وتباسىنىڭ تسيفرلىق كارتاسى (وتسك) مەملەكەتتىك ورگانداردىڭ قولدانىستاعى بارلىق اقپاراتتىق جۇيەلەرىنىڭ دەرەكتەرى نەگىزىندە قالىپتاستىرىلادى. ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, وندا ەلىمىزدىڭ 20 ملن ازاماتى نەمەسە 6,2 ميلليوننان استام وتباسى تۋرالى اقپارات جيناقتالعان.
وتسك ەنگىزۋدىڭ باستى ماقساتى – وتانداستاردىڭ مەملەكەتتىك قولداۋ جۇيەسىنە تەڭ قولجەتىمدىلىگىن قامتاماسىز ەتۋ. الەۋمەتتىك كودەكستە وتباسىنىڭ تسيفرلىق كارتاسى الەۋمەتتىك ساياساتتىڭ ورتا ءارى ۇزاق مەرزىمدى مىندەتتەرى مەن باعىتتارىن ايقىنداۋ قۇرالى رەتىندە بەلگىلەنگەن. سونداي-اق وتسك ازاماتتاردىڭ الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋدىڭ قانداي دا ءبىر ءتۇرىن الۋعا قۇقىلى ەكەندىگىن ايقىندايتىن «ەلەكتروندىق حابارلاما».
بۇگىندە مەملەكەتتىك قولداۋ شارالارىن الۋعا قۇقىعى بار ازاماتتار قانداي دا ءبىر ءوتىنىش جولداماي-اق وتسك ارقىلى جاردەماقىلار مەن الەۋمەتتىك تولەمدەردىڭ 11 ءتۇرىن راسىمدەي الادى. اتاپ ايتقاندا, ەڭبەك ەتۋ قابىلەتىنەن ايىرىلعان جاعدايدا الەۋمەتتىك تولەم; جۇمىسىنان ايىرىلعان جاعدايدا الەۋمەتتىك تولەم, اسىراۋشىسىنان ايىرىلۋىنا قاتىستى الەۋمەتتىك تولەم; بالا تۋ مەن كۇتىمىنە جاردەماقى, مۇگەدەكتىگى بار بالانى تاربيەلەپ وتىرعان اتا-اناسىنا (قامقورشىسىنا) جاردەماقى, مۇگەدەكتىگى جونىندەگى جاردەماقى, كوپبالالى وتباسىلارعا بەرىلەتىن جاردەماقى, «التىن القا», «كۇمىس القامەن» ماراپاتتالعان كوپبالالى انالارعا بەرىلەتىن جاردەماقى, اتاۋلى الەۋمەتتىك كومەك, جەرلەۋگە ارنالعان بىرجولعى تولەم.
سونداي-اق وتسك ارقىلى زەينەتاقى تولەمدەرىن الۋ, «قانداس» مارتەبەسى بەرىلگەندە نەمەسە ۇزارتىلعاندا مارتەبەنىڭ اياقتالۋ مەرزىمى, جۇمىسسىز ادامدارعا جۇمىسپەن قامتۋ شارالارى تۋرالى اۆتوماتتى حابارلامالار جولدانادى.
مەملەكەتتىك قولداۋ شارالارىن الۋعا قۇقىق بەلگىلەنگەن كەزدە الەۋەتتى الۋشىعا 1414 بىرىڭعاي بايلانىس ورتالىعىنان SMS-حابارلاما جىبەرىلەدى. حابارلاما العان ازامات وعان كەلىسىمى تۋرالى جاۋاپ قايتارۋى كەرەك. ءوتىنىشتى راسىمدەپ, الەۋمەتتىك جاردەماقى نەمەسە تولەم تاعايىنداۋ اۆتوماتتى رەجىمدە ىسكە اسىرىلادى. سودان كەيىن اقشا قاراجات الۋشىنىڭ بانك شوتىنا اۋدارىلادى. ءتيىستى ورىندار الاياقتىق تاۋەكەلىن بولدىرماۋ ماقساتىندا 1414 بىرىڭعاي بايلانىس ورتالىعىنان كەلىپ تۇسكەن SMS-كە جاۋاپ بەرۋ قاجەتتىگىن ەسكەرتەدى.
