«ەير استانا» كۋرسانتتارى ەۋروپانىڭ جەتەكشى ۇشقىشتار مەكتەبىن ءتامامدادى

الماتى. 20 اقپان. «ەير استانا» اۋە كومپانياسىنىڭ 9 كۋرسانتى كورك حالىقارالىق اۋەجايىندا ورنالاسقان AFTA (Atlantic Flight Training Academy) ەۋروپانىڭ جەتەكشى ۇشقىشتار مەكتەبىندە كوممەرتسيالىق اۋە جولدارىنىڭ ۇشقىشتاردى دايىنداۋ كۋرسىن ساتىمەن ءتامامدادى. بۇل تۋرالى egemen.kz ءتىلشىسى حابارلادى. كورك حالىقارالىق قوناق ۇيىندە جاقىندا وتكەن تۇلەكتەرگە سەرتيفيكاتتاردى تاپسىرۋ راسىمىنە مەكتەپ ديرەكتورى مارك كەيسي, «ەير استانانىڭ» وندىرىستىك سۇراقتار بويىنشا اعا ۆيتسە-پرەزيدەنتى ەنتوني رەگان, «ەير استانانىڭ» ۇشقىشتار قۇرامىن وقىتۋ بويىنشا ديرەكتورى فيليپپوس سياككاس قاتىستى. قازاقستاندىق تۇلەكتەر 2009 جىلى اۋە تاسىمالداۋشى ىسكە قوسقان ab-initio ۇشقىشتاردى العاشقى دايىنداۋ باعدارلاماسى بويىنشا وقۋ كۋرسىنان ءوتتى جانە 3 ايدان سوڭ اۋە كەمەسى تۇرىنە قايتا وقىتۋدان كەيىن ولار ەكىنشى ۇشقىش رەتىندە جۇمىسقا كىرىسەدى. بيىل جازدا قازاقستاننان AFTA مەكتەبىن 100-ءشى تۇلەك بىتىرەدى. قازىرگى تاڭدا اتالعان 15 ايلىق باعدارلامانى 150 ادام ءوتىپتى. ونىڭ ىشىندە «ەيرباستى» – 75, «بوينگتى» – 39, «ەمبراەردى» 23 ادام باسقارادى. ال 13 جاس ۇشقىشتى اۋە كەمەسىنىڭ تۇرىنە قايتا وقىتۋ كۇتىپ تۇر. تاعى 7 جاڭا وقۋشى 2015 جىلدىڭ ناۋرىزىندا ءدارىس الۋعا كىرىسەدى. وقۋ ەۋروپانىڭ FTE Jerez (يسپانيا) جانە اFTA (يرلانديا) ۇزدىك ۇشقىشتار مەكتەبىندە وتكىزىلمەك. دۋمان اناش. دەرەك: egemen.kz. سۋرەت: «ەير استانا» كورپوراتيۆتىك كوممۋنيكاتسيالار دەپارتامەنتى.