فوتولار: atameken.kz
بايقاۋ كوپشىلىكتىڭ ەرەكشە قىزىعۋشىلىعىن وياتتى: جالپى 1100 ادام تىركەلىپ, ولاردىڭ 330-ى الدىن الا ىرىكتەۋدەن ءوتتى, 80 قاتىسۋشى انكەتا تاپسىردى, ال فينالعا 33 ۇزدىك كاسىپكەر جولداما الدى. ولار – ەلىمىزدىڭ ءتۇرلى وڭىرلەرىنەن كەلىپ, فرانچايزينگ ارقىلى ءوز بيزنەسىن كەڭەيتۋدى ماقسات ەتكەن كاسىپكەرلەر.
وافق تورايىمى گۇلبانۋ مايعارينا قاتىسۋشىلاردى قۇتتىقتاپ, كونكۋرستىڭ فرانچايزينگ پەن جالپى كاسىپكەرلىكتى دامىتۋداعى ماڭىزدى ءرولىن اتاپ ءوتتى:
«KazBrand – جاي عانا بايقاۋ ەمەس. بۇل – يدەياسىنا سەنەتىن, جاڭا دۇنيە جاسايتىن جانە بيزنەستىڭ ەرەجەسىن قايتا جازاتىن ادامداردىڭ جولى. بۇگىن مۇندا قازاقستاندىق بيزنەستىڭ بولاشاعىن قۇراتىن – باتىل, جۇيەلى, تانىمال بولۋعا ۇمتىلعان جاندار جينالدى» دەدى گ.مايعارينا.
ول بۇگىندە قازاقستاندا 2,3 ميلليوننان استام شاعىن جانە ورتا بيزنەس سۋبەكتىلەرى بار ەكەنىن, ال 30 مىڭعا جۋىق كومپانيانىڭ فرانشيزا بويىنشا جۇمىس ىستەيتىنىن تىلگە تيەك ەتتى.
گ.مايعارينانىڭ ايتۋىنشا, فرانچايزينگ – كاسىپكەرلەرگە جىلدام ءارى سەنىمدى تۇردە دامۋعا مۇمكىندىك بەرەتىن ءتيىمدى جول.
«بايقاۋدىڭ 4 جەڭىمپازىنا قۇنى 7 ميلليون تەڭگەدەن باستالاتىن فرانشيزا پاكەتى, 1 جىلدىق سۇيەمەلدەۋ, دامۋ ستراتەگياسى, فرانشيزانى ساتۋداعى كومەك, ماركەتينگتىك جانە زاڭگەرلىك قولداۋ ۇسىنىلادى», دەدى ول.
قازىلار قۇرامىنا بەلگىلى كاسىپكەرلەر, سالالىق ساراپشىلار, دەپۋتاتتار جانە مەملەكەتتىك ورگانداردىڭ وكىلدەرى ەندى. ال قازىلار القاسىنا «اتامەكەن» ۇكپ باسقارما توراعاسىنىڭ ورىنباسارى تيمۋر جاركەنوۆ توراعالىق ەتتى.
جوبا سەرىكتەستەرى دە بايقاۋدى قولداپ, KazBrand جاڭا ۇلتتىق برەندتەردىڭ باستاۋ الاتىن الاڭىنا اينالاتىنىنا سەنىم ءبىلدىردى.
«KazBrand رەاليتي-بايقاۋىنىڭ فينالى – مەملەكەت باسشىسى اتاپ وتكەن باسىمدىقتاردىڭ ناقتى كورىنىسى: كاسىپكەرلىكتى دامىتۋ, تسيفرلاندىرۋ جانە ۇلتتىق برەندتەردىڭ ءوسۋى. ەڭ مىقتىلار جەڭىسكە جەتسىن!», دەدى «اتامەكەن» ۇكپ باسقارما توراعاسىنىڭ ورىنباسارى تيمۋر جاركەنوۆ.
«Respublica» پارتياسىنان ءماجىلىس دەپۋتاتى ايتۋار قوشمامبەتوۆ جوبا تۋرالى پىكىرىن ءبىلدىردى.
«KazBrand سياقتى اۋقىمدى جوبانى جاساۋ جانە وتكىزۋ – ۇلكەن جاۋاپكەرشىلىك. مۇنىڭ ارتىندا قىرۋار ەڭبەك, وتاندىق كاسىپكەرلەرگە دەگەن سەنىم جانە ءاربىر ازاماتقا ءوزىن كورسەتۋگە مۇمكىندىك بەرۋ نيەتى تۇر. مۇنداي باستامالار – ەركىن ويلايتىن, جاۋاپكەرشىلىگى جوعارى ءارى جاسامپاز جاڭا وتاندىق بيزنەستىڭ قالىپتاسۋىنا جول اشادى», دەدى دەپۋتات.
فيناليستەر ءوز جوبالارىن ءوندىرىس, ريتەيل, قىزمەت كورسەتۋ جانە قوعامدىق تاماقتانۋ باعىتتارى بويىنشا تانىستىردى. ءار كاسىپكەر ءوز بيزنەس-مودەلىن ۇسىنىپ, قازىلار سۇراقتارىنا جاۋاپ بەردى جانە كاسىبي باعالارىن الدى.
قازىلار القاسىنىڭ شەشىمىمەن جەڭىمپازداردىڭ ەسىمدەرى بەلگىلى بولدى:
تاسقىن مىرزا, MYRZA BRAND ء(وندىرىس ساناتى);
Qorzhyn (ريتەيل);
ادىلەت سەرىك ۇلى, SHOQ WEST (قوعامدىق تاماقتانۋ);
ەكاتەرينا گەراسيموۆا, «دەتسكيە سادى زايكا» (قىزمەت كورسەتۋ).
ولار تولىق دايىن فرانشيزا ازىرلەۋ قىزمەتىن جانە KazBrand كومانداسىنىڭ ءبىر جىلدىق سۇيەمەلدەۋىن جەڭىپ الدى. ال ارنايى نوميناتسيالاردىڭ لاۋرەاتتارى ورتالىق ازيا فرانچايزينگ قاۋىمداستىعىنا تەگىن مۇشە بولۋ مۇمكىندىگىنە يە بولدى.
ارنايى نوميناتسيا يەگەرلەرى: «ۇزدىك يدەيا» – ەۆگەني ۆورونين (MagicStick ەلەكتروەپيلياتسيا ستۋدياسى); «ۇزدىك ءونىم» – باعلان انكاۋوۆ (Arlan Design كومپانياسى); «ۇزدىك پرەزەنتاتسيا» – رادا اۋباكيروۆا (Qasietti شىعارماشىلىق ورتالىعى) جانە اليحان راحمەت (PIZZA 500 TENGE).
جابىلۋ راسىمىندە گۇلبانۋ مايعارينا قاتىسۋشىلار مەن سەرىكتەستەرگە العىسىن ءبىلدىردى:
«KazBrand – شىنايى ىنتاسىمەن جاسالعان برەندتەر دۇنيەگە كەلەتىن بىرەگەي الاڭ. ءوز يدەياسىنا سەنەتىن, ءاردايىم العا ۇمتىلاتىن جانە اينالاسىنا شابىت سىيلايتىن ءار ادامعا راحمەت ايتامىن. سىزدەردىڭ ەڭبەكتەرىڭىز قازاقستاندى جارقىن ءارى قۋاتتى ەتەدى. سەرىكتەستەرىمىزگە العىس بىلدىرەمىن! بارشاڭىزعا تابىس, جاڭا جەتىستىك جانە ساتتىلىك تىلەيمىن!», دەدى ول.
ءىس-شاراعا قاتىسۋشىلار مەن قوناقتار KazBrand رەاليتي-بايقاۋىن ەلىمىزدەگى ۇزدىك بيزنەس-يدەيالارمەن تانىسۋعا, تاجىريبە بولىسۋگە جانە جاڭا مۇمكىندىكتەرگە جول اشاتىن بىرەگەي پلاتفورما رەتىندە باعالادى. بايقاۋدىڭ فينالى ەلدەگى كاسىپكەرلىكتىڭ دامۋىنا دەگەن سەنىم, جاسامپازدىق جانە جاڭاشىلدىق رۋحىن بىرىكتىرگەن ماڭىزدى وقيعا بولدى.
