ج.ءابدىلديننىڭ باسشىلىعىمەن بۇرىنعى كەڭەس وداعىنا جانە شەتەلدەرگە كەڭىنەن تانىمال فيلوسوفيالىق مەكتەپ قالىپتاستى. تۋعان ەلىنە ازاماتتىق بەرىك ۇستانىمىمەن دە, عىلىم جولىنداعى قابىلەت-قارىمىمەن دە ايانباي قىزمەت ەتتى. سوڭىندا وشپەيتىن ونەگەلى, ايشىقتى ءىزى قالدى.
ج.ءابدىلديننىڭ عىلىمي ەڭبەكتەرى, نەگىزىنەن, ديالەكتيكالىق لوگيكانىڭ وزەكتى ماسەلەلەرىن زەرتتەۋگە ارنالدى. ونىڭ باسقارۋىمەن وسى باعىتتا ۇجىمدىق مونوگرافيالار جارىق كوردى. ديالەكتيكانىڭ عىلىمي جۇيەسى جاسالدى. ول قازىرگى جاراتىلىستانۋ عىلىمدارىنىڭ مەتودولوگيالىق ماسەلەلەرىمەن ۇشتاستىرىلدى.
ۋنيۆەرسيتەتىمىزدىڭ پروفەسسورى جابايحان مۇباراك- ۇلىنىڭ فيلوسوفيانىڭ ىرگەلى ماسەلەلەرى – تانىم تەورياسىن, ديالەكتيكانىڭ امبەباپ زاڭدىلىقتارى مەن كاتەگوريالارىن, ونىڭ ىشكى لوگيكالىق بايلانىستارى مەن ادىستەمەسىن, الەمدىك فيلوسوفيا تاريحىن, ونىڭ باستى وكىلدەرىنىڭ كوزقاراستارىن ستۋدەنت-جاستار قاۋىمى ىجداعاتپەن وقىپ-ۇيرەندى.
قايراتكەر ج.ءابدىلدين ازامات رەتىندە جازىقسىز قۇربان بولعان الاش ارىستارىن اقتاۋ جونىندەگى كوميسسيانى باسقارىپ, ولاردىڭ اقتالىپ, ەڭبەكتەرىنىڭ جارىق كورۋىنە ايرىقشا اتسالىستى. شاكارىم, ماعجان, جۇسىپبەك, احمەت پەن مىرجاقىپتى تۋعان حالقىمەن قايتا قاۋىشتىرىپ, شىعارماشىلىق مۇرالارىنىڭ ەل يگىلىگىنە اينالۋىنا سەبەپكەر بولدى. ەلى, جەرى, ءتىپتى كۇللى ادامزات ءۇشىن دە تىندىرعان ءىسى زور دەسەك, ارتىق ايتپايمىز. بىرەگەي جاراتىلعان, داڭعازا مەن داقپىرتقا, داندايسۋعا جانى قاس ازامات ەدى. قاي ىستە دە ار مەن ادالدىقتى, سابىر مەن سالماقتىلىقتى بيىك قوياتىن.
جابايحان ءابدىلدين – ادامزات پەن عالامزاتتىڭ دارا قۇبىلىسى. وتاندىق فيلوسوفيا عىلىمىنىڭ دامۋىنا, تاۋەلسىز ەلىمىزدىڭ وركەندەۋىنە ولشەۋسىز ۇلەس قوسقان زيالى تۇلعا ەدى. ول شىن مانىندە كىسىلىك پەن دانالىقتىڭ ۇلگىسىندەي, ادىلدىكتىڭ تارازىسىنداي ابىز اقساقالىمىز بولاتىن.
ادامگەرشىلىك قاسيەتى مول, جانى جايساڭ, جۇرەگى كىرشىكسىز ابزال ازاماتتىڭ ەلگە سىڭىرگەن ەڭبەگى مەن جارقىن ديدارىن حالقىمىز ءاردايىم جادىندا ساقتايدى دەپ سەنەمىز. ونىڭ عىلىمداعى مول مۇراسى مەن عيبراتتى عۇمىرى كەيىنگى ۇرپاققا ۇلگى بولىپ قالا بەرمەك.
ل.ن.گۋميلەۆ اتىنداعى ەۇۋ ۇجىمى
