكتى», دەدى ق.زاكيريانوۆ. سونداي-اق ول 2028 جىلى استانادا ستۋدەنتتەر اراسىندا Combat بويىنشا الەم چەمپيوناتىن وتكىزۋگە كەلىسسوز جۇرگىزىلىپ جاتقانىن دا ايتتى.
