سەسسيانى جۇرگىزگەن مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي اۋىل اكىمدەرىن تىكەلەي سايلاۋ, ازاماتتاردىڭ ەل دامۋىنا ىقپال ەتەتىن ماڭىزدى شەشىمدەر قابىلداۋعا ات سالىسۋ مۇمكىندىگىن ارتتىرعانىن اتاپ ءوتتى.
وسىعان بايلانىستى مەملەكەتتىك قىزمەتشىلەردىڭ قولدانىستاعى ساياسي جانە اكىمشىلىك مەملەكەتتىك قىزمەتشىلەر ساناتىنا ەندى ءۇشىنشى – سايلانبالى مەملەكەتتىك قىزمەتشىلەر ساناتى قوسىلادى.
وسى ورايدا ولارعا قويىلاتىن تالاپتار دا وزگەرەدى. قىزمەتكە قابىلداۋ, ونى وتكەرۋ جانە توقتاتۋ ءتارتىبى جاڭا مازمۇنمەن تولىقتىرىلادى. سايلانعان اكىمدەر ەندى ءوز وكىلەتتىگى كەزەڭىندە سايلاۋالدى باعدارلامالارىندا كورسەتىلگەن ماقساتتار مەن مىندەتتەردىڭ ورىندالۋى بويىنشا تىكەلەي حالىق الدىندا جاۋاپتى بولادى.
«جەرگىلىكتى اكىمدەردىڭ كاسىبي دايارلىعى مەن بىلىكتىلىگى, لاۋازىمدىق مىندەتىن اتقارۋداعى جاۋاپكەرشىلىگى مەملەكەتتىك اپپارات قىزمەتىنىڭ تيىمدىلىگىن انىقتايتىن فاكتورلاردىڭ ءبىرى. سوندىقتان اۋىل اكىمدەرىن سايلاۋ كەزىندە ساياسي پارتيالار وزدەرى ۇسىناتىن كانديداتتاردىڭ تۇلعالىق جاۋاپكەرشىلىگى مەن كاسىبي دايارلىعىنا باسا نازار اۋدارىپ, ولاردىڭ بولاشاقتا اكىم بولۋعا لايىقتىلىعى ءۇشىن جاۋاپتىلىقتى وزدەرىنە الا ءبىلۋى كەرەك. اگەنتتىك ءوز تاراپىنان اكىمدەردىڭ كاسىبي بىلىكتىلىگىن ارتتىرۋ جۇمىستارىن تۇراقتى ۇيلەستىرۋگە قاشان دا دايىن» دەدى اگەنتتىك توراعاسى.
مەملەكەت باسشىسىنىڭ اۋىل اكىمدەرىنىڭ كاسىبي دايارلىعىن كۇشەيتۋ تۋرالى تاپسىرماسىن ورىنداۋ ماقساتىندا اگەنتتىك مەملەكەتتىك باسقارۋ اكادەمياسى جانە «Amanat» پارتياسىمەن بىرلەسىپ كەشەندى قايتا دايارلاۋ باعدارلاماسىن ازىرلەدى. بۇل باعدارلاما تەك وقىتۋعا عانا ەمەس, اۋىلدى باسقارۋدىڭ جاڭا مادەنيەتىن قالىپتاستىرۋعا باعىتتالعان. بۇگىنگى تاڭدا 1800-دەن استام اۋىل اكىمى وقىتۋدان وتكەن.
وڭىرلەردە كادر تاپشىلىعى ماسەلەسىن شەشۋ ماقساتىندا 2023 جىلدان باستاپ مەملەكەتتىك تاپسىرىس نەگىزىندە وقۋدى جوعارى كورسەتكىشپەن (GPA 3,33) اياقتاعان تۇلەكتەردى مەملەكەتتىك قىزمەتكە كونكۋرسسىز قابىلداۋ جۇيەسى ەنگىزىلدى. ناتيجەسىندە, بۇل تەتىك اۋىلدىق جانە اۋداندىق دەڭگەيدەگى كادر تاپشىلىعىن ازايتۋعا ناقتى ىقپال ەتىپ, بۇگىنگى تاڭدا 732 جاس مامان كونكۋرسسىز جەرگىلىكتى دەڭگەيدەگى لاۋازىمدارعا ورنالاستى.
اگەنتتىك توراعاسى باسشىلىق لاۋازىمداعى قىزمەتكەرلەر ءۇشىن ستراتەگيالىق ويلاي الۋ مەن تسيفرلىق شەشىمدەردى مەڭگەرۋدىڭ, قوعاممەن ءتيىمدى ديالوگ جۇرگىزە ءبىلۋدىڭ ەرەكشە ماڭىزدىلىعىن اتاپ ءوتتى.
ءىس-شارا اياسىندا جەرگىلىكتى باسقارۋدىڭ تيىمدىلىگى, جاڭا كادرلىق ساياسات, مەملەكەتتىك اپپاراتتىڭ سەرۆيستىك جانە كليەنتكە باعدارلانعان جاڭا ۇلگىسىنە قاتىستى ماسەلەلەر جان-جاقتى تالقىلاندى. شاراعا قاتىسۋشىلار وزدەرىن قىزىقتىرعان تۇيتكىلدى سۇراقتارىن ورتاعا سالىپ, پىكىر الماستى.
سەسسيا سوڭىندا ۇزاق جىلدار مەملەكەتتىك قىزمەتتەگى ادال ەڭبەگى جانە اۋىلدىق وڭىرلەردىڭ دامۋىنا قوسقان ۇلەسى ءۇشىن بىرقاتار اۋىل اكىمدەرى «مەملەكەتتىك قىزمەت ارداگەرى» توسبەلگىسىمەن, مەملەكەتتىك قىزمەت ىستەرى اگەنتتىگى توراعاسىنىڭ گراموتالارى جانە العىس حاتتارىمەن ماراپاتتالدى.
