قازىردىڭ وزىندە توعىز وبلىستىڭ اكىمدىكتەرى بانكە 1 550 پاتەر تاپسىردى. ناتيجەسىندە, جاقىن ۋاقىتتا جامبىل, شىعىس قازاقستان, اقمولا, اقتوبە, جەتىسۋ, ۇلىتاۋ, قاراعاندى, اباي, قىزىلوردا وبلىستارىندا تۇرعىن ۇيگە كەزەكتە تۇرعان ادامدار قونىس تويىن تويلايدى.
جالدامالى تۇرعىن ءۇيدى ءبولۋ كەزىندە ەسەپكە الىنعان كۇنى, ساناتتىڭ باسىمدىعى, وتباسىنىڭ تابىس دەڭگەيى ەسكەرىلەدى. ەگەر وتباسىندا ءۇش, ودان كوپ ادام بولسا, ءبىر ادامعا شاققانداعى تابىس 92 456 تەڭگەدەن (2 اەك) اسپاۋعا ءتيىس. ەگەر وتباسىندا ەكى نەمەسە ودان از ادام بولسا, ءاربىر مۇشەسىنە شاققانداعى تابىس 161 798 تەڭگەدەن (3,5 اەك) اسپاۋى كەرەك.
بارلىق كەزەكتە تۇرعان ازاماتتار تۋرالى مالىمەتتەردى «وتباسى بانك» مەملەكەتتىك دەرەكتەر قورىنان الادى. بۇل ازاماتتارعا وتە ىڭعايلى – ەندى انىقتاما جيناپ, كوشىرمەلەرىن جاساپ, بولىمشەگە بارۋدىڭ نەمەسە پورتالعا جۇكتەۋدىڭ قاجەتى جوق. الايدا بانك دەرەكتەردى جەدەل تەكسەرىپ, تۇرعىن ءۇيدى ءادىل بولە الۋى ءۇشىن ازاماتتار جەكە دەرەكتەردى جيناۋعا, وڭدەۋگە كەلىسىم بەرۋگە ءتيىس. كەلىسىمدى orken.otbasybank.kz پورتالىنداعى جەكە كابينەت ارقىلى راسىمدەۋ قاجەت. سونىمەن قاتار ازاماتتار وزدەرىنىڭ ءموبيلدى ازاماتتار بازاسىنداعى تەلەفون ءنومىرىن جاڭارتۋى كەرەك.
ەگەر تۇرعىن ءۇي كەزەگىندە تۇرعان ازامات جەكە دەرەكتەرىن جيناۋعا, وڭدەۋگە كەلىسىم بەرمەسە, ءموبيلدى ءنومىرىن جاڭارتپاسا, جالدامالى تۇرعىن ءۇي الا المايدى نەمەسە 2%, 5% جەڭىلدىك مولشەرلەمەسىمەن تۇرعىن ءۇي ساتىپ الۋ مۇمكىندىگىنەن ايىرىلادى. مۇنداي جاعدايدا وعان تيەسىلى تۇرعىن ءۇي كەزەكتە تۇرعان باسقا ازاماتقا بەرىلەدى. قازىردە اكىمدىكتەردىڭ Kezekte.kz بازاسىنان «وتباسى بانككە» وتكەن 642 281 كەزەكتە تۇرعان ازاماتتىڭ ىشىندە بار بولعانى 84 338 ادام عانا جەكە دەرەكتەرىن وڭدەۋگە كەلىسىم بەرگەن. بۇل نەبارى 13%.
وسىنىڭ سالدارىنان اۆتوماتتاندىرىلعان جۇيە تۇرعىن ۇيگە مۇقتاج ازاماتتار تۋرالى دەرەكتەردى تولىق تەكسەرە الماي وتىر, تۇرعىن ءۇيدى ءبولۋ ۇدەرىسى باياۋ ءجۇرىپ جاتىر. جاقىندا وڭىرلەردىڭ بىرىندە وتكىزىلگەن قاناتقاقتى جوبا بۇل جاعدايدى ايقىن تانىتتى. اكىمدىك 261 پاتەر ۇسىنعان بولاتىن. 215 پاتەر تۇرعىن ءۇي كەزەگىندە تۇرعان ازاماتتارعا ءبولىندى. الايدا ولاردىڭ اراسىنان بار بولعانى 19 ادام عانا orken.otbasybank.kz پلاتفورماسىندا جەكە دەرەكتەردى جيناۋعا, وڭدەۋگە كەلىسىم بەرگەن. قازىردە بۇل ازاماتتار جالداۋ شارتىن جاساسىپ جاتىر. قالعان 196 ازاماتقا قاتىستى بانك ولاردىڭ كەلىسىمىن كۇتىپ وتىر. بوس پاتەرلەر كەلەسى كەزەڭدە بولىنەتىن بولادى.
تۇرعىن ءۇيدى ءبولۋ ۇدەرىسىن جەدەلدەتۋ ماقساتىندا «وتباسى بانك» بۇرىن Kezekte.kz بازاسىندا تىركەلگەن ازاماتتاردى orken.otbasybank.kz پورتالىندا جەكە دەرەكتەردى جيناۋعا, وڭدەۋگە كەلىسىم بەرۋگە, سونداي-اق ءموبيلدى ازاماتتار بازاسىنداعى تەلەفون ءنومىرىن جاڭارتۋعا شاقىرادى. بۇل شارالار تۇرعىن ءۇي كەزەگىنىڭ جىلجۋىن تەزدەتىپ, مىڭداعان وتانداسىمىزدىڭ قونىس تويىن جاقىنداتۋعا مۇمكىندىك بەرەدى.
