بۇل ءىس-شارا «جاڭا اسۋ» بايقاۋى اياسىندا جۇزەگە اسىپ جاتقان «تانىمال شەتەلدىك مۋزىكالىق شىعارمالار مادەنيەتىنىڭ قازاق تىلىندە جاڭعىرۋى: ءان مەن ءتىل توعىسى» جوباسىمەن جۇزەگە استى.
الەمگە تانىمال 100 ءاننىڭ قازاق تىلىندەگى جاڭا نۇسقالارى العاش رەت ۇسىنىلدى. ايتا كەتەيىك, جوبا جەتەكشىسى – ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى فيلولوگيا فاكۋلتەتىنىڭ دەكانى, «توپجارعان» اقىندار كلۋبىنىڭ جەتەكشىسى, فيلولوگيا عىلىمدارىنىڭ كانديداتى سەرىكزات دۇيسەنعازى.
كەش بارىسىندا «My Heart Will Go On», «Bailando», مايكل دجەكسوننىڭ You’re Not Alone, ۆ.مەلادزەنىڭ «كراسيۆو», يۋ.انتونوۆتىڭ «مەچتى سبىۆايۋتسيا», «كرىشا دوما تۆوەگو», «شەري-شەري لەدي», «حۋتاريانكا», DABRO توبىنىڭ «يۋنوست», One Direction توبىنىڭ «Night Changes», سونداي-اق تاعى سول سەكىلدى كەڭىنەن تانىمال حيتتەردىڭ قازاق تىلىندەگى جاڭا نۇسقالارى ورىندالدى. ءان ماتىندەرىن «توپجارعان» اقىندار كلۋبىنىڭ مۇشەلەرى اۋدارعان. جوبانىڭ يدەيا اۆتورى – ەۇۋ رەكتورى ەرلان سىدىقوۆ.
«بۇل جوبا – اۋدارما ونەرى مەن زاماناۋي مۋزىكانى ۇيلەستىرە وتىرىپ, الەمدىك حيتتەردىڭ قازاق تىلىندەگى ساپالى نۇسقالارىن جاساۋعا باعىتتالعان شىعارماشىلىق ەڭبەك. جوباعا قاتىسۋشىلار شەتەل اندەرىنىڭ ماتىندەرىن بەيىمدەپ, ولاردىڭ كوركەمدىك, ىرعاقتىق جانە ماعىنالىق ەرەكشەلىكتەرىن قازاق تىلىندە جەتكىزۋگە كۇش سالدى», دەپ اتاپ ءوتتى جوبا جەتەكشىسى سەرىكزات دۇيسەنعازى.
كەش سوڭىندا ەۇۋ ومبۋدسمەنى, مەديتسينا عىلىمدارىنىڭ دوكتورى, پروفەسسور نەليا شاپەكوۆا كورەرمەندەر اتىنان ءسوز الىپ, «توپجارعان» اقىندار كلۋبىنا توعىزقۇمالاق تاقتاسىن تارتۋ ەتتى.
«ۇلتتىق ونەرىمىزبەن قوسا, ۇلتتىق ويىندارىمىز دا دامي بەرسىن. بۇگىن سوناۋ 80-جىلدارداعى ستۋدەنتتىك كۇنىمىز ەسكە ءتۇستى, بۇل كەشتىڭ دە رۋحى سول – بىرگە بولۋ, ءبىر-ءبىرىمىزدى قولداۋ, مۋزىكا ارقىلى بىرىگۋ. بۇگىن سونداي كەرەمەت, قازاقشا كاراوكە كەش بولدى», دەدى عالىم.
ەلوردالىق ونەرسۇيەر قاۋىمعا ەرەكشە اسەر قالدىرعان بۇل كەش قازاق ءتىلىنىڭ مۇمكىندىگىن, اۋدارما ونەرىنىڭ قۋاتىن جانە مۋزىكا مەن ءتىلدىڭ تابيعي ۇيلەسىمىن تاعى ءبىر مارتە دالەلدەدى.
