ءىس-شارادا العاش ءسوز العان ءوڭىر باسشىسىنىڭ ءبىرىنشى ورىنباسارى نۇرجان كالەندەروۆ داڭقتى تۇلعانىڭ سوعىس دالاسىنداعى ەرلىگى مەن بەيبىت كۇندەگى قايراتكەرلىك قىرى قاي كەزدە دە ۇلت پەن ۇرپاق جادىنان وشپەيتىنىن تىلگە تيەك ەتتى.
«ەر باۋكەڭنىڭ ءور مىنەزى تۋرالى ەستەلىك از ايتىلمايدى. ول كىسىنىڭ باتىرلىعىن, مايدان دالاسىنداعى تاپقىرلىعىن زامانداستارى لايىقتى باعالاعانى دا ءمالىم. باۋكەڭنىڭ قالامگەرلىك قىرى دا ءبىر توبە ەكەنى بەلگىلى. تۇتاس قازاقتىڭ ماقتانىشىنا اينالعان تاۋ تۇلعانىڭ ەسىمى قازاق حالقىمەن بىرگە جاسايتىنىنا ەشكىمنىڭ كۇمانى جوق.
وڭىرىمىزدە 3 ەلدى مەكەن, 45 كوشە, 7 مەكتەپ جانە ساياباق پەن مۋزەي باۋىرجان مومىش ۇلىنىڭ ەسىمىمەن اتالادى. تارلان-بوز تۇلعانىڭ ەسىمى بىرنەشە ءبىلىم ورداسىنا بەرىلۋى – ۇلت قاھارمانىنا دەگەن قۇرمەتتىڭ بەلگىسى. باتىردىڭ ەرلىگى مەن ورلىگىن, وزىنە عانا ءتان دارا جولىن قانشا دارىپتەسەك تە ارتىقتىق ەتپەيدى», دەدى ن.كالەندەروۆ ءوز ويىمەن ءبولىسىپ.
قازاقستاننىڭ ەڭبەك سىڭىرگەن قايراتكەرى ورىنشا قارابالينانىڭ ءسوزى ايرىقشا تولعانىسقا تولى بولعانى ءسوزسىز.
«1952 جىلى ۋنيۆەرسيتەتتى ءبىتىرىپ, مۇعالىم ماماندىعى بويىنشا جۇمىسقا ورنالاستىم. ال مەنىڭ جۇرەگىمدى جاۋلاعان ازامات, باتىر تۋعان ىنىسىندەي قۇرمەتتەيتىن كاكىمجان قازىباەۆ رەسپۋبليكالىق «لەنينشىل جاس» گازەتىنە جۇمىسقا قابىلداندى. ول گازەتتە قازىر ءبىز ارداقتاپ وتىرعان باتىر اتامىزدىڭ جارى دا جۇمىس ىستەدى. باتىردىڭ ەرلىگى مەن ونەگەلى ىستەرى تۋرالى ءبىز ەڭ العاش جارىنان ەستىپ بىلدىك.
1956 جىلى باۋىرجان مومىش ۇلى اتامىز اسكەري قىزمەتىن ءبىرجولاتا اياقتاپ, الماتىعا ورالدى. سول جىلى كاكىمجان ەكەۋمىز شاڭىراق كوتەردىك. باۋكەڭ اتانىڭ ۇيىنە جۇرەكسىنە باردىم. ول جاس وتاۋ بولعانىمىزعا قۋانىپ, قۇتتىقتاپ, ەرەكشە پەيىلىن كورسەتتى. سول ۇيدە ءبىراز بىرگە تۇردىق. باتىردىڭ ۇيىنە قوناق وتە كوپ كەلەتىن. ءۇيدىڭ ەسىگى ۇنەمى اشىق تۇرادى. قوناقتاردىڭ بارلىعىن ءبىرىنشى قارسى الىپ, باتىردىڭ بولمەسىنە ەرتىپ اپاراتىن ەدىم.
كەڭەس وداعىنىڭ باتىرى مالىك عابدۋللين باۋكەڭە امانداسۋعا كەلەتىن-ءدى. گەنەرال پانفيلوۆتىڭ قىزى ۆاليا دا ءجيى كەلەتىن. ول قىزعا اتامىز ەرەكشە قۇرمەت كورسەتەتىن. كۇيەۋىم كاكىمجان قازىباەۆ باتىردىڭ «وفيتسەر كۇندەلىگى» اتتى ۇزاق ەڭبەگىن ورىس تىلىنەن قازاقشاعا اۋداردى. ول جازبا «لەنينشىل جاس» گازەتىنىڭ بىرنەشە نومىرىندە جاريالاندى. «لەنينشىل جاس» گازەتىنىڭ ۇجىمىمەن ايگىلى باتىر توننىڭ ىشكى باۋىنداي ارالاستى. ونداعى جۋرناليستەر باۋكەڭ باتىردىڭ ىنىسىندەي بولىپ كەتتى. ول كىسىنىڭ مايدان تۋرالى, سوعىس زاردابى تۋرالى اڭگىمەلەرى وتە اسەرلى بولاتىن.
باتىر اتامىز راحىمجان قوشقارباەۆتى ەرەكشە قۇرمەتتەدى. ونى كوزىمىز كوردى. باتىردىڭ رۋحىنا ارنالعان وسىناۋ كونفەرەنتسيانى وتكىزگەن وبلىس اكىمدىگىنە, جامبىلدىق زيالى قاۋىمعا, جينالعان كوپشىلىككە شەكسىز العىسىمدى بىلدىرەمىن», دەدى ول.
ءىس-شاراعا قاتىسقان گەنەرالدار سەيتجان قويباقوۆ پەن نۇرجان جىگىتەكوۆ تە ىزگى تىلەكتەرىن ايتتى. س. قويباقوۆتىڭ ايتۋىنشا, اتى اڭىزعا اينالعان تۇلعانىڭ 115 جىلدىعىنا وراي «باتىردىڭ التىن بەسىگى – جۋالى» دەگەن كىتاپ جازىپتى.
جيىنعا جينالعان مارتەبەلى مەيمانداردىڭ بارلىعى داڭقتى تۇلعانىڭ بولمىسى, كىسىلىگى, ەرلىگى تۋرالى ەستى ەستەلىگىمەن ءبولىستى. ءىس-شارا سوڭىندا مەكتەپ وقۋشىلارى مەن وبلىستىق فيلارمونيانىڭ انشىلەرى اننەن شاشۋ شاشتى.
تاراز
