اسسامبلەيا – بىرلىكتى بەكەمدەيتىن قۇرىلىم

كەشە مەملەكەتتىك حاتشى گۇلشارا ابدىقالىقوۆا وڭتۇستىك قازاقستان وبلىسىنا جۇمىس ساپارىمەن كەلدى. مەملەكەتتىك حاتشىعا وبلىس اكىمى اسقار مىرزاحمەتوۆ وڭىردە اتقارىلىپ جاتقان جۇمىستار جايلى باياندادى. ءۇش ميلليونعا تارتا حالقى بار وڭ­تۇستىكتە دەنساۋلىق ساقتاۋ جانە ءبى­لىم بەرۋ نىساندارىنا قاجەتتىلىك اسا سە­زى­لەتىن. سوڭعى جىلدارى مەملەكەتتىڭ ءجا­نە وبلىس اكىمدىگىنىڭ كۇش سالۋىمەن بۇل قيىن تۇيىندەر شەشىلە باستاعان. شىم­كەنت قالاسىنداعى جاڭادان سالىنعان 270 ورىندىق №1 قالالىق بالالار اۋرۋحاناسىنىڭ سالتاناتتى اشىلۋىنا مەملەكەتتىك حاتشى گ. ابدىقالىقوۆا قاتىستى. اۋرۋحانادا 15 جاسقا دەيىنگى 10 مىڭنان استام بالا ستاتسيونارلىق ەم الا الادى. مەديتسينا قىزمەتكەرلەرىنىڭ جۇمىسىنا تابىس تىلەگەن مەملەكەتتىك حاتشى «ناۋرىز» الاڭىندا سالىنعان «ادەت-عۇرىپ جانە سالت-ءداستۇر» ورتا­لىعىندا وبلىستاعى ەتنومادەني ءبىر­لەستىكتەر وكىلدەرىمەن كەزدەسۋ وتكىزدى. جۇزدەسۋ بارىسىندا «قازاقستان حالقى اسسامبلەياسى – 20 ىزگى ءىس» رەسپۋبليكالىق ەستافەتاسىنىڭ شەڭبەرىندە پەداگوگيكا عىلىمدارىنىڭ دوكتورى, پروفەسسور, قازاقستان رەسپۋبليكاسى گۋمانيتارلىق عىلىمدار اكادەمياسىنىڭ اكادەميگى, وبلىستىق اسسامبلەيا جانىنداعى عى­لىمي-ساراپتامالىق توپتىڭ جەتەكشىسى ا.قا­لىبەكوۆانىڭ «قازاق حالىق تاربيەسىنىڭ اسىل مۇراسى» جانە «قازاق حالىق پەدا­گوگيكاسىنىڭ تەوريالىق نەگىزدەرى» كى­تاپتارىن ورتالىقتىڭ دەپوزيتاريىنە تاپسىرۋ ءراسىمى ءوتتى. گۇلشارا ابدىقالىقوۆا ادەت-عۇرىپ جانە سالت-ءداستۇر ورتالىعىندا وبلىستىڭ ەتنومادەني بىرلەستىكتەرى وكىلدەرىمەن وتكىزگەن كەزدەسۋىندە قازاقستان حالقى اسسامبلەياسى جىلىن وتكىزۋدىڭ قوعامدىق-ساياسي ءمانى جوعارى ەكەنىن ايتتى. مەملەكەتتىك حاتشى بارلىق ءىس-شارالار «مەنىڭ ەلىم – ماڭگىلىك ەل» اتتى باس­تى يدەيانى, بەيبىتشىلىكتى, قوعامدىق كەلىسىم مەن حالىقتىڭ بىرلىگىن نىعايتۋعا باعىتتالۋعا ءتيىس دەپ اتاپ كورسەتتى. «ەلدىگىمىزدى بەكىتىپ, حالىق رۋحىن اسقاقتاتاتىن مەرەيلى وقيعالارعا تولى قازاقستان حالقى اسسامبلەياسى جىلىنىڭ قازاقستان حالقى ءۇشىن, ونىڭ ىشىندە ەلدەگى بىرلىكتى بەكەمدەۋگە ەڭبەك ءسىڭىرىپ جۇرگەن سىزدەر ءۇشىن ءمانى مەن ماڭىزى ەرەكشە دەپ بىلەمىن. قازاقستان حالقى اسسامبلەياسى بەيبىتشىلىك پەن كەلىسىمدى, تۇراقتىلىق پەن تاتۋلىقتى ساقتاپ, دامىتۋدىڭ بىرەگەي تەتىگى – تاۋەلسىزدىككە, دامۋعا تىرەك بولعان ەل بىرلىگىنىڭ ەڭ باستى تۇتقاسى. سوندىقتان دا, اسسامبلەيا جىلى ەل تاريحىندا ناقتى ناتيجەلى ىستەرمەن, تولىمدى جەتىستىكتەرمەن ورنەكتەلگەن بەلەستى كەزەڭ بولىپ قالۋى ءتيىس. بۇگىنگى جيىندا وڭتۇستىك قازاقستان وبلىسىندا تۇراتىن ءتۇرلى ەتنوستار وكىلدەرى رەتىندە وزدەرىڭىزبەن كەزدەسە وتىرىپ, حالىقتىڭ بىرلىگىن ودان ءارى ارتتىرۋ باعىتىندا بىرلەسىپ اتقاراتىن جۇمىستارىمىزدى سارالاپ الساق دەگەن ويى­مىز بار», دەپ ءسوزىن ساباقتاعان گۇلشارا ناۋشاقىزى 100-گە جۋىق ەتنوستاردىڭ باسىن بىرىكتىرىپ, ءبىر ءۇيدىڭ بالاسىنداي, ءبىر قولدىڭ سالاسىنداي ىنتىماققا ۇيىعان وڭتۇستىكتىڭ قازاق ءۇشىن قۇت مەكەن, التىن بەسىك ەكەندىگىن ايتتى. قازاقستان حالقى اسسامبلەياسىنىڭ سيمۆولى – «تايقازاننىڭ» كيەلى تۇركىستاننان استاناعا اتتاندىرىلۋىنىڭ ەل بىرلىگى ءۇشىن جاقسى جورالعى ەكەندىگىن جەتكىزدى. قازاقستان حالقى اسسامبلەياسىنىڭ ءتۇپ قازىعى جالپىحالىقتىق «ماڭگىلىك ەل» يدەياسى ەكەندىگىن ايتقان مەملەكەتتىك حاتشى ەلباسىنىڭ اسسامبلەيا ارقىلى بىرلىكتى نىعايتۋ تاپسىرمالارىنىڭ وڭتۇستىكتە جاقسى ورىندالىپ جاتقاندىعىن اتاپ ءوتتى. بۇدان كەيىن مەملەكەتتىك حاتشى وڭتۇستىك قازاقستان وبلىستىق اسسامبلەياسىنىڭ ىسكە اسىرۋعا ءتيىس جەتى باعىتىن ناقتىلاپ بەردى. قازاقستان حالقى اسسامبلەياسى توراعا­سىنىڭ ورىنباسارى ەرالى توعجانوۆ مەم­لە­كەتتىك حاتشىنىڭ سويلەگەن ءسوزىن ءارى قاراي دامىتتى. جۇزدەگەن ۇلتتار مەن ۇلىستاردىڭ باسىن بىرىكتىرگەن اسسامبلەيانىڭ جۇمىس تاسىلىنە گەرمانيا, قىتاي سياقتى ىرگەلى ەلدەردىڭ قىزىعۋشىلىق تانىتقانىن ايتقان ەرالى لۇقپان ۇلى اسسامبلەيانىڭ مەملەكەت باسشىسىنىڭ تاپسىرمالارىن ورىنداۋدا ءبىر جاعادان باس, ءبىر جەڭنەن قول شىعاراتىنداي بىرلىكتە بولۋ قاجەتتىگىن ناقتىلادى. كەزدەسۋ بارىسىندا وبلىس اكىمىنىڭ ورىن­باسارى ەرلان ايتاحانوۆ 2014 جىلعى جۇمىس­تىڭ نەگىزگى قورىتىندىلارى مەن وڭتۇستىك قا­زاقستان وبلىسى اسسامبلەياسىنىڭ جۇمىس جوس­پارلارى مەن وڭىردە قازاقستان حالقى اس­سامبلەياسى جىلىن وتكىزۋ جونىندە باياندادى. «ىرىس الدى – ىنتىماق» فورۋمىنىڭ حاتشىسى, بەلگىلى جازۋشى مارحابات بايعۇت وبلىس اكىمىنىڭ ۇيىتقى بولۋىمەن تۇركىستاندا زيالى قاۋىم باسقوسۋىنىڭ «ىرىس الدى – ىنتىماق» فورۋمىنا ۇلاسقانىن ايماق ومىرىمەن بايلانىستىرا ايتىپ بەردى. جيىندا چەشەن-ينگۋش ەتنومادەني ورتالىعىنىڭ توراعاسى حاسان باتسيەۆ قيىن كەزەڭدە ءوز جۇرتىنان ەرىكسىز كوشىرىلگەن جۇرتتىڭ قازاقتىڭ كەڭ قولتىعىنان پانا تاپقانىن, قازاقستان – وسىنداعى بارلىق ۇلتتار مەن ۇلىستاردىڭ تۋعان وتانىنا اينالعانىن, قانداي كۇندە دە ەلباسىنىڭ قاسىندا توپتاساتىندىقتارىن, حالىق قالاۋى – بىرلىك پەن ىنتىماق ەكەندىگىن جەتكىزدى. ال وزبەك ەتنومادەني ورتالىعى جانىنداعى جاس­تار قاناتىنىڭ جەتەكشىسى ىقسىباي مامەدوۆ قازاقستانداعى بارشا ەتنوس وكىلدەرىنىڭ مەملەكەتتىك ءتىل – قازاق ءتىلىن ءبىلۋ قاجەتتىگىنە توقتالدى. «باسەكەگە قابىلەتتىلىكتىڭ ءبىر سيپاتى – ءتىل. قازاق تىلىندە سويلەيتىندىگىمنەن قاي جەردە دە ورنىم بار, جۇمىسىم بار. ءبىز جاستار ەلباسىمىزدىڭ ەرەكشە قامقورلىعىن سەزىنەمىز. ءبىز ەلباسىمەن, ەلىمىزبەن قۋاتتىمىز», – دەدى. بۇدان كەيىن, مەملەكەتتىك حاتشى جۇمىس ساپارى اياسىندا بىرقاتار نىسانداردى ارالاپ كوردى. «قوعامدىق كەلىسىم» كوممۋنالدىق مەملەكەتتىك مەكەمەسىنە بارىپ, بۇرىنعى «قازاقستان» كينوتەاترىن قايتا قۇرىلىمداۋ جوباسىمەن تانىستى. سونداي-اق, كەزىندە اپاتتى جاعدايدا دەپ تانىلىپ, قايتا بوي كوتەرگەن ا.س.پۋشكين اتىنداعى №1 مەكتەپ-گيمنازياسىندا بولدى. №6 كوللەدجدەگى دۋالدى ءبىلىم بەرۋ بارىسىمەن تانىسىپ, بەينەلەۋ ونەرى مۇراجايىنىڭ اشىلۋىنا قاتىستى. ساپار قورىتىندىسىندا گ.ابدىقالىقوۆا وڭتۇستىك قازاقستان وبلىسىنىڭ ايەلدەر قاۋىمداستىعى وكىلدەرىمەن كەزدەستى. كەزدەسۋ بارىسىندا وتباسى-دەموگرافيالىق ساياساتتى دامىتۋ ماسەلەلەرى, «قازاقستان-2050» ستراتەگياسىن, «نۇرلى جول – بولاشاققا باستار جول» اتتى جاڭا ەكونوميكالىق ساياساتتى جۇرگىزۋگە ايەلدەردىڭ بەلسەنە ارالاسۋى, قازاقستان رەسپۋبليكاسىنىڭ 2006-2016 جىلدارعا ارنالعان گەندەرلىك تەڭدىك ستراتەگياسىن ىسكە اسىرۋ ماسەلەلەرى تالقىلاندى. باقتيار تايجان, «ەگەمەن قازاقستان». وڭتۇستىك قازاقستان وبلىسى.