تارازدا توتەنشە جاعداي جاريالاندى

تاراز. 20 اقپان. تاراز قالاسىندا كۇكىرت قىشقىلى قۇيىلعان ۆاگونداردىڭ تەمىر جولدان شىعىپ كەتۋىنە بايلانىستى توتەنشە جاعداي جاريالاندى. بۇل تۋرالى جامبىل وبلىستىق توتەنشە جاعداي دەپارتامەنتىنىڭ ءباسپاسوز حاتشىسى ساۋلە مۇناتاەۆا حابارلادى. وقيعا وبلىس اۋماعىنداعى شايقورىق جانە بۋرىل ستانسالارىنىڭ اراسىندا ورىن العان. بۇل ستانسالار تاراز قالاسىنا تاياق تاستام جەردە. كۇكىرت قىشقىلى قۇيىلعان 7 تسيستەرنا تەمىرجولدان شىعىپ كەتىپ, ونىڭ ۇشەۋى جانىنا اۋدارىلعان. وسىنىڭ ناتيجەسىندە ءبىر تسيستەرنادان بەلگىسىز مولشەردە كۇكىرت قىشقىلى توگىلدى. رەسەيدەن شىققان بۇل پويىز تاراز قالاسىنىڭ ىرگەسىندەگى «قازفوسفات» كاسىپورنىنا بارۋى كەرەك ەكەن. «قازفوسفات» – مينەرالدى تىڭايتقىشتار شىعاراتىن الىپ كاسىپورىن. 44 ۆاگوننىڭ 15 تسيستەرناسىنا كۇكىرت قىشقىلى قۇيىلعان. ءدال قازىر كۇكىرت قىشقىلى توگىلگەن جەردە زالالسىزداندىرۋ جۇمىستارى ءجۇرىپ جاتىر. ارنايى قۇرىلعىلاردىڭ كومەگىمەن تۇنگى ساعات 04.15-تە ىشىندەگى سۇيىقتىعى توگىلگەن تسيستەرنا ورنىنان قويىلىپ, كوميسسيانىڭ تەكسەرۋى ءۇشىن زاۋىت ستانساسىنا جەتكىزىلدى. وقيعا ورنىندا وبلىستىڭ توتەنشە جاعداي جونىندەگى قىزمەتكەرلەرى, ءورت سوندىرۋشىلەر, قۇتقارۋ قىزمەتى, وبلىستىق, قالالىق, اۋداندىق اكىمدىكتەردىڭ قىزمەتكەرلەرى جۇمىس ىستەۋدە. ورالحان ءداۋىت. دەرەك, سۋرەت: جامبىل وبلىستىق توتەنشە جاعداي دەپارتامەنتىنىڭ ءباسپاسوز قىزمەتى.