شەكارا ماڭىنداعى ەكونوميكالىق حابتار دامىپ كەلەدى

وزبەكستانمەن شەكارادا ورنالاسقان «ورتالىق ازيا» ونەركاسىپتىك كووپەراتسيا ورتالىعىنا بيىلعى 31 ناۋرىزدا «تۇران» ارنايى ەكونوميكالىق ايماعى مارتەبەسى بەرىلدى. قۇرىلىستىڭ ءبىرىنشى كەزەڭىندە 100 گەكتار اۋماقتا سەگىز وندىرىستىك عيمارات بوي كوتەرىپ, جول مەن ينجەنەرلىك ينفراقۇرىلىم جۇرگىزىلىپ جاتىر. جۇمىس جىل سوڭىنا دەيىن تولىعىمەن اياقتالادى.

«ال ەكىنشى كەزەڭدە پولي-ۆينيل-حلوريد (پۆح) ونىمدەرى, تامشىلاتىپ سۋارۋ جۇيەلەرى, اۋىل شارۋاشىلىعى داقىلدارىن قايتا وڭدەۋ باعىتىنداعى 7 جوبا جۇزەگە اسادى. بۇعان قوسا يندۋستريالىق پارك سالۋ كوزدەلگەن. جالپى 185,1 ملرد تەڭگە ينۆەستيتسيا تارتىلىپ, 1150 جۇمىس ورنى اشىلادى. ورتالىق كەلەسى جىلى ىسكە قوسىلادى», دەدى ساۋدا جانە ينتەگراتسيا ءمينيسترى ارمان شاققاليەۆ

ورال اۋەجايى ماڭىندا ورنالاسقان «ەۋرازيا» ترانسشەكارالىق ساۋدا ورتالىعىن» «اقجايىق» الەۋمەتتىك-كاسىپكەرلىك كورپوراتسياسى باسقارادى. باتىس قازاقستان وبلىسىندا قۇنى شامامەن 140 ملرد تەڭگە بولاتىن قۇرىلىس ماتەريالدارى, جيھاز, شىنى, مۇناي-گاز جابدىقتارى مەن پلاستماسسا وندىرىسىنە قاتىستى 16 جوبا ىسكە قوسىلماقشى.

اتاقتى قورعاس كەشەنى ەكى ارنايى ەكونوميكالىق ايماقتان تۇرادى. «قورعاس» «قورعاس» حالىقارالىق شەكارا ماڭى ىنتىماقتاستىق ورتالىعى ارنايى ەكونوميكالىق ايماعى اۋماعىندا جالپى قۇنى 234,4 ملرد تەڭگەنى قۇرايتىن 41 جوبا جوسپارلانعان. ونىڭ 8-ءى ىسكە قوسىلدى, قالعانى 2027 جىلعا دەيىن اياقتالادى.

«قورعاس – شىعىس قاقپاسى» ايماعىندا 64 قاتىسۋشى تىركەلگەن. مۇندا 58,6 ملرد تەڭگەنىڭ 32 جوباسى جۇزەگە اسىرىلىپ, 2300 جۇمىس ورنى قۇرىلدى. تاعى 848,6 ملرد تەڭگەلىك 32 جوبا دايىندىق ۇستىندە. ولاردىڭ قاتارىندا جەل ەنەرگەتيكاسى قوندىرعىلارىن, ەنەرگيا ساقتاۋ جۇيەلەرىن, مەتالل بۇيىمدارىن, كوفە مەن شاي ونىمدەرىن شىعاراتىن زاۋىتتار بار.

ينفراقۇرىلىمدى كۇشەيتۋ جوبالارى اتالعان ورتالىقتاردىڭ وتكىزۋ قابىلەتىن ارتتىرىپ, وڭىرارالىق ساۋدا مەن وندىرىستىك كووپەراتسيانى كەڭەيتۋگە مۇمكىندىك بەرەدى.