جومارت جان» سىيلىعى 2016 جىلدان بەرى وڭىردەگى قولى اشىق, قايىرىمدى ءىسى كوپ كاسىپكەرلەرگە, ۇلتارالىق كەلىسىم مەن بىرلىكتى نىعايتۋعا اتسالىسىپ جۇرگەن بەلسەندى ازاماتتارعا بەرىلىپ كەلەدى.
سالتاناتتى ءىس-شارادا وبلىس اكىمىنىڭ ورىنباسارى 25 ادامعا قازاقستان حالقى اسسامبلەياسىنىڭ «بىرلىك» التىن مەدالىن, قازاقستان حالقى اسسامبلەياسىنىڭ جانە مادەنيەت جانە اقپارات مينيسترلىگىنىڭ العىس حاتتارىن تابىس ەتتى.
ماراپات يەلەرىنىڭ ارقايسى ءوز سالاسىندا تابىستى ەڭبەك ەتىپ, اينالاسىنا شاراپاتىن تيگىزىپ جۇرگەن جاندار. ماسەلەن, امانگەلدى ءوڭىرىنىڭ ابىرويىن اسىرىپ, ەل يگىلىگى ءۇشىن ەڭبەك ەتىپ جۇرگەن كاسىپكەردىڭ ءبىرى – كوپ بالالى انا جانەركە وتەگەنقىزى.
«تومي نۇر» شارۋا قوجالىعىن باسقاراتىن كاسىپكەر كوپ جىلدان بەرى قايىرىمدىلىقپەن اينالىسىپ كەلەدى. ماسەلەن, بيىل وبلىستىق «مەكتەپكە جول» رەسپۋبليكالىق اكتسياسى اياسىندا اۋىل وقۋشىلارىنا قاجەتتى وقۋ قۇرالدارىن تاراتتى. جانەركە وتەگەنقىزى مۇقتاج وتباسىلارعا ۇزبەي قولداۋ جاساپ, كومەك كورسەتىپ وتىرادى.
«بۇگىن ءبىزدىڭ ازعانتاي ەڭبەگىمىزدى جوعارى باعالاپ, قۇرمەت كورسەتىپ جاتىر. وتە ريزامىن. ءوزىم دە كوپ بالالى انا بولعاندىقتان, بالا باعۋدىڭ قانداي قيىن ەكەنىن جاقسى بىلەمىز. سوندىقتان شامامىز جەتكەنشە, جالعىزباستى انالارعا, كوپ بالالى وتباسىلارعا, زاعيپتارعا قول ۇشىن بەرىپ تۇرۋدى پارىز سانايمىز», دەيدى كاسىپكەر.
قوستاناي وبلىسى
