فوتو: qaz-media.kz
سەنات دەپۋتاتىنىڭ ايتۋىنشا, جاستاردى اۋىلدىق جەرلەردەگى دەنساۋلىق ساقتاۋ, ءبىلىم بەرۋ, مادەنيەت, سپورت جانە اگروونەركاسىپتىك كەشەن سالالارىنا تارتۋ ماقساتىندا ازىرلەنگەن باعدارلاما ءبىر رەتتىك جاردەماقى جانە تۇرعىن ۇيگە ارنالعان جەڭىلدەتىلگەن نەسيەلەر ۇسىنىپ كەلەدى. باعدارلاما ىسكە اسىرىلعان ۋاقىت ىشىندە 114 مىڭنان استام مامان قولداۋ العان, شامامەن 52 مىڭ ادام تۇرعىن ءۇي ماسەلەسىن شەشكەن.
«الايدا باعدارلامانىڭ اۋقىمىنا قاراماستان, قاتىسۋشىلاردىڭ ءبىر بولىگى اۋىلدا 3 جىل جۇمىس ىستەۋ جونىندەگى مىندەتتەمەسىن ورىندامايدى. تەك سوڭعى 3 جىلدا 166 ادام كەلىسىم تالاپتارىن بۇزعان, ال وتەلمەگەن نەسيەلەر كولەمى 784 ملن تەڭگەدەن اسقان.
بۇگىندە حالىقتىڭ 37 پايىزى, ياعني 3 ميلليوننان استام, شامامەن 4 ميلليونعا جۋىق ادام اۋىلدىق جەرلەردە تۇرادى. تەك سولتۇستىك قازاقستان وبلىسىنىڭ وزىندە 2025-2027 جىلدارعا 3 043 مامان قاجەت. 114 مىڭ مامان ءبىر رەتتىك تولەم العانىمەن, ولاردىڭ تەك 52 مىڭى عانا تۇرعىن ۇيمەن قامتىلدى. ال شىن مانىندە قانشا مامان اۋىلدا قالىپ قويعانى بەلگىسىز. ولار اقشالارىن الىپ, ۋاقىت وتە كەلە اۋىلدان كەتىپ قالادى. جاردەماقى مامانداردى تارتۋعا كومەكتەسەدى, بىراق ولاردى تۇراقتى ۇستاپ قالۋعا جەتكىلىكسىز», دەدى نۇرتورە ءجۇسىپ.
سەناتور سونداي-اق باعدارلاماعا قاتىسۋشىلاردىڭ ءومىر ءسۇرۋ جاعدايلارىنا – جالاقى دەڭگەيىنە جانە الەۋمەتتىك ينفراقۇرىلىمنىڭ قولجەتىمدىلىگىنە – كەشەندى تالداۋ جۇرگىزىلمەگەنىن اتاپ ءوتتى.
«اۋىلداردا ءالى دە ساپالى قىزمەتتەر مەن تۇرعىن ۇيلەر جەتىسپەيدى, سوندىقتان جاس ماماندار مىندەتتى مەرزىم اياقتالعان سوڭ كەتىپ قالادى. بۇعان قوسا, بيۋروكراتيا, وڭىرلەردەگى تاجىريبە ايىرماشىلىعى جانە وبلىستاردىڭ باعدارلاماعا اركەلكى قاتىسۋى قوسىمشا قيىندىقتار تۋعىزادى», دەدى دەپۋتات.
وسىعان بايلانىستى ن.ءجۇسىپ انىقتالعان پروبلەمالاردى ەسكەرە وتىرىپ, باعدارلاماعا وزگەرىستەر ەنگىزۋدى سۇرادى.
