ءىس-شارانىڭ ماڭىزدىلىعى قازاقستان مەن ەۋروپالىق وداق جانە ونىڭ مۇشە مەملەكەتتەرى اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمگە قول قويىلۋىنىڭ 10 جىلدىعىنا وراي وتكىزىلۋىمەن ەرەكشە ايشىقتالدى.
تاراپتار استانا مەن بريۋسسەل اراسىنداعى ستراتەگيالىق سەرىكتەستىكتىڭ ون جىلدىق ناتيجەلەرىن قورىتىندىلاپ, ونىڭ بولاشاقتاعى دامۋى جونىندەگى كوزقاراستارىمەن ءبولىستى.
وتىرىس بارىسىندا ەكونوميكالىق بايلانىستار ىنتىماقتاستىقتىڭ نەگىزگى قوزعاۋشى كۇشى بولىپ قالا بەرەتىنى ايتىلدى. سەبەبى ەۋروپالىق وداق ەلىمىزدىڭ ەڭ ءىرى ساۋدا جانە ينۆەستيتسيالىق سەرىكتەسى مارتەبەسىن ساقتاپ وتىر. وتكەن جىلى ءوزارا تاۋار اينالىمى 50 ملرد دوللارعا جاقىندادى, ال ەۋروپالىق ينۆەستيتسيالاردىڭ جالپى اعىنى 200 ملرد دوللارعا جەتتى. ءبىزدىڭ ەلدە ەۋروپالىق قاتىسۋى بار 4 مىڭنان استام كومپانيا جۇمىس ىستەيدى. سىرتقى ىستەر ءمينيسترى ساۋدانى ودان ءارى ارتاراپتاندىرۋعا دايىن ەكەنىن جەتكىزىپ, وتاندىق اۋىل شارۋاشىلىعى ونىمدەرىنىڭ ەو نارىعىنا قول جەتكىزۋىن كەڭەيتۋدىڭ ماڭىزدىلىعىن اتاپ ءوتتى.
ەرەكشە نازار ترانسكاسپي حالىقارالىق كولىك باعدارىن («ورتا ءدالىز») دامىتۋ ماسەلەسىنە اۋدارىلدى. عالامدىق جەتكىزۋ تىزبەكتەرىنىڭ ترانسفورماتسياسىن ەسكەرە وتىرىپ, تاراپتار بۇل باعىتتىڭ ەۋروپا مەن ازيا اراسىنداعى سەنىمدى ءارى تۇراقتى كولىك ءدالىزى رەتىندەگى ستراتەگيالىق ماڭىزىن راستادى. قازاقستان بۇل كوريدوردى ودان ءارى دامىتۋ ءۇشىن ەو جانە وڭىرلىك سەرىكتەستەرمەن ىنتىماقتاستىقتى تەرەڭدەتۋگە دايىن ەكەنىن جەتكىزدى.
جەكە باعىت رەتىندە «جاسىل» جانە تسيفرلىق ترانسفورماتسيا سالاسىنداعى ءوزارا ءىس-قيمىل تالقىلاندى. تاراپتار بۇل باعىتتىڭ قازاقستان ەكونوميكاسىنىڭ جاڭعىرتىلۋىنا جانە ەۋروپانىڭ ونەركاسىپتىك تۇراقتىلىعىنا بىردەي ۇلەس قوساتىن پەرسپەكتيۆالى سالا ەكەنىن اتاپ ءوتتى.
وتىرىسقا قاتىسۋشىلار پارلامەنتتىك ىنتىماقتاستىقتىڭ ماڭىزىنا دا توقتالىپ, قاراشا ايىندا بريۋسسەلدە وتكەن «قر – ەو» پارلامەنتتىك ىنتىماقتاستىق كوميتەتىنىڭ 22-وتىرىسىنىڭ تابىستى وتكەنىن جوعارى باعالادى.
ادامدار اراسىنداعى بايلانىستاردى كەڭەيتۋگە ەرەكشە نازار اۋدارىلدى. تاراپتار 2 جەلتوقساندا بريۋسسەلدە قازاقستان ازاماتتارى ءۇشىن ەو ۆيزالىق رەجىمىن جەڭىلدەتۋ جانە رەادميسسيا تۋرالى كەلىسسوزدەردى باستاۋدى قۇپتادى. بۇل قادام گۋمانيتارلىق بايلانىستاردى نىعايتۋعا, ستۋدەنتتەر, عالىمدار مەن كاسىبي ماماندار ءۇشىن مۇمكىندىكتەردى كەڭەيتۋگە, سونداي-اق ازاماتتاردىڭ موبيلدىگىن ارتتىرۋعا ەلەۋلى ۇلەس قوسادى.
وتىرىس بارىسىندا دەلەگاتسيا باسشىلارى قازاقستان مەن ەۋروپالىق وداقتىڭ كەمەلدەنگەن, ورنىقتى جانە بولاشاققا باعىتتالعان سەرىكتەستىك قۇرا العانىن اتاپ ءوتتى. 29 نەگىزگى ءوزارا ءىس-قيمىل باعىتىن قامتيتىن كەڭەيتىلگەن سەرىكتەستىك پەن ىنتىماقتاستىق تۋرالى كەلىسىم وسى جىلدار ىشىندە ءوز تيىمدىلىگى مەن وزەكتىلىگىن كورسەتىپ, ىنتىماقتاستىق پەن ءوزارا سەنىمدى نىعايتۋدىڭ بەرىك نەگىزىنە اينالدى.
كەزدەسۋ سوڭىندا ە.كوشەرباەۆ پەن ك.كاللاس ساياسي ديالوگتى ودان ءارى نىعايتۋعا, ساۋدا مەن ينۆەستيتسيالاردى دامىتۋعا, وڭىرلىك ءوزارا بايلانىستىلىقتى ارتتىرۋعا جانە گۋمانيتارلىق سالاداعى ىنتىماقتاستىقتى تەرەڭدەتۋگە بەيىلدى ەكەنىن راستادى.
