ەندى ماڭعىستاۋلىقتار ءموبيلدى وقىتۋ ورتالىعى ارقىلى بىرنەشە ماماندىقتى مەڭگەرۋ مۇمكىندىگىنە يە. ماڭعىستاۋ وبلىستىق ءبىلىم باسقارماسى ءباسپاسوز قىزمەتىنىڭ مالىمەتىنشە, ورتالىق اسپاز-كونديتەر, شاشتاراز, تىگىنشى ماماندىقتارى بويىنشا كاسىبي دايىندىق كۋرستارىن جۇرگىزۋگە قاجەتتى قۇرال-جابدىقتارمەن, اسپاپتارمەن تولىق جابدىقتالعان.
ءموبيلدى وقۋ ورتالىعى شالعاي اۋىلدارداعى ازاماتتاردى جۇمىسشى ماماندىقتارعا وقىتۋعا وتە ىڭعايلى, سەبەبى سول جەرگە بارىپ, جابدىقتالعان جىلجىمالى وقۋ ورتالىعىندا تاجىريبەگە نەگىزدەلگەن وقۋ مۇمكىندىگىن ۇسىنادى.
– نەگىزگى ماقسات – كاسىبي داعدىلاردى كۇشەيتۋ, ءوز ءىسىن اشۋعا جاعداي جاساۋ, وبلىس بويىنشا قىزمەت كورسەتۋ سالاسىنداعى جۇمىسشى ماماندىقتاردى دامىتۋ. كۋرستاردىڭ ۇزاقتىعى باعدارلاما باعىتى مەن كولەمىنە قاراي 1 ايدان 6 ايعا دەيىن سوزىلادى. ساباقتاردى تاجىريبەلى وندىرىستىك وقىتۋ شەبەرلەرى مەن ارنايى ءپان مۇعالىمدەرى جۇرگىزەدى. وقىتۋ توپتىق فورماتتا وتەدى, ءبىر توپتا ورتا ەسەپپەن 8–10 ادام بولادى, – دەدى اتالعان كوللەدج ديرەكتورى ىلەس نۇرادينوۆ.
ءموبيلدى وقىتۋ ورتالىعى اۋىلدىق جەرلەردەگى سۇرانىسقا يە جۇمىسشى ماماندىقتارىن مەڭگەرۋگە مۇمكىندىك بەرەدى. ماماندىقتى يگەرگەن سوڭ, ولار كاسىپكەرلىك داعدىلارىن دامىتىپ, ءوز بەتىمەن جۇمىس ىستەي الادى. ءارى قاراي تاپسىرىس قابىلداپ, بيزنەس-گرانتتارعا قاتىسۋعا مۇمكىندىك تۋادى. ورتالىق تاجىريبەلىك داعدىلاردى جەتىلدىرۋگە, ەڭبەك نارىعىندا سەنىمدى بولۋعا كومەكتەسەدى.
قازىر ءموبيلدى وقىتۋ ورتالىعىنىڭ قىزمەتىن جاڭا باعىتتا كەڭەيتۋ جوسپارلانىپ وتىر. بۇعان دەيىن ورتالىقتىڭ نەگىزگى باعىتى قىسقامەرزىمدى كاسىبي وقىتۋ مەن كۋرستىق دايىندىق وتكىزۋ بولسا, ەندىگى ماقسات – وقىتۋ سالاسىن كەڭەيتۋ ءارى جاڭا جۇمىس فورمالارىن ەنگىزۋ.
وسى باعىتتاردىڭ ءبىرى رەتىندە اۋىلدىق ەلدى مەكەندەردەگى مەكتەپ وقۋشىلارىمەن كاسىبي باعدار بەرۋ جۇمىستارى قاراستىرىلىپ جاتىر. بۇل باستاما وقۋشىلارعا ماماندىقتى سانالى تۇردە تاڭداۋعا, بولاشاق كاسىبي ماقساتتارىن انىقتاۋعا مۇمكىندىك بەرەدى.
كوللەدج ديرەكتورىنىڭ ورىنباسارى اينات باقىتجانقىزىنىڭ ايتۋىنشا, بۇل جوبا اۋىل تۇرعىندارىنىڭ ساپالى بىلىمگە قولجەتىمدىلىگىن ارتتىرۋعا باعىتتالعان.
– وقىتۋ ورتالىعى 4 ءتۇرلى ماماندىق بويىنشا ارنايى جابدىقتالعان. اتاپ ايتقاندا, وقىتۋ اسپاز, كونديتەر, شاشتاراز, تىگىن باعىتتارىن قامتيدى. اۋىل تۇرعىندارى الدىن الا ءوتىنىم قالدىرسا, ءبىز كەز كەلگەن ەلدى مەكەنگە بارىپ, ساباق وتكىزەمىز. كۋرس اياقتالعان سوڭ قاتىسۋشىلارعا كۋالىك تابىستايمىز. بارلىق وقۋ قۇرالدارى مەن قاجەتتى ونىمدەر كوللەدج تاراپىنان ۇسىنىلادى. وقىتۋ اياقتالعاننان كەيىن سەرتيفيكات بەرىلەدى, دەيدى ول.
بۇگىنگە دەيىن ءموبيلدى ورتالىق 3 اۋىلدى ارالاپ, 100-دەن اسا ادامعا ءبىلىم بەرگەن. الداعى ۋاقىتتا جوبا اياسىندا باسقا دا اۋدان, اۋىلدارعا بارۋ جوسپارلانىپ وتىر.
بۇل باستاما — ءموبيلدى وقىتۋدىڭ وڭىردە دامىپ كەلە جاتقان جاڭا باعىتى. ول اۋىل جاستارى مەن تۇرعىندارىنا ەلدى مەكەنىنەن شىقپاي-اق, جاڭا كاسىپ مەڭگەرۋگە مۇمكىندىك بەرىپ وتىر.
ماڭعىستاۋ وبلىسى
