ءىس-شاراعا قۇرلىق اسكەرلەرىنىڭ باسشىلىعى, قارۋلى كۇشتەردىڭ ارداگەرلەرى, استانالىق قورعانىس ىستەرى جونىندەگى دەپارتامەنتىنىڭ وكىلدەرى جانە ساربازداردىڭ اتا-انالارى مەن جاقىندارى دا قاتىستى.
استانالىق 68665 اسكەري ءبولىمى جاس ورەندەرى ءداستۇر بويىنشا «وتان انا» مونۋمەنتىنە گۇل شوقتارىن قويىپ, قاتىسۋشىلار قازاق جاۋىنگەرلەرىنىڭ ەرلىگىن ءبىر مينۋت ۇنسىزدىكپەن ەسكە الدى.
سالتاناتتى ءىس-شارادا اسكەر قاتارىنا ەندى قوسىلعان جاس ساربازدار قۇرلىق اسكەرلەرى باس شتابىنىڭ باستىعى – باس قولباسشىنىڭ ءبىرىنشى ورىنباسارى گەنەرال-مايور قۋانىشبەك ۇشتاەۆ قۇتتىقتادى.
– بۇل ءراسىم ەل ءۇشىن دە ەرەكشە كۇن. وسىلايشا ساربازدار وتان الدىندا انت بەرىپ, حالقىمىزدىڭ تىنىشتىعى مەن قاۋىپسىزدىگىن قورعاۋعا ۇلكەن قادام جاسايدى. انت – جاي ءسوز ەمەس, بۇل ءاربىر ەرازاماتتىڭ ومىرلىك قاعيداتى, ابىرويى مەن قادىر-قاسيەتى. اسكەري قىزمەت بەرىك تاربيە جانە بولاشاق جەتىستىكتەردىڭ باستاۋى بولادى, – دەدى ول.
جاس ساربازدار استانالىق بريگاداعا ەلىمىزدىڭ ءار وڭىرىنەن كەلگەن. سولاردىڭ ءبىرى تۇركىستان وبلىسىنىڭ ازاماتى ەرنۇر دوسىمحان اسكەرگە ءوز ەركىمەن شاقىرىلعانىن ايتتى.
– كوپبالالى وتباسىنانمىن, ون ءۇش باۋىرىم بار. ارينە, ولاردى ساعىندىم, دەگەنمەن اسكەري تاجىريبە مەنىڭ بولاشاق ومىرىمە نىق قادام بولاتىنىنا سەنەمىن. وسى ساتكە – انت قابىلداۋعا قاتارلاستارىممەن بارىنشا دايىندالدىق. جاس جاۋىنگەر كۋرسىندا كوپ نارسە ۇيرەندىم جانە اسكەردىڭ تىنىس-تىرشىلىگىنە ەتىم ۇيرەنىپ قالدى, – دەيدى سارباز.
انت قابىلداعاننان كەيىن ساربازدار الاڭدا سالتاناتتى مارش جاساپ, اسكەري-پاتريوتتىق اندەردى ورىندادى. اسكەري جيىندا 68665 اسكەري ءبولىمنىڭ ەكى وفيتسەرىنە – كاپيتان سۇڭعات قابدىروۆقا جانە اعا لەيتەنانت ەرنار كەنجەبايعا قارۋلى كۇشتەردىڭ ارداگەرى گەنەرال-مايور ءاليحان جاربولوۆ مەرەيتويلى مەدالىن تاپسىردى.
ودان كەيىن قويان-قولتىق ۇرىس ەلەمەنتتەرىنىڭ كورسەتىلىمى جانە قۇرمەت قاراۋىل روتاسىنىڭ اسكەري دەفيلە كورسەتۋىمەن اياقتالدى.
