فوتو: rakhimzhan_yerdenbekov/www.instagram.com
ونىڭ ايتۋىنشا, فەدەراتسيا ءاردايىم حالىقارالىق انتيدوپينگ ستاندارتتارىن قاتاڭ ساقتاۋ قاعيداتتارىن ۇستانادى. راحىمجان ەردەنبەكوۆ بۇل نورما كاسىبي بوكسقا دەگەن سەنىمنىڭ نەگىزى ءارى سپورت الەمىنىڭ بارلىق وكىلدەرى ءۇشىن مىندەتتى دۇنيە ەكەنىن ايتتى.
ء«بىز جانىبەك ءالىمحان ۇلىنىڭ كاسىبي بەدەلىنە, ونىڭ كوپجىلدىق ەڭبەگىنە, ەڭ جوعارى دەڭگەيدەگى سپورتشىنىڭ ءومىر سالتىنا ۇلكەن قۇرمەتپەن قارايمىز. سول سەبەپتى ول ءادىل ءارى مۇقيات تەكسەرىستەن وتۋگە لايىقتى. ءوز مانسابى بويىنشا جانىبەك ءمىنسىز سپورت مادەنيەتىن كورسەتىپ كەلەدى, بىرنەشە مارتە سىنامادان ءوتتى جانە ءاردايىم ادال ءارى لايىقتى تۇردە جەتىستىككە جەتەتىن سپورتشى ەكەنىن دالەلدەگەن», دەدى راحىمجان ەردەنبەكوۆ الەۋمەتتىك جەلىدەگى جازباسىندا.
ول جاعدايدىڭ بارلىق اسپەكتىلەرى تولىق, جان-جاقتى ءارى وبەكتيۆتى زەرتتەلۋى كەرەك ەكەنىن ايتتى.
ر. ەردەنبەكوۆتىڭ سوزىنشە, قازاقستان كاسىبي بوكس فەدەراتسياسى حالىقارالىق ۇيىمدارمەن بايلانىستا جانە سپورتشىعا قاجەتتى بارلىق قۇقىقتىق, ۇيىمداستىرۋشىلىق جانە اقپاراتتىق قولداۋدى كورسەتۋگە دايىن. بارلىق قورىتىندىلار تەك وبەكتيۆتى دەرەكتەرگە نەگىزدەلۋى ءتيىس.
«قوعامدى, باق وكىلدەرىن جانە سپورت قاۋىمداستىعىن دۇرىس ءارى بايىپتى ارەكەت ەتۋگە شاقىرامىز. جانىبەك ءالىمحان ۇلى – تالاي جىل بويى ەلىمىزدىڭ اتىن الەمگە تانىتىپ جۇرگەن قازاقستان وكىلى. ول جورامالدارعا ەمەس, فاكتىلەرگە نەگىزدەلگەن ءادىل قاتىناسقا لايىق», دەدى قازاقستان كاسىبي بوكس فەدەراتسياسىنىڭ پرەزيدەنتى.
فەدەراتسيا جاعدايدىڭ دامۋ بارىسىن مۇقيات باقىلاپ, رەسمي راستالعان اقپارات تۇسكەن سايىن قوعامدى حاباردار ەتىپ وتىرادى.
ەل بوكسشىسى 12 قاراشا كۇنى دوپينگ سىناماسىن تاپسىرعان ەدى. كەيىنىرەك WBO جانىبەك الىمحان ۇلىنىڭ دوپينگ داۋىنا قاتىستى تەكسەرىستى باستادى.
ايتا كەتەيىك, 7 جەلتوقسان كۇنى وتانداسىمىز, كاسىپقوي بوكسشى جانىبەك ءالىمحان ۇلى ءۇش بەلبەۋ ءۇشىن كۋبالىق ەريسلاندي لاراعا قارسى تاريحي جەكپە-جەگىن وتكىزۋى كەرەك ەدى.
