كونفەرەنتسيا سالانىڭ ەڭ ۇلكەن كاسىبي وقيعاسىنىڭ ءبىرى رەتىندە جەتەكشى عالىمدار مەن ينجەنەرلەردى, مەملەكەتتىك ورگاندار مەن سالالىق ۇيىمدار وكىلىن بىرىكتىرگەن ماڭىزدى الاڭعا اينالدى.
ءىس-شارانى كولىك مينيسترلىگىنىڭ قولداۋىمەن «قازاقستان جول عىلىمي-زەرتتەۋ ينستيتۋتى» (قازجولعزي) ۇيىمداستىردى. مينيسترلىك تاپسىرماسىنا سايكەس, «قازجولعزي» اۆتوجول سالاسىنا جاڭا تەحنولوگيالار مەن عىلىمي جەتىستىكتەردى ەنگىزۋ باعىتىندا كەشەندى جۇمىستار جۇرگىزىپ جاتىر. ينستيتۋت الەمدىك تاجىريبەنى زەرتتەپ, نەگىزگى يننوۆاتسيالاردى تالداپ, ولاردى وتاندىق جاعدايعا بەيىمدەۋدىڭ مۇمكىندىكتەرىن باعالايدى. ءسويتىپ, پاراللەلدى تۇردە ەلىمىزدەگى جول سالاسىنىڭ عالىمدارى وزدەرىنىڭ ازىرلەمەلەرىن جۇرگىزىپ كەلەدى.
«بۇگىن اۆتوجول سالاسىنىڭ دامۋىنا ارنالعان بولەك باعدارلامانى قالىپتاستىرىپ وتىرمىز, وندا كولىك ينفراقۇرىلىمىن قالىپتاستىرۋ مەن قۇرىلىس سالاسىندا ەڭ جاڭا تەحنولوگيالاردى ەنگىزۋدى جوسپارلاپ جاتىرمىز», دەدى كولىك ۆيتسە-مينيستر ماقسات قالياقپاروۆ.
كونفەرەنتسياعا اقش, تۇركيا, رەسەي, يتاليا مەن ەۋروپالىق وداق ەلدەرى, بارلىعى 20-عا جۋىق مەملەكەتتىڭ سالالىق ساراپشىلارى قاتىستى. ولار جول سالاسىنىڭ قۇرىلىس پەن كۇتىپ ۇستاۋ سالاسىنداعى جاڭا ازىرلەمەلەر مەن ادىستەردى تانىستىردى.
وتاندىق ءارى شەتەلدىك قاتىسۋشىلار ماڭىزدى ءىس-شارادا جول سەكتورىن دامىتۋداعى باستى ماسەلەلەردى تالقىلادى. باستى نازاردا قاۋىپسىز جولدار, ستاندارتتاۋ مەن ساپا باقىلاۋى, ينتەللەكتۋالدى كولىك جۇيەلەرىن ەنگىزۋ مەن تسيفرلاندىرىلۋى, سونداي-اق جولداردى قىسقى ۋاقىتتا كۇتىپ-ۇستاۋ سياقتى سالانىڭ دامۋىنداعى ماڭىزدى باعىتتار بولدى. بۇل ماسەلەلەر اسىرەسە قاتال كليماتتىق جاعدايى بار ەلدەر ءۇشىن اسا وزەكتى.
كونفەرەنتسيا عىلىمي شەشىمدەر مەن وندىرىستىك تاجىريبەلەردى بىرىكتىرىپ, جول سالاسىنىڭ ەڭ وتكىر ماسەلەلەرىن شەشۋدىڭ ورتاق كوزقاراسىن قالىپتاستىرۋعا مۇمكىندىك بەردى. «قازجولعزي» وكىلدەرى وتاندىق ازىرلەمەلەردىڭ بۇگىنگى تاڭدا سالا ترانسفورماتسياسىنىڭ ماڭىزدى بولىگىنە اينالىپ, تاجىريبەدە ناقتى ناتيجەلەر كورسەتىپ جاتقانىن اتاپ ءوتتى.
«قازجولعزي» ازىرلەيتىن ماتەريالدار مەن تەحنولوگيالار قازىرگى ۋاقىتتا تاجىريبەلىك پايدالانۋعا ەنگىزىلىپ جاتىر. الىنعان ناتيجەلەر ولاردىڭ تيىمدىلىگىن ناقتى جاعدايدا راستاپ وتىر.
قازىردىڭ وزىندە وتاندىق جول عىلىمي زەرتتەۋلەرى, جولداردى كۇتىپ ۇستاۋ مەن جاڭا وبەكتىلەر قۇرىلىسىندا سۇرانىسقا يە باسەكەگە قابىلەتتى شەشىمدەر ۇسىنىپ وتىر. كونفەرەنتسيادا «قازجولعزي» عالىمدارى ازىرلەگەن بىرقاتار وتاندىق قوسپالار مەن ماتەريالداردى تانىستىردىق. ءبىز بۇل تەحنولوگيالاردى بەلسەندى تۇردە ەنگىزىپ جاتىرمىز ءارى العاشقى ناتيجەلەر ولاردىڭ تيىمدىلىگىن ناقتى جاعدايدا كورسەتىپ وتىر», دەيدى «قازجولعزي» عىلىمدى جانە يننوۆاتسيالاردى دامىتۋ دەپارتامەنتىنىڭ ديرەكتورى اديا جۇماعۇلوۆا.
وتاندىق ازىرلەمەلەر قاتارىندا عالىمدار كوكتايعاققا قارسى ماتەريالدار, توپىراق تۇراقتاندىرعىشتار مەن جول جامىلعىلارىنىڭ توزىمدىلىگىن ارتتىرۋعا باعىتتالعان يننوۆاتسيالىق قوسپالاردى ەرەكشە اتاپ ءوتتى. بۇل شەشىمدەر جول اكتيۆتەرىنىڭ قىزمەت ەتۋ مەرزىمىن ۇزارتۋعا ءارى پايدالانۋ شىعىندارىن تومەندەتۋگە مۇمكىندىك بەرەدى. تەحنولوگيالاردى جەرگىلىكتەندىرۋ ەلىمىزدىڭ سالالىق تاۋەلسىزدىگىن نىعايتىپ, حالىقارالىق نارىققا وتاندىق ونىمدەردى شىعارۋعا مۇمكىندىك بەرەدى.
