استانا. 10 مامىر. پولشادا ەلدەگى بارلىق سايلاۋ ۋچاسكەلەرى اشىلىپ, پرەزيدەنت سايلاۋى ءوتىپ جاتىر. بۇل تۋرالى ريا «نوۆوستي» حابارلادى.
پولياكتارعا بۇل كۇنى ەل ازاماتتارىنىڭ 100 مىڭنان استامىنىڭ قولداۋىنا يە بولعان 11 كانديدات اراسىنان پرەزيدەنتتى تاڭداپ الۋعا تۋرا كەلەدى. ال مەملەكەت باسشىلىعىنا ۇمىتكەرلەردىڭ اراسىندا قازىرگى ءىس باسىنداعى پرەزيدەنت برونيسلاۆ كوموروۆسكي, «قۇقىق جانە ادىلدىك» ۇلتتىق-كونسەرۆاتيۆتىك پارتياسى ۇسىنعان اندجەي دۋدا, سولشىل دەموكراتيالىق كۇشتەر وداعى قولداۋشى ماگدالەنا وگۋرەك, پولياك شارۋالار پارتياسىنان ادام يارۋباس, «ۇلتتىق قوزعالىس» پارتياسىنان ماريان كوۆالسكي, «سەنىڭ قوزعالىسىڭ» پارتياسىنان يانۋش پاليكوت, ORWiN پارتياسىنان يانۋش كورۆين-ميككە, تاۋەلسىز كانديدات پاۆەل كۋكيز, جاڭا وڭشىلدار كونگرەسىنەن ياتسەك ۆيلك, «تىكەلەي دەموكراتيادان» پاۆەل تاناينو جانە تاۋەلسىز كانديدات گجەگوج براۋن بار.
ەگەر بۇگىنگى ءبىرىنشى تۋردا پولشا پرەزيدەنتتىگىنە كانديداتتاردىڭ بىردە-ءبىرى سايلاۋشىلار داۋىسىنىڭ جارتىسىنان استامىن جيناي المايتىن بولسا, 24 مامىر كۇنى ەكىنشى تۋر وتەتىن بولادى.
سالىنعان ساۋالداماعا سايكەس, پولشا ازاماتتارىنىڭ باسىم بولىگىنىڭ قازىرگى ءىس باسىنداعى پرەزيدەنت برونيسلاۆ كوموروۆسكيدى جاقتايتىندارى بەلگىلى بولىپ وتىر. سوعان قاراماستان, ونىڭ ءبىرىنشى تۋردا جەڭىسكە جەتەتىنىنە سەنىم جوق. سەبەبى, وسى كەزگە دەيىن مونيتورينگ كورسەتكىشتەرى ۇدايى وزگەرىپ كەلدى. ماسەلەن, ناۋقاننىڭ باستالعان شاعىندا كوموروۆسكيدى جاقتاۋشىلار قاتارى 60 پايىزعا تەڭ بولسا, سوڭعى كەزدەرى بۇل بەلدەۋ 35 پايىزدان اسا الماي قالدى. ساراپشىلار ءىس باسىنداعى پرەزيدەنتتىڭ رەيتينگىسى بۇرىن-سوڭدى ءدال بۇلاي ءتۇسىپ كورمەگەنىن ايتادى.
ءوزىنىڭ سوزدەرىندە كوموروۆسكي بۇكىل ەۋروپاعا, سونىڭ ىشىندە پولشاعا رەسەي تاراپىنان ءتونىپ تۇرعان قاۋىپ جونىندە ءجيى ايتىپ ءجۇر. «رەسەي تاراپىنان كورشىلەرىنە جاعىمسىز كوزقاراس رەسەي-ۋكراينا داعدارىسىنىڭ باستى سەبەبى بولدى, بۇل قازىر كۇللى ەۋروپانىڭ, سونىڭ ىشىندە پولشانىڭ قاۋىپسىزدىگىنە قاتەر ءتوندىرىپ تۇر», - دەدى ول وتكەن سەيسەنبى كۇنى ەلبلونگتە سايلاۋشىلار الدىندا. ەلبلونگ قالاسى پولشا-رەسەي شەكاراسىنا جاقىن ماڭدا, كالينينگراد وبلىسىنىڭ قاسىندا ورنالاسقان.
ءىس باسىنداعى پولياك پرەزيدەنتى وسى سەبەپتەن ۆارشاۆانىڭ قورعانىس قابىلەتىن, سونىڭ ىشىندە «شەكارا كۇزەتىنىڭ الەۋەتىن پايدالانۋعا» مۇمكىندىك بەرەتىن مەحانيزمدى كۇشەيتە تۇسۋگە ءتيىس ەكەنىن اتاپ ءوتتى.
الايدا, ساراپشىلار ەلەكتورات سايلاۋداعى تاپ وسىنداي ۆەكتورى ءۇشىن كوموروۆسكيدەن اياقتارىن تارتا باستاعانىن ايتادى. تالداۋشىلار سايلاۋ كەزىندە امەريكالىق كەڭەسشىلەردىڭ ىقپالىمەن جۇمىس جاساپ جاتقان ءىس باسىنداعى پرەزيدەنتتىڭ وسىنداي سوزدەرى سالدارىنان ەلەكتوراتتىڭ بەلگىلى ءبىر بولىگى ونىڭ نەگىزگى قارسىلاسى دۋدا جاعىنا اۋىپ كەتكەن دەپ ەسەپتەيدى. سوڭعى سۇراۋ سالۋدا بۇلاردىڭ كەيىنگىسى 27 پايىزدىق داۋىس الدى. ول العاشقى كەزدەرى تەك 15 پايىز توڭىرەگىندە تۇر ەدى.
مۇرات ايتقوجا.
دەرەك, سۋرەت: ريا نوۆوستي.
