قىرعىزستان ەۋرازيالىق ەكونوميكالىق وداققا قوسىلدى

استانا. 9 مامىر. ەۋرازيالىق ەكونوميكالىق وداق ەلدەرى ۇيىمعا قىرعىزستاندى قوسۋ تۋرالى شەشىم قابىلدادى. بۇل تۋرالى ريا «نوۆوستي» حابارلادى. 8 مامىر كۇنى وتكەن جوعارى ەۋرازيالىق ەكونوميكالىق كەڭەس وتىرىسىندا قازاقستان پرەزيدەنتى نۇرسۇلتان نازارباەۆ: «وسى ۋاقىتقا دەيىن كۇدىك تۋدىرعان سۇراقتاردىڭ بارلىعى ءوز شەشىمىن تاپتى. ءبىز بۇگىن قىرعىزستاندى وداققا تولىقتاي قابىلداۋ تۋرالى قۇجاتتى قابىلدادىق. وسىعان وراي بارلىعىڭىزدى قۇتتىقتايمىن», – دەدى. قىرعىزستاندى قوسۋ تۋرالى كەلىسىمشارتقا 2014 جىلدىڭ جەلتوقسان ايىندا قول قويىلعان بولاتىن. ينتەگراتسيالىق بىرلەستىككە قىرعىز ەلى كەلىسىمدەر بەكىتىلگەننەن كەيىن 8 مامىردا ەنەدى دەپ جوسپارلانعان. وسى ۋاقىتقا دەيىن تاراپتاردىڭ كەي ماسەلەلەرگە قاتىستى ناقتى ءبىر شەشىمگە كەلە الماعانىن ايتا كەتەيىك. رەسەي پرەزيدەنتىنىڭ كومەكشىسى يۋري ۋشاكوۆتىڭ بۇدان بۇرىن جۋرناليستەرگە تاراتقان اقپاراتى بويىنشا, قىرعىزستان ناۋرىز ايىندا قولدانىستاعى حاتتاماعا وزگەرتۋلەر ەنگىزۋدى ۇسىنعان. الايدا, بۇل ۇسىنىستاردى وداق مۇشەلەرى «قيسىنعا كەلمەيدى» دەپ تاپقان. ەۋرازيالىق ەكونوميكالىق وداق قۇرامىندا قازىرگى تاڭدا رەسەي, بەلارۋس, قازاقستان مەن ارمەنيا بار. ەلامان قوڭىر. دەرەك: ريا «نوۆوستي». سۋرەت: easttime.ru.