جاس بولعانىمەن, اۋدان ورتالىعىنا باس بولىپ جۇرگەن دانيار مۇرات ۇلىن كوپشىلىك قولداپ وتىر. كاتونقاراعاي اۋدانى كەشە عانا جەكە اۋدان بولىپ, ءبولىنىپ شىققان سوڭ بىرقاتار جۇمىس قولعا الىنعان. ونىڭ ورىندالعانى, ورىندالماعانى بار. ال وكرۋگ باسشىسى قولىنان كەلگەن جۇمىستى بارىنشا اتقارىپ ءجۇر.
قاراپ وتىرساق, اۋىلدىڭ حالقىنا ەڭ كەرەگى – جول, ينتەرنەت, اۋىزسۋ. ءيا, اۋىزسۋدان بۇرىن ينتەرنەتكە تاۋەلدى. كۇندەلىكتى سۋدى تاسىپ ىشكەن ەل وعان ابدەن ۇيرەنىسكەن. ورتالىقتاندىرىلعان سۋ جۇيەسى ەندى-ەندى كەزەڭىمەن قوسىلىپ جاتىر. پرەزيدەن قاسىم-جومارت توقاەۆ تاپسىرعانداي, جىل سوڭىنا دەيىن بارلىق اۋىل 100 پايىز اۋىزسۋعا قوسىلۋعا ءتيىس. بۇل جۇمىس كاتونقاراعاي اۋىلدىق وكرۋگىندە دە ىستەلىپ جاتىر. جارىقتاندىرۋ جۇمىستارى دا اۋدان بولعالى قولعا الىندى. وعان دەيىن شەكارا شەبىندە جاتقان جۇرت جەتىمنىڭ كۇيىن كەشكەن. ونى نەسىنە جاسىرامىز؟ سوندىقتان قازىرگى باسشىلار ءۇشىن اتقاراتىن شارۋا – قىرۋار.
وكرۋگ اكىمىنىڭ ەسەپ-قيسابىنا كوز سالساق, اۋدان ورتالىعىنداعى اباي, و.بوكەي كوشەلەرىندەگى شارىق شامدارىن جاڭالاپ, اۋىلدىڭ كىرەبەرىسىنە جاڭا شامدار ورناتىپتى. سوناۋ تاۋ قۋىسىندا جاتقان مويىلدى اۋىلىنا شاعىن ينتەرنەت جەلىسىن جۇرگىزىپتى. ال شىڭعىستاي اۋىلىنىڭ كوشەلەرىنە جارىق قوسىلعان, ءۇيدى-ۇيگە اۋىزسۋ تارتىلعان. وسىنداي يگى ىستەردىڭ باسىندا جۇرگەن وكرۋگ باسشىسى اتقارعان جۇمىستارىن جاريالاي بەرمەگەن.
سۋرەتتى تۇسىرگەن – اۆتور
دانيار قاسەنوۆ 1993 جىلى ۇلكەن نارىن اۋىلىندا دۇنيەگە كەلگەن ەكەن. كەيىن «مەتاللۋرگيا» ماماندىعىن الىپ, ەڭبەككە ارالاسقان. ءتۇرلى قىزمەتتەردەن ساتىلاپ ءوسىپ, وكرۋگ اكىمىنىڭ ورنىنا جايعاسقان. قىزمەتكە كىرىسكەنىمەن, ايتقانىمىزداي ەل ىشىندە كوپ جۇرەدى. ايتىپ وتكەنىمىزدەي, تراكتورعا وتىرا سالىپ, كوشە-كوشەنىڭ قارىن كۇرەپ شىعۋ – جاس اكىم ءۇشىن وپ-وڭاي شارۋا.
– حالىق سەنىم ارتىپ وتىرعان سوڭ مويىنعا مىندەتتەلگەن جۇمىستاردى ىستەيمىز. ءبارى ەل يگىلىگى ءۇشىن. كورىپ وتىرسىزدار, كاتونقاراعاي اۋىلىندا اۋىزسۋ جۇيەسى تارتىلدى, جۇمىستار اياقتالدى. كوكتەمدە ءۇيدى-ۇيگە سۋ بەرەمىز. ال تەحنيكا تىزگىندەۋىمە تاڭعالاتىنداي تۇك جوق. كىشكەنتايدان كولىككە جاقىن بولىپ ءوستىم, قىزىقتىم. قارا جۇمىستان قاشۋعا بولمايدى, – دەيدى وكرۋگ اكىمى.
ءيا, ءبىر ەمەس, بۇتىندەي ءۇش اۋىل سەنىم ارتىپ وتىرعان سوڭ ەلدىڭ ءۇمىتىن اقتاۋ ءار باسشىنىڭ پارىزى, حالىق الدىنداعى قارىزى. ەلىم دەپ تۇرعان اكىمدەر كوپ بولسا, جەرىم دەپ تۇرعان ەل ەسەلەنەدى.
شىعىس قازاقستان وبلىسى,
كاتونقاراعاي اۋدانى
