فوتو: اشىق دەرەككوز
قارىز الۋشىعا قوسىمشا ۋاقىت بەرىلدى
بۇعان دەيىن ونلاين-قارىزدار بىرەر مينۋتتا راسىمدەلىپ, ادامدار كوبىنە ويلانىپ ۇلگەرمەي نەسيە الىپ قوياتىن. جاڭا تەتىك ءدال وسى تاۋەكەلدى ازايتۋعا باعىتتالعان. «شەشىم قابىلداۋ كەزەڭى» كۇماندانعان نەمەسە قىسىم كورگەن ازاماتقا ويلانۋعا مۇمكىندىك بەرەدى. قارىز الۋشىلار وسى ۋاقىت ىشىندە ۇسىنىستى قايتا زەردەلەپ, قاجەت دەپ ساناماسا, نەسيە راسىمدەۋدەن باس تارتا الادى.
«شەشىم قابىلداۋ كەزەڭىنىڭ» مەرزىمى قارىز كولەمىنە بايلانىستى بەلگىلەنگەن:
- 150-255 اەك ارالىعىنداعى قارىزدار ۇشىن – كەمىندە 8 ساعات;
- 255 اەك-تەن جوعارى قارىزدار مەن 75 اەك-تەن اساتىن ونلاين-ميكروكرەديتتەر ءۇشىن – كەمىندە 24 ساعات.
- وسى ۋاقىت اياقتالعان سوڭ عانا قارىز الۋشى eGov پورتالى ارقىلى نەمەسە كرەديتورعا حابارلاۋ تاسىلدەرىمەن ءوزىنىڭ نيەتىن قايتا راستاۋى قاجەت. ەگەر راستاماسا, شارت كۇشىن جويادى جانە اقشا اۋدارىلمايدى.
جاڭا ءتارتىپ تەك ونلاين كەپىلسىز تۇتىنۋشىلىق قارىزدارعا قاتىستى
ول تاۋارلىق كرەديتتەرگە, 150 اەك-تەن اسپايتىن كرەديتتىك كارتالارعا جانە سول ۇيىم ىشىندەگى قايتا قارجىلاندىرۋعا قولدانىلمايدى. ەگەر قارىز الۋشى ءبىر كۇندە بىرنەشە ونلاين-قارىز راسىمدەپ, جالپى سوماسى شەكتى مەجەدەن اسىپ كەتسە, كۇتۋ كەزەڭى مىندەتتى تۇردە ەنگىزىلەدى. ال, شۇعىل اقشا كەرەك بولسا, بانك نەمەسە مقۇ كەڭسەسىنە بارىپ راسىمدەۋ مۇمكىندىگى بار. بۇل رەتتە وتىنىمدەرگە تالاپ قويىلمايدى.
نەسيە نارىعىنا قالاي اسەر ەتەدى؟
جاڭا تالاپ ازاماتتاردى الاياقتىقتان قورعاۋعا, اسىعىس شەشىمدەردىڭ الدىن الۋعا جانە قارجىلىق جاۋاپكەرشىلىكتى ارتتىرۋعا باعىتتالعان. سونىمەن بىرگە بانكتەر ەندى تولەم كالكۋلياتورلارىن اشىق ورنالاستىرىپ, قارىز تولىق وتەلگەن سوڭ بەرەشەكتىڭ جوق ەكەنىن راستايتىن انىقتاما بەرۋگە مىندەتتەلەدى. ونلاين-قارىزدار بۇرىنعىداي «جەدەل» بەرىلمەيتىندىكتەن, ءيمپۋلسيۆتى وتىنىمدەر ازايىپ, جالپى نەسيە كولەمى ءبىرشاما تومەندەۋى مۇمكىن. اقشا شوتقا 8-24 ساعاتتان كەيىن تۇسەدى.
