ءبىزدىڭ ستۋدەنتتەردىڭ «LUCID» جوباسى – وكپە وبىرىن ەرتە انىقتاۋعا ارنالعان يننوۆاتسيالىق جۇيە. ول نەگىزگى ەكى بولىكتەن بولىكتەن تۇرادى. ءبىرىنشىسى, «OncoSense «اتتى تالشىقتى بيوسەنسور بولسا, ەكىنشىسى – «Cancerna» جاساندى ينتەللەكت جۇيەسى. وسى ەكى تەحنولوگيا بىرىگىپ, كت-سۋرەتتەردى تالداۋ ارقىلى ىسىكتىڭ سيپاتىن دالىرەك انىقتاۋعا كومەكتەسەدى.
بۇل – ەلىمىزدە ءجيى كەزدەسەتىن قاتەرلى دەرتتىڭ ءبىرى. ەندى NU ستۋدەنتتەرى وسى اۋرۋدى ەرتە ءارى قولجەتىمدى انىقتايتىن جوبا ۇسىنىپ وتىر.
«OncoSense» بيوسەنسورى تەلەكوممۋنيكاتسيادا قولداناتىن ءبىرمودالى وپتيكالىق تالشىقتارعا نەگىزدەلگەن. بۇل ونىڭ سەزىمتالدىعىن ارتتىرىپ, ءوندىرىس قۇنىن تومەندەتەدى. قازىر قۇرىلعى «ex vivo» فورماتىندا كلينيكالىق سىناقتان ءوتىپ, ناۋقاستاردىڭ قان سارىسۋىنان بيوماركەرلەردى انىقتاۋ تيىمدىلىگىن كورسەتۋ ۇستىندە.
ال «Cancerna» جاساندى ينتەللەكت ءمودۋلى جۇيەنى تولىقتىرىپ, ىسىكتەردى قاۋىپ دەڭگەيىنە قاراي جىكتەيدى, دارىگەرلەرگە سۋرەتتەردى تالداۋعا, ەسەپتەر قۇراستىرۋعا جانە دارىلىك ءوزارا ارەكەتتەستىكتى تەكسەرۋگە كومەكتەسەدى. بولاشاقتا كوماندا پەت/كت دەرەكتەرى نەگىزىندە مەتاستاز بولجامىن ەنگىزىپ, تەحنولوگيانى باسقا قاتەرلى دەرت تۇرلەرىنە دە بەيىمدەۋدى جوسپارلاپ وتىر.
«ولشەۋ ءادىسىمىز دوكتور دانيەلە توسي جەتەكشىلىك ەتەتىن بيوسەنسورلار مەن بيوقۇرالدار زەرتحاناسىندا جاسالىپ, كەيىن ءوز بيوسەنسورىمىزدى قۇرۋعا بەيىمدەلدى. ءبىز سەنسوردىڭ دۇرىس جۇمىس ىستەپ, جەتكىلىكتى سەزىمتالدىققا يە ەكەنىن راستادىق. سوندىقتان زەرتتەۋدى جالعاستىرۋدى جوسپارلاپ قويدىق. ال جاساندى ينتەللەكت جۇيەسىن دامىتۋ – قازاق ونكولوگيا جانە راديولوگيا عىلىمي-زەرتتەۋ ينستيتۋتىمەن بىرلەسىپ جۇزەگە اسادى. الداعى ۋاقىتتا جي مودەلىن قوسىمشا وقىتىپ, جەتىلدىرىپ, ونى كلينيكالىق جاعدايدا سىناقتان وتكىزۋدى كوزدەپ وتىرمىز», دەدى «iGEM NU Kazakhstan» كومانداسىنىڭ جەتەكشىسى راۋان مۇرات ۇلى.
راۋاننىڭ ايتۋىنشا, بايقاۋدا ارنايى اتالىمدار بويىنشا باسەكەلەستىك وتە جوعارى بولعان. ءبىزدىڭ كوماندا «EPFL», «McMaster University», «Boston University», «Queen’s University», «Beijing Institute of Technology», «University of Rochester» جانە «Eindhoven University of Technology» سەكىلدى مىقتى كوماندالارمەن باق سىناسقان.
ال «LUCID» جوباسى بايقاۋدا عىلىمي ماڭىزىمەن قاتار, كاسىپكەرلىك الەۋەتى ءۇشىن دە جوعارى باعالاندى. ستۋدەنتتەر وزدەرى ۇسىنعان جوبانىڭ نارىققا ەنگىزىلۋىن دالەلدەپ, ونىڭ ەلىمىزدە عانا ەمەس, شەتەلدىك ەمدەۋ مەكەمەلەرىندە دە قولدانۋعا بولاتىنىن كورسەتتى.
