قاراعاندىداعى IT-ليتسەيىنىڭ «Ardobots» كومانداسى Blue Entrepreneurship Challenge كاتەگورياسىندا ءۇشىنشى ورىنعا شىقسا, ساران قالاسىنداعى №17 گيمنازيانىڭ «Robo Stars Saran jr» كومانداسى روبوفۋتبول جارىسىندا كۇمىس جۇلدە الدى.
Fibonacci International Robot Olympiad جىل سايىن ەڭ دارىندى جاس ينجەنەرلەردى جينايدى. بيىل جارىسقا 26 ەلدەن 2000-نان استام وقۋشى قاتىستى.
قاراعاندىلىق كوماندالار ءۇشىن فينالعا جەتۋ جولى وڭاي بولعان جوق: الدىمەن ولار رەسپۋبليكالىق كەزەڭدە تابىستى ونەر كورسەتىپ, بيىل كوكتەمدە تۇركيادا وتكەن ەۋرازيالىق ىرىكتەۋدەن سۇرىنبەي ءوتتى.
«Ardobots» كومانداسىنىڭ قۇرامىندا جەتىنشى سىنىپ وقۋشىلارى ءدىنالي سايات ۇلى مەن اڭسار ايتكەن بار. ولاردى تالىمگەرى قايرات يسمايلوۆ دايىنداپ, بىرنەشە جىل بويى جاس روبوتوتەحنيكتەردى تاربيەلەپ كەلەدى. ولاردىڭ «اكۆاريۋمعا اۆتوماتتاندىرىلعان كۇتىم جۇيەسى» جوباسى Blue Entrepreneurship Challenge كاتەگورياسىندا ءۇشىنشى ورىن الدى. بۇل كاتەگوريا وليمپياداداعى ەڭ كۇردەلى باعىتتاردىڭ ءبىرى بولىپ سانالادى جانە جاساندى ينتەللەكت, ماشينالىق كورۋ, باعدارلامالاۋ جانە ينجەنەرلىك ديزاين ەلەمەنتتەرىن بىرىكتىرەدى.
وقۋشىلار اكۆاريۋم يەلەرىنىڭ تيپتىك ماسەلەلەرىن زەرتتەپ, كۇندەلىكتى تۇرمىستىق مىندەتتەردى شەشۋگە ارنالعان اقىلدى جۇيە جاسادى: تەمپەراتۋرا مەن جارىقتى باقىلاۋ, بالىقتى ۋاقىتىندا تاماقتاندىرۋ, ەنەرگيانى ۇنەمدەۋ. بارلىق كونسترۋكتسيالاردى ولار وزدەرى 3D-پرينتەردە جاساپ شىقتى.
