فوتو: istockphoto.com
دەپۋتات اسحات ايماعامبەتوۆ جەدەل جاردەمگە كۇش كورسەتۋ – جاي عانا توبەلەس ەمەس, تىكەلەي ادام ومىرىنە قاۋىپ توندىرەتىن ارەكەت ەكەنىن اتاپ ءوتتى.
«ماس بۇزاقى جەدەل جاردەم جۇرگىزۋشىسىن ۇرعان كەزدە, ول ونى عانا ۇرىپ جاتقان جوق. ول – كورشى كوشەدە تىنىسى توقتاپ جاتقان, دەنە قىزۋى كوتەرىلىپ, سول جاردەمدى كۇتىپ جاتقان كىشكەنتاي بالانى ۇردى. ول – ينسۋلت نەمەسە ينفاركت العان, ەندى سول جەدەل جاردەم جەتە المايتىن اجەنى ۇردى. ءبىر بۇزاقىنىڭ كەسىرىنەن جەدەل جاردەمنىڭ ءبىر بريگاداسى, كولىگى ىستەن شىعىپ قالادى. سوندىقتان وسى جاردەمنىڭ ناۋقاستارعا جەتۋ ۋاقىتى ۇزاردى. ال ينفاركت پەن ينسۋلت كەزىندە ەسەپ ساعاتپەن ەمەس, مينۋتپەن ولشەنەتىنىن جاقسى بىلەمىز. سوندىقتان بۇل – ءومىر مەن ءولىم ماسەلەسى», دەدى ول.
دەپۋتات سوڭعى بەس جىلدا دەنساۋلىق ساقتاۋ مينيسترلىگى 280 فاكتى تىركەگەنىن, بىراق بۇل كورسەتكىش ناقتى جاعدايدىڭ شاعىن بولىگى عانا بولۋى مۇمكىن ەكەنىن ايتتى. ونىڭ پايىمىنشا, بۇگىندە كوپتەگەن مەديتسينا قىزمەتكەرى شاعىمدانبايدى.
«ويتكەنى ولاردى قورعايتىنىنا سەنىم جوق. بۇعان قوسا, دارىگەرلەر جۇمىستىڭ ورنىنا تەرگەۋمەن جۇرۋگە ۋاقىت جوعالتقىسى كەلمەيدى», دەدى اسحات ايماعامبەتوۆ.
ەستەرىڭىزگە سالا كەتەيىك, قوستانايدا كەزەك كۇتىپ تۇرعان ناۋقاستىڭ ءبىرى ورىنسىز جانجال كوتەرىپ, دارىگەرگە جۇدىرىق جۇمساعان. وقىستان تيگەن سوققىنىڭ سالدارىنان حيرۋرگ جانساقتاۋ بولىمىنە تۇسكەن.
سونىمەن قاتار قاراعاندىدا 12 ماۋسىم كۇنى وبلىستىق بالالار اۋرۋحاناسىندا 38 جاستاعى ەر ادام ەكى دارىگەرگە كۇش قولدانعان.
