2025 جىلعى 29 قاراشا كۇنى استانا ۋاقىتىمەن ساعات 06:06-دا كاسپي قۇبىر كونسورتسيۋمىنىڭ (كقك) نوۆوروسسيسك ماڭىنداعى تەڭىز ينفراقۇرىلىمىنا ۇشقىشسىز سۋ كولىكتەرىمەن شابۋىل جاسالعان. شابۋىل سالدارىنان ەكىنشى سىرتقى ايلاق قۇرىلعىسى (ۆپۋ-2) ايتارلىقتاي زاقىمدانعان. قوندىرعى تولىق جوندەۋ جانە قالپىنا كەلتىرۋ جۇمىستارى جۇرگىزىلگەنگە دەيىن پايدالانۋدان شىعارىلعان.
ەنەرگەتيكا مينيسترلىگى بۇل وقيعاعا ەرەكشە الاڭداۋشىلىق ءبىلدىرىپ, ازاماتتىق ينفراقۇرىلىم نىساندارىنا باعىتتالعان مۇنداي ارەكەتتەرگە جول بەرىلمەۋى ءتيىس ەكەنىن اتاپ ءوتتى.
«كقك جۇيەسى – حالىقارالىق ەنەرگەتيكالىق جوبا. ونىڭ نىساندارىنا جاسالعان كەز كەلگەن كۇش قولدانۋ جاھاندىق ەنەرگەتيكالىق قاۋىپسىزدىككە تىكەلەي قاۋىپ توندىرەدى جانە كونسورتسيۋمعا قاتىسۋشى مەملەكەتتەردىڭ, سونىڭ ىشىندە قازاقستان رەسپۋبليكاسىنىڭ ەكونوميكالىق مۇددەلەرىنە ايتارلىقتاي زيان كەلتىرەدى», – دەلىنگەن رەسمي تۇسىنىكتەمەدە.
مينيسترلىكتىڭ حابارلاۋىنشا, ىقتيمال تەرىس سالداردى ازايتۋ جانە ءىرى مۇناي كەن ورىندارىنداعى ءوندىرىس دەڭگەيىن ساقتاۋ ماقساتىندا ەكسپورتتىق كولەمدەردى بالاما باعىتتارعا قايتا جونەلتۋ جونىندەگى جەدەل جوسپار ىسكە قوسىلعان.
جاعداي قازاقستان ۇكىمەتىنىڭ ەرەكشە باقىلاۋىندا.
