– ايمان عالىمجانقىزى, اۋرۋحانانىڭ بۇگىنگى بەت-بەينەسىنەن بۇرناعى جىلدارعا قاراعاندا ەداۋىر وزگەشەلىك بارى بايقالادى. جاڭعىرۋ كەزەڭى قالاي باستالدى؟
– اۋرۋحانانىڭ جۇيەلى ترانسفورماتسياسى شامامەن جەتى جىل بۇرىن قولعا الىندى. سول كەزدە قالا حالقىنىڭ ءوسۋى, مەديتسينالىق قىزمەتتىڭ كۇردەلەنۋى, جاڭا تەحنولوگيالارعا دەگەن سۇرانىس ايقىن سەزىلدى. زاماناۋي كوپسالالى ورتالىق قۇرۋ قاجەتتىلىگى تۋىندادى. سوندىقتان ەڭ الدىمەن ينفراقۇرىلىمدى قايتا قاراپ, پاتسيەنتتەردى قابىلداۋ جۇيەسىن جاڭارتۋ, ماتەريالدىق-تەحنيكالىق بازانى كۇشەيتۋ جۇمىسى باستالدى. بۇل قادامدار كەيىنگى جاڭارۋلاردىڭ بارلىعىنا بەرىك نەگىز قالادى. ەڭ ماڭىزدى وزگەرىستەردىڭ ءبىرى – دياگنوستيكا سالاسىنداعى سەرپىلىس. قالادا قازىرگى زامانعى ماگنيتتىك-رەزونانستىق توموگراف ىسكە قوسىلىپ, تۇرعىندار بۇرىن سىرتقا جۇگىنەتىن جوعارى دالدىكتى زەرتتەۋلەردى ەندى ءوز قالاسىندا الا الادى. دياگنوستيكانىڭ بۇل ءتۇرى دارىگەرلەرگە اۋرۋدى ەرتە انىقتاۋعا, ەمدەۋ تاكتيكاسىن ناقتىلاۋعا ۇلكەن مۇمكىندىك بەردى.
سونىمەن قاتار زاماناۋي ەندوسكوپيالىق ورتالىق اشىلدى. جوعارى مۇمكىندىككە يە ەندوسكوپيالىق جۇيەلەر ءتۇرلى ورگانداردىڭ پاتولوگيالارىن ەرتە كەزەڭدە انىقتاۋعا, از ءينۆازيۆتى ارالاسۋلاردى قاۋىپسىز ورىنداۋعا جول اشتى. جەدەل كومەك كورسەتۋ الگوريتمدەرى جەتىلدىرىلدى, قابىلداۋ ءبولىمى, ستاتسيونارلىق بلوكتار جاڭارتىلىپ, پاتسيەنتتەردىڭ جايلىلىعى ارتتى. ينسۋلتتان نەمەسە وپەراتسيادان كەيىن قالپىنا كەلۋدى قاجەت ەتەتىن ناۋقاستارعا ارنالعان رەابيليتاتسيالىق ءبولىمنىڭ دامۋى دا ءبىزدىڭ باستى مىندەتتەردىڭ ءبىرى.
– مەديتسينالىق كومەك كورسەتۋدە تەحنيكالىق جاراقتانۋ دەڭگەيىنىڭ ماڭىزى زور دەسەك, بۇل باعىتتا قانداي جۇمىس اتقارىلدى؟ كادر بىلىكتىلىگىن ارتتىرۋ جايىن تارقاتا كەتسەڭىز.
– كەيىنگى التى جىلدا اۋرۋحانانىڭ تەحنيكالىق مۇمكىندىكتەرى تۇبەگەيلى جاڭارتىلدى. دياگنوستيكالىق, حيرۋرگيالىق, رەانيماتسيالىق باعىتتاردا زاماناۋي اپپاراتتار ورناتىلدى. بۇل – جابدىقتى جاڭارتۋ عانا ەمەس, مەديتسينالىق قىزمەت ساپاسىن جاڭا دەڭگەيگە شىعارۋ. دياگنوستيكا دالدىگى ارتتى, كۇردەلى جاعدايلاردى باقىلاۋ جەڭىلدەدى, جوسپارلى دا, شۇعىل دا كومەك كورسەتۋ سەنىمدىرەك بولا ءتۇستى.
مۇندا تراۆماتولوگيا, ورتوپەديا, جالپى جانە جاق-بەت حيرۋرگياسى باعىتتارىندا كۇردەلى وپەراتسيالار ءساتتى جاسالادى. اتاپ ايتقاندا, تىزە بۋىنىنداعى ارتروسكوپيالىق ارالاسۋلار – مەنيسك رەزەكتسياسى, الدىڭعى ايقاسپا بايلامىن قالپىنا كەلتىرۋ, سۇيەك سىنىقتارىندا بلوكتى وستەوسينتەز تاسىلدەرى قولدانىلادى. سونىمەن قاتار جاق-بەت ايماعىنداعى رەكونسترۋكتيۆتى وپەراتسيالار, جەرگىلىكتى تىندەرمەن پلاستيكالىق تۇزەتۋلەر كەڭىنەن جۇزەگە اسىرىلىپ جاتىر. جەدەل سوقىرشەك پەن ءوت-تاس اۋرۋلارىنا جاسالاتىن ەندوسكوپيالىق وپەراتسيالار, سونداي-اق قازىرگى تالاپتارعا ساي جەلىمەن جاسالاتىن جارىق پلاستيكاسى دا جولعا قويىلعان.
اۋرۋحانادا حيرۋرگتەر, تراۆماتولوگتەر, ورتوپەدتەر, نەيروحيرۋرگتەر, جاق-بەت حيرۋرگى سەكىلدى سان ءتۇرلى سالا ماماندارى ەڭبەك ەتەدى. سۇيەك سىنىقتارىندا بلوكتالاتىن وستەوسينتەزدەر, تىزە بۋىنىندا ارتروسكوپيالىق ەمدەۋ ادىستەرى, جالعان بۋىنداردى ەمدەۋ, كۇيىك پەن جاراقاتتان كەيىنگى اۋتودەرموپلاستيكا – ءبارى دە وسى مەكەمەنىڭ كۇندەلىكتى تاجىريبەسىنە اينالعان. رەكونسترۋكتيۆتى حيرۋرگيانىڭ كەڭ سپەكترى حالىق دەنساۋلىعىنا سەنىمدى تىرەك بولىپ وتىر.
مەديتسينالىق مەكەمەدە تالاي جىلدان بەرى ەل قۇرمەتىنە بولەنگەن, جاس ماماندارعا ۇلگى بولارلىق تاجىريبەلى دارىگەرلەر توبى جۇمىس جاسايدى. ولاردىڭ قاتارىندا رينات اجىبيەۆ, ءزۇبايرا سارسەنوۆا, گۇلنارا بوپەشباەۆا, تامارا قاليلاەۆا, كۇلبانۋ بەكماعامبەتوۆا سىندى ابىرويلى ماماندار بار. سونىمەن بىرگە جاڭا كوزقاراسىمەن, تىڭ سەرپىنىمەن تانىلىپ كەلە جاتقان جاس دارىگەرلەر دە از ەمەس.
بيىلعى جۇمىسشى ماماندىقتارى جىلى اياسىندا ورتا مەديتسينالىق قىزمەتكەرلەردىڭ ەڭبەگى لايىقتى باعالانىپ, ارنايى ماراپاتتارعا يە بولدى. ۇلتتىق, كاسىبي مەرەكەلەردە تۇراقتى تۇردە سىياقى الىپ, ديففەرەنتسيالدى قولداۋ شارالارىمەن قامتىلدى. بۇل – ولاردىڭ ەڭبەگىن جوعارى باعالاناتىنىنىڭ ايقىن دالەلى.
اۋرۋحاناعا بۇگىنگى كۇنى 80 مىڭعا جۋىق تۇرعىن تىركەلگەن. كەيىنگى 10 ايدا حالىقتىڭ 90%-ى مەديتسينالىق كومەككە جۇگىنگەن. كۇن سايىن قابىلداۋ بولىمىنە شامامەن 120 ادام كەلەدى, تۋريستىك ماۋسىمدا بۇل كورسەتكىش 70–80%-عا ارتادى.
كادرلار – بارلىق تەحنيكالىق مۇمكىندىكتىڭ نەگىزىن قۇرايتىن باستى رەسۋرس. سول تۇرعىدا مامانداردىڭ كاسىبي دەڭگەيىن ارتتىرۋ تۇراقتى تۇردە جۇرگىزىلىپ كەلەدى. دارىگەرلەر ەلىمىزدەگى, شەتەلدەگى جەتەكشى ورتالىقتاردا تاجىريبەدەن ءوتىپ, جاڭا تەحنولوگيالاردى مەڭگەرىپ جاتىر. اۋرۋحانادا ىشكى وقىتۋ جۇيەسى قالىپتاسىپ, جاس ماماندارعا اعا بۋىن تاراپىنان تالىمگەرلىك قولداۋ كورسەتىلەدى. قىزمەتكەرلەردىڭ كاسىبي دامۋى ۇزدىكسىز جۇرۋىنە بارلىق جاعداي جاسالعان.
دەنساۋلىق ساقتاۋ سالاسىنداعى وڭ وزگەرىستەردى ەمدەلۋشىلەر دە ايقىن سەزىنىپ كەلەدى. باستى وزگەرىس – قولجەتىمدىلىك پەن ساپانىڭ قاتار ءوسۋى. زەرتتەۋلەرگە جازىلۋ جۇيەسى جەڭىلدەدى, دياگنوستيكا ۋاقىتى قىسقاردى, قابىلداۋ بولىمىندەگى قىزمەت كورسەتۋ جىلدامىراق ءارى تيىمدىرەك بولدى. ستاتسيونار جاعدايى جاقسارىپ, پاتسيەنتتەرگە جايلى ءارى قاۋىپسىز ورتا قالىپتاستى. ەڭ باستىسى – تۇرعىندار قاجەت قىزمەتتىڭ باسىم بولىگىن ءوز قالاسىندا الا الادى. تەلەمەديتسينا قىزمەتىن ەنگىزۋ ارقىلى الىس ايماق تۇرعىندارىنا دا كەڭەس بەرۋ مۇمكىندىگى قاراستىرىلدى.
– ءسوز سوڭىندا اۋرۋحانانىڭ باسىم باعىتتارى مەن الداعى جوسپار تۋرالى ايتىپ بەرسەڭىز.
– قازىر كارديولوگيا, نەۆرولوگيا, حيرۋرگيا, ەندوسكوپيالىق, از ءينۆازيۆتى حيرۋرگيا, رەابيليتاتسيا, ايەلدەر دەنساۋلىعى, پروفيلاكتيكالىق مەديتسينا ەرەكشە دامۋ ۇستىندە. بۇل سالالاردا سۇرانىس جوعارى, مەديتسينالىق جەتىستىكتەر مۇمكىندىكتەر اشادى. ماقساتىمىز – تۇرعىندارعا ساپالى, ۋاقتىلى, عىلىمي نەگىزدەلگەن كومەك كورسەتۋ.
بولاشاقتا دياگنوستيكالىق قىزمەتتى كەڭەيتۋ, ەندوسكوپيالىق ەمدەۋ ادىستەرىنىڭ جاڭا تۇرلەرىن ەنگىزۋ, حيرۋرگيالىق بلوكتى كەزەڭ-كەزەڭىمەن بۇدان دا جاڭارتۋ جوسپارلانىپ وتىر. سونىمەن قاتار امبۋلاتوريالىق رەابيليتاتسيا كۇشەيتىلىپ, مەديتسينالىق ۇدەرىستەر تولىق تسيفرلاندىرىلادى. كادر الەۋەتى حالىقارالىق ستاندارتتار دەڭگەيىندە جەتىلدىرىلەدى.
ادام دەنساۋلىعى – ەڭ قىمبات قۇندىلىق. ءوز جاعدايىنا مۇقيات قاراپ, پروفيلاكتيكادان باس تارتپاي, دەر كەزىندە تەكسەرىلىپ تۇرۋ – اۋرۋدىڭ الدىن الۋدىڭ ەڭ ءتيىمدى جولى. ءبىزدىڭ اۋرۋحانا تۇرعىندارعا ساپالى, زاماناۋي مەديتسينالىق قىزمەت كورسەتۋ جولىندا تۇراقتى دامىپ كەلەدى. ءاربىر ازاماتقا كومەك كورسەتۋگە بارىنشا دايىنبىز.
– اڭگىمەڭىزگە راحمەت.
اڭگىمەلەسكەن –
ۇلبوسىن يسابەك,
«Egemen Qazaqstan»
الماتى وبلىسى,
قوناەۆ قالاسى
