استانا. 9 مامىر. قىرعىزستان ىشكى ىستەر مينيسترلىگىنىڭ قىزمەتكەرلەرى ايەلدەردى سيريا تەرريتورياسىندا بولىپ جاتقان ۇرىس قيمىلدارىنا قاتىسۋعا ازعىرىپ, اتتاندىرىپ تۇرۋمەن اينالىساتىن قىلمىستىق توپ ارەكەتىنىڭ جولىن كەستى. بۇل تۋرالى قىرعىزستان ىشكى ىستەر مينيسترلىگىنەن حابارلاندى.
«ءبىزدىڭ قىزمەتكەرلەرىمىز جۇرگىزگەن جەدەل شارالاردىڭ ناتيجەسىندە وڭتۇستىك ايماقتا ايەلدەر ەكسترەميزمى دەپ اتالاتىن جۇيە انىقتالدى, - دەلىنگەن ۆەدومستۆو ءباسپاسوز قىزمەتى تاراتقان حابارلامادا. – ول ەلدىڭ وڭتۇستىك ايماقتارىندا جۇمىس جاساپ جاتقان ۇگىتشىلەردەن, ازعىرۋشىلاردان جانە ولاردىڭ ليدەرلەرىنەن قۇرالعان».
ازعىرۋعا ءتۇسىپ قالعانداردىڭ ءبارى ايەلدەر بولىپ شىقتى. ولار قىرعىزستاندا «اتينچا» دەپ اتالاتىن ايەلدەر اراسىنداعى ەكسترەميستەردىڭ استىرتىن ۇيىمىنىڭ مۇشەلەرى بولىپ تابىلادى.
مينيسترلىكتىڭ مالىمەتى بويىنشا, بۇل توپ سوڭعى ۋاقىتتارى بەلسەندىلىكتەرىن ارتتىرعان. «ولارعا وزدەرى ۇدايى بايلانىس جاساپ تۇراتىن جەكەلەگەن بىرلەستىكتەر, قورلار مەن ۇكىمەتتىك ەمەس ۇيىمدار ۇلكەن كومەك كورسەتەدى», - دەلىنگەن حابارلامادا. مۇنداي ۇيىمداردىڭ ءبىر بولىگى ءدىني-اعارتۋ جۇمىستارىمەن اينالىسادى. «ايەلدەر ەكسترەميستىك ۇيىمدارىنىڭ ءدىني ليدەرلەرى وزدەرىنە ىڭعايلارى كەلەتىن بويجەتكەندەردى ىزدەستىرىپ, ولاردىڭ پسيحولوگيالىق, مورالدىق جانە باسقا دا ەرەكشەلىكتەرىن زەرتتەۋمەن شۇعىلدانعان, - دەپ اتاپ كورسەتەدى مينيسترلىك. – سوسىن ودان ءارى دايىندىقتان ءوتۋدى ۇسىنادى».
قىرعىز ميليتسياسىنىڭ قىزمەتكەرلەرى قاتارعا جاڭادان قابىلدانعاندار ساپىندا «ەكسترەميستىك يدەيالار ءۇشىن ءوز ومىرلەرىن قۇربان ەتۋگە دايىن تۇرعانداردىڭ كوپ» ەكەنىن اتاپ وتەدى. ازىرگە تەرگەۋدىڭ مۇددەسىنە وراي ۇستالعان توپ مۇشەلەرى جونىندەگى مالىمەتتەر تاراتىلىپ وتىرعان جوق.
رەسمي مالىمەتتەر بويىنشا, وتكەن جىلى سيريا مەن يراكقا ۇرىس قيمىلدارىنا قاتىسۋ ءۇشىن قىرعىزستاننان 230-عا جۋىق ادام اتتانسا, ولاردىڭ 30-ى ايەلدەر بولعان. كەتكەندەردىڭ 30-عا جۋىعى قازىرگە دەيىن قازا تاپقان.
مۇرات ايتقوجا.
دەرەك, سۋرەت: قىرعىزستان ىشكى ىستەر مينيسترلىگى.
