ەكىنشى بەسجىلدىقتىڭ ەكى ءوندىرىسى

اقمولا وبلىسىنىڭ اكىمدىگى يندۋستريالاندىرۋ كارتاسىنىڭ ەكىنشى بەسجىلدىعى بارىسىندا جۇزەگە اسىرىلعان 2 جوبانىڭ تۇساۋكەسەرىن ۇيىمداستىردى. مۇنداي جوبالاردىڭ ءبىرى – تسەلينوگراد اۋدانىنىڭ اقمول اۋىلىنداعى جىلدىق قۋاتى 20 000 توننا ەت وندىرۋگە باعىتتالعان زاماناۋي قۇس فابريكاسى. جوبا قۇنى شامامەن 13 ميلليارد تەڭگەنى قۇرايدى. قۇس ەتىن وڭدەيتىن كەشەندە 250 ادام تۇراقتى جۇمىسپەن قامتاماسىز ەتىلگەن. بۇگىنگى كۇنى مۇندا 17 برويلەر قۇستارىنىڭ كۇركەسى, ينكۋباتور, سويۋ تسەحى جانە قۇس ەتىن وڭدەۋ بويىنشا توراپتار ورنالاسقان. جاڭا كاسىپورىندا سالقىنداتىلعان, ىستالعان, مۇزداتىلعان قۇس ەتىنىڭ 12 ءتۇرى دايىندالادى. اتالعان جوبانى جۇزەگە اسىرۋ استانا قالاسىنىڭ نارىعىن وتاندىق قۇس ەتىمەن تولىقتىرۋدى كوزدەيدى. سونداي-اق, وبلىستىڭ شورتاندى اۋدانىندا پوليەتيلەن ونىمدەرىن شىعارۋ بويىنشا قالدىقسىز ءوندىرىس جۇزەگە اسىرىلۋدا. كاسىپورىن سوڭعى ءۇش ايدا عانا 1071 توننا, نەمەسە 405 ميلليون تەڭگەنىڭ پوليەتيلەن ءونىمىن دايىندادى. اتالعان ءوندىرىستى ىسكە قوسۋ ناتيجەسىندە شورتاندى اۋىلىنىڭ 37 تۇرعىنى تۇراقتى جۇمىسپەن قامتاماسىز ەتىلدى. بۇگىندە وندىرىستە ءتۇرلى ءپىشىن مەن كولەمدەگى پوليەتيلەن قالتاشالار, ىدىس-قاپتار, تۇرمىستىق قالدىقتارعا ارنالعان پاكەتتەر شىعارىلادى. استانالىق وبلىستا 2015-2021 جىلدارى, ءۇيدب-2 اياسىندا 644 ميلليون 700 مىڭ تەڭگەنىڭ 36 جوباسى جۇزەگە اسىرىلادى دەپ جوسپارلانۋدا. وسىنىڭ ناتيجەسىندە 26 900 تۇراقتى جۇمىس ورنى اشىلاتىن بولادى. يندۋستريالاندىرۋ كارتاسىنا ەنگىزىلگەن 36 جوبانىڭ ىشىندەگى 25 نىسان ۇستىمىزدەگى جىلى پايدالانۋعا بەرىلەدى دەپ جوسپارلانۋدا. جوبالاردىڭ دەنى قۇرىلىس جانە قۇرىلىس ماتەريالدارىنىڭ ءوندىرىسى, اگروونەركاسىپ پەن اۋىل- شارۋاشىلىق تاۋارلارىن قايتا وڭدەۋ, كولىك قۇراستىرۋ جانە تاماق ونەركاسىبى سالالارىن قامتيدى. باقبەرگەن امالبەك, «ەگەمەن قازاقستان». اقمولا وبلىسى.