جاسامپازدىق جۇمىستاردىڭ جالعاسقانى جاقسى

قازاقستان حالقى اسسامبلەياسى كەڭەسىنىڭ مەرزىمىنەن بۇرىن پرەزيدەنتتىك سايلاۋ وتكىزۋ تۋرالى ۇسىنىسىن قولداۋشىلار قاتارى كۇننەن-كۇنگە ارتىپ كەلەدى. كەشە وسى ماسەلەگە وراي ۇلتتىق اكادەميالىق كىتاپحانادا باس قوسقان «باس رەداكتورلار كلۋبى» قوعامدىق بىرلەستىگىنىڭ مۇشەلەرى ءوز ۇندەۋلەرىن قابىلدادى. ۇسىنىلعان ءماتىن جوباسىن قوعامدىق بىرلەستىك ءتورايىمى بيبىگۇل جەكسەنباي جاريا ەتتى. اتالعان ۇندەۋ «باس رەداكتورلار كلۋبى» قوعامدىق بىرلەستىگى قازاقستان مەديا-قوعامداستىعى وكىلدەرىنىڭ اتىنان قازاقستان رەسپۋبليكاسى پرەزيدەنتىن مەرزىمىنەن بۇرىن سايلاۋدى قولدايتىندارىن بىلدىرەدى, دەپ باستالعان. باستاما ەل مۇددەسىنەن جانە حالىقارالىق ەكونوميكالىق جاعدايدىڭ تۇراقسىزدىعىنان تۋىنداپ وتىرعاندىعى ەرەكشە اتالىپ, پرەزيدەنتتىك سايلاۋدى مەرزىمىنەن بۇرىن وتكىزۋ قوعامدى اۋقىمدى ماقساتتارعا جەتۋ جولىندا ىنتىماققا شاقىرا الاتىنىنا سەنىم ءبىلدىرىلىپتى. ۇندەۋ «الداعى ۋاقىتتا مەم­­­لەكەتتىك اپپارات پەن بارشا قا­زاقستاندىقتاردىڭ كۇش-جىگەرى ەكونوميكاداعى داعدارىس ترەندى­نىڭ سالدارىن ازايتۋعا باعىتتا­لۋى ءتيىس. بۇگىنگى كۇن­دە قازاق­ستان الەۋمەتتىك-ەكونو­مي­كالىق دامۋ­دىڭ تابىستى كورسەتكىشىن, سونداي-اق, ەلىمىزدىڭ بىرلىگى مەن گۇلدەنۋىنىڭ بەيبىت­شىلىك قورعانى ەكەنىن كورسەتىپ وتىر», دەلىنگەن ۇندەۋدە. وسىعان وراي, قازاقستان حالقى اسسامبلەياسى مەرزىمىنەن بۇرىن پرەزيدەنتتىك سايلاۋ وتكىزۋدى ۇسىنعانى قۇپتارلىق ءجايت. ەلىمىزدە مەديا سالا مەن ازاماتتىق قوعام ينستيتۋتتارى قارقىندى تۇردە دامۋدا, ولار وزدەرىنىڭ جوبالارىن قوعامنىڭ ءارتۇرلى الەۋمەتتىك سالاسىندا ءتيىمدى پايدالانۋدا. دامىعان 30 ەلدىڭ قاتارىنا كىرۋ يدەياسىن قۇپتاۋ ماقساتىندا بارلىق قازاقستاندىقتاردى, بارلىق بۇقارالىق اقپارات قۇرالدارىن جانە ۇكىمەتتىك ەمەس ۇيىمداردى قازاقستان حالقى اسسامبلەياسى كەڭەسىنىڭ ۇسىنىسىن قولداۋعا شاقىرامىز, دەپ اياقتالعان. ۇندەۋدى قولدايتىندىقتارىن بىلدىرگەن قوعامدىق بىرلەستىك مۇشەلەرى ءوز ويلارىن ورتاعا سالدى. الدىمەن ءسوز العان «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ قازىر بۇكىل حالىق ءبىر يدەيانىڭ, سونىڭ ىشىندە ءبىر ۇسىنىستىڭ توڭىرەگىنە جۇمىلىپ وتىر دەپ ايتۋدىڭ ەشقانداي ارتىقتىعى جوق ەكەندىگىن تىلگە تيەك ەتە كەتتى. «بارلىق بۋىن مەن توپ وكىلدەرى قازاقستان حالقى اسسامبلەياسى كەڭەسىنىڭ ۇسىنىسىن كوكەيگە ابدەن قونىمدى دەپ ەسەپتەيدى. ونىڭ ۇستىنە, بۇل ۇسىنىستى ساياسي كۇشتەر قولداۋدا. بارلىق بۇقارالىق اقپارات قۇرالدارى بەتىندە تولىق قولداۋ تاۋىپ كەلەدى. قاي جاعىنان قاراعاندا دا بۇل وتە ورىندى», دەدى س.ابدراحمانوۆ. ول, سونىمەن قاتار, سايلاۋدى مەرزىمىنەن بۇرىن وتكىزۋدى ەكى جاعدايعا نەگىزدەدى. «بىرىنشىدەن, ەكى سايلاۋدى ءبىر جىلدا وتكىزۋ كونستيتۋتسياعا قايشى ەكەندىگىن ايتۋدىڭ ءوزى جەتكىلىكتى. ەكىنشىدەن, قازىرگى الەمدە قالىپتاسىپ وتىرعان جاعداي ءبىز ءوزىمىزدىڭ مەملەكەتىمىز ءۇشىن تاعدىرشەشتى ماسەلەنى وسى كەزدە ءوزىمىز شەشىپ, جاسامپازدىق جولىمىزدى جالعاستىرۋىمىزعا مۇمكىندىك الۋ كەرەك ەكەنىمىزدى كورسەتەدى. سوندىقتان بۇل ۇسىنىستى ءبىز تولىق قولدايمىز», دەدى. وسى تۇرعىدان كەلگەندە, «ەگەمەن قازاقستان» گازەتىندە كۇن سايىن مول ماتەريالدار باسىلۋدا. بارلىق باسىلىمدار مەن ارنالار دا وسى ماسەلەنى كوتەرىپ كەلەدى. ولاي بولسا, «باس رەداكتورلار كلۋبى» قوعامدىق بىرلەستىگىنىڭ ۇسىنىسى قاي جاعىنان بولسا دا قولداۋعا لايىق. بۇدان كەيىن ءسوز العان «كازاح­­­ستانسكايا پراۆدا» گازەتىنىڭ باس رەداكتورى تاتيانا كوستينا بۇل جۋرناليستەر قاۋىمى ءۇشىن ماڭىزدى وقيعا بولعاندىعىن, سوندىقتان دا گازەت ۇجىمى قازاقستان حالقى اسسامبلەياسىنىڭ ۇسىنىسىن قول­داعاندىقتارىن العا تارتتى. «بۇل ۇسىنىس دەر كەزىندە قابىلدانعان دۇرىس شەشىم بولدى. ءوزىم دە اسسامبلەيا كەڭەسىنىڭ وتىرىسىنا قاتىسىپ, كەڭەس مۇشەلەرىنىڭ دايەكتى سوزدەرىن ەستىگەن ەدىم. سوندىقتان دا سالماقتى شەشىم بولعانىنا ەش كۇمانىم جوق. گازەتىمىزگە تولاسسىز كەلىپ جاتقان قولداۋ حاتتاردىڭ كوپتىگى دە وسى شەشىمىمىزگە وڭ ىقپال ەتكەنىن ايتا كەتۋ كەرەك», دەدى باس رەداكتور. سونداي-اق, وتىرىستا ءسوز العان «ۋكراىنسكى نوۆيني» رەس­پۋبليكالىق گازەتىنىڭ باس رەداكتورى تاراس چەرنەگا ەلوردانىڭ الەم تانىعان قالاعا اينالىپ, ال ەلىمىزدىڭ حالىقارالىق دارەجەدە مويىندالعانى پرە­زيدەنت ن.ءا.نازارباەۆتىڭ ارقا­سىندا مۇمكىن بولعاندىعىن ەرەك­شە اتادى. قازاقستان حالقى اسسامبلەياسىنىڭ ۇسىنىسى قوعام تاراپىنان قىزۋ قولداۋعا يە ەكەنىن العا تارتقان ت.چەرنەگا ەتنوستىق باسىلىمنىڭ ءبىرى رەتىندە ءوزى باسقارىپ وتىرعان گازەت ۇجىمى دا اتالعان ۇسىنىستى قولدايتىندىعىن جەتكىزدى. اسقار تۇراپباي ۇلى, «ەگەمەن قازاقستان». استانا.