بالالار مەن جاسوسپىرىمدەردى كىتاپ وقۋعا باۋلۋ, ناسيحاتتاۋ, وقىرمان تالعامىن قالىپتاستىرۋ ماقساتىندا ۇيىمداستىرىلعان جارمەڭكەگە تۇركيا, وزبەكستان, موڭعوليا, ازەربايجان, قىرعىزستان, ساحا رەسپۋبليكاسى (ياكۋتيا), رەسەي ەلدەرىنەن كىتاپ ساۋداسى, عىلىمي-ءبىلىم بەرۋ جانە پوليگرافيالىق ونىمدەرىن ۇسىنعان 50-گە جۋىق باسپا ۇيىمى قاتىستى. كىتاپ كورمە-جارمەڭكەسىنىڭ اشىلۋ سالتاناتىنا تۇركىستان وبلىسى اكىمىنىڭ ورىنباسارى ەرتاي التاەۆ, تۇركسوي ۇيىمىنىڭ باس حاتشىسى سۇلتان راەۆ, ازەربايجان باسپالار بىرلەستىگى ديرەكتورلار كەڭەسىنىڭ توراعاسى ءشامىل سادىق, اقىن, تۇركى دۇنيەسى جازۋشىلار وداعىنىڭ توراعاسى ۇلىقبەك ەسداۋلەت قاتىستى.
ەل پرەزيدەنتى قاسىم-جومارت توقاەۆ ۇلتتىق قۇرىلتايدىڭ ءۇشىنشى وتىرىسىندا: «شىن مانىندە وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەپ وسى باعىتتاعى جۇمىستاردى ىلگەرىلەتۋدى تاپسىرعان بولاتىن. وسى باعىتتا وڭىردەگى 388 كىتاپحانا بيىلدىڭ وزىندە 380 مىڭعا جۋىق وقىرمانعا قىزمەت كورسەتتى. جىل باسىنان بەرى 31 مىڭنان استام جاڭا كىتاپ الىنىپ, جالپى كىتاپ قورى 6 ميلليوننان اسقانىن راستايدى دەرەكتەر.
«Turkestan Book Fair» كىتاپ كورمە-جارمەڭكەسى ءۇش كۇندىك مادەني-ىسكەرلىك باعدارلامانى قامتىدى. كورمە اياسىندا جاڭا كىتاپتاردىڭ تۇساۋكەسەرى, اۆتورمەن كەزدەسۋ, اۆتوگراف-سەسسيالار, بالالار الاڭىندا ارنايى شەبەرلىك ساعاتتارى وتكىزىلدى. اتاپ ايتار بولساق, مەملەكەتتىك سىيلىقتىڭ لاۋرەاتى نەسىپبەك ايت ۇلى اۋدارعان ء«لايلى-ءماجنۇن» داستانىنىڭ, قىرعىز جازۋشىسى سۇلتان راەۆتىڭ «جانجازا» رومانىنىڭ, اقىن, جازۋشى ۇلاربەك دالەي ۇلىنىڭ «باتۋ حان» اتتى تاريحي-دەرەكتى جاڭا رومانىنىڭ, «ساحا پوەزياسىنىڭ انتولوگياسى» كىتابىنىڭ, م.اۋەزوۆ كۇندەلىكتەرىنىڭ, «تاربيە تانىمدارى» كىتابىنىڭ تۇساۋكەسەرى جانە جازۋشى اياگۇل مانتايدى ەسكە الۋ كەشى ءوتتى. سونداي-اق جارمەڭكەدە بەلگىلى قالامگەر بايانعالي ءالىمجانوۆ, اقىن, جازۋشى ۇلاربەك دالەي ۇلى, باسقا دا اۆتورلارمەن كەزدەسۋ كەشىنە قاتىسىپ, قولتاڭباسىن الۋعا, كەز كەلگەن كىتاپتى باسپا باعاسىمەن ساتىپ الۋعا مۇمكىندىك جاسالدى. كەزدەسۋ بارىسىندا بايانعالي ءالىمجانوۆ بالالارعا ارنالعان 100-دەن استام كىتاپتى مەكتەپتەر مەن كىتاپحانالارعا تارتۋ ەتتى.
وبلىس اكىمدىگىنىڭ قولداۋىمەن «فوليانت» باسپاسى جانە تۇركسوي حالىقارالىق ۇيىمى ۇيىمداستىرعان كورمەگە, سونداي-اق «كىتاپحان» جوباسىنىڭ نەگىزىن قالاۋشى حاميت ەردەحان قاتىسىپ, پودكاست فورماتىندا شىڭعىس ايتماتوۆتىڭ «قوش بول, گۇلسارى» حيكاياتى تالقىلاندى.
تۇركىستان
