باس اسكەري پروكۋراتۋرا مەن قارجى نارىعىن رەتتەۋ جانە دامىتۋ اگەنتتىگى ءوزارا كەلىسىمگە قول قويىپ, بىرلەسكەن وقۋ ءىس-شارالارىن وتكىزۋگە ۋاعدالاستى. قۇجات قارجىلىق ساۋاتتىلىقتىڭ نەگىزدەرىن ۇيرەتۋ جانە قارجى وپەراتسيالارىنا قاتىستى تاۋەكەلدەردىڭ الدىن الۋ بويىنشا جۇيەلى جۇمىستى كوزدەيدى.
باس اسكەري پروكۋراتۋرا ايقىنداعان مىندەتتەردى جۇزەگە اسىرۋ, سونداي-اق اسكەري قىزمەتشىلەر اراسىندا جوعارى دەڭگەيدەگى قارجىلىق مادەنيەتتى قالىپتاستىرۋ – ۇلتتىق ۇلان قىزمەتىنىڭ باسىم باعىتتارىنىڭ ءبىرى.
ءىس-شاراعا اقمولا گارنيزونى اسكەري پروكۋراتۋراسىنىڭ اعا پروكۋرورلارى – ادىلەت مايورى ەرلان قوناروۆ جانە ادىلەت كاپيتانى دياس جۇماجان قاتىستى. سونىمەن قاتار قارجى نارىعىن رەتتەۋ باسقارماسىنىڭ باس مامانى ىڭكار التاەۆا بايانداما جاسادى. «امانات» پارتياسىنىڭ وكىلى دۋلات مىڭباەۆ تا قارجىلىق مادەنيەت پەن الەۋمەتتىك قورعاۋعا قاتىستى ءوز كوزقاراسىمەن ءبولىستى.
قاتىسۋشىلار اسكەري قىزمەتشىلەردى زاماناۋي قارجىلىق قۇرالدار جونىندە دەر كەزىندە حاباردار ەتۋ, الاياقتىق سحەمالاردان قورعانۋ جولدارىن ءتۇسىندىرۋ جانە جەكە قاراجاتتى ءتيىمدى باسقارۋ داعدىلارىن قالىپتاستىرۋدىڭ ماڭىزدىلىعىن اتاپ ءوتتى. مۇنداي ساباقتار اسكەري ورتاداعى جالپى قۇقىقتىق جانە ەكونوميكالىق ءبىلىمنىڭ ارتۋىنا ىقپال ەتەدى.
اتالعان وقۋ ساباعى قۇقىقتىق ءتارتىپ اسكەرىنىڭ جەكە قۇرامىنىڭ قارجىلىق ساۋاتتىلىعىن ارتتىرۋعا جانە قارجىلىق قۇرالداردى ءتيىمدى پايدالانۋدى دامىتۋعا باعىتتالعان ماڭىزدى قادام بولدى.
