سۋرەت: egov.kz
بۇگىندە سىرتتاي فورماتتا كۋالاندىرۋ 50-دەن استام نوزولوگيالىق نىسان نەگىزىندە جۇزەگە اسىرىلادى. بىلتىر 96,9 مىڭنان استام ءوتىنىم سىرتتاي فورماتتا قارالدى. بۇل – كۋالاندىرۋدان وتكەن مۇگەدەكتىگى بار ادامداردىڭ جالپى سانىنىڭ 37,4%-ى.
ۇلتتىق قوعامدىق سەنىم كەڭەسىنىڭ VI وتىرىسىندا مەملەكەت باسشىسى قاسىم-جومارت توقاەۆ ەرەكشە قاجەتتىلىكتەرى بار ادامدارعا بارىنشا قولايلى جاعداي جاساۋدى, ولاردى ينستانتسيالار مەن قاعازباستىلىقتان ارىلتىپ, كورسەتىلەتىن قىزمەتتى بەرۋشىلەردىڭ قىزمەت الۋشىلارمەن بايلانىسىن بولدىرماۋدى تاپسىردى. پرەزيدەنت جۇكتەگەن مىندەتتى ورىنداۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى دەنساۋلىق ساقتاۋ مەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرىمەن بىرلەسىپ ەلىمىزدىڭ بارلىق 20 وڭىرىندە قاناتقاقتى جوبا – مەديتسينالىق-الەۋمەتتىك ساراپتاما ء(ماس) جۇرگىزۋدىڭ سىرتتاي فورماتىن ىسكە قوستى.
مۇگەدەكتىك توبىن بەلگىلەۋ جونىندەگى قىزمەتتى الۋعا ءوتىنىش بەرۋشى تۇرعىلىقتى جەرىندەگى ەمحاناعا جۇگىنۋى, قاجەتتى تەكسەرۋدەن ءوتۋى قاجەت. قالعان ۇدەرىستەر اقپاراتتىق جۇيەلەردى ينتەگراتسيالاۋ ەسەبىنەن ونىڭ قاتىسۋىنسىز وتەدى.
سىرتتاي كۋالاندىرۋعا كوشۋدىڭ ناتيجەسىندە اكىمشىلىك, بيۋروكراتيالىق كەدەرگىلەر جويىلادى. ءماس ساراپتامالىق شەشىمدەرىنىڭ اشىقتىعىن قامتاماسىز ەتەدى. مۇگەدەكتىكتى بەلگىلەۋ مەن مۇگەدەكتىگى بار ادامداردى الەۋمەتتىك قورعاۋ شارالارىن انىقتاۋ قىزمەتتەرىن ۇيدەن شىقپاي-اق الۋعا مۇمكىندىك تۋادى. كورسەتىلەتىن قىزمەتتى الۋشىنىڭ ءتيىستى ورىن قىزمەتكەرىمەن تىكەلەي بايلانىسىن بولدىرمايدى, ناتيجەسىندە سىبايلاس جەمقورلىق تاۋەكەلى ازايادى.
