تۇركى حالىقتارىنىڭ مۋزىكالىق اسپاپتارىن جاساۋ ءداستۇرىن كەشەندى زەرتتەۋ, ەجەلگى تەحنولوگيالار مەن قازىرگى يننوۆاتسيالىق تاسىلدەردىڭ ءوزارا بايلانىسىن ايقىنداۋ, سونداي-اق شەبەرلەر, عالىمدار, ورىنداۋشىلار مەن زەرتتەۋشىلەر اراسىندا تاجىريبە الماسۋعا ارنالعان عىلىمي-پراكتيكالىق الاڭ قۇرۋ قاجەت. تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا ءداستۇر مەن قازىرگى زاماننىڭ بىرلىگى جاڭا زەرتتەۋلەرگە, تەحنولوگيالىق تاسىلدەرگە جانە حالىقارالىق عىلىمي ىنتىماقتاستىققا كەڭ مۇمكىندىكتەر اشاتىنىن اتاپ ءوتىپ, سيمپوزيۋم وسى سالاداعى مامانداردى بىرىكتىرەتىن ماڭىزدى پلاتفورما ەكەنىن نازارعا الدى. پلەنارلىق وتىرىستا پارلامەنت سەناتىنىڭ دەپۋتاتى, اكادەميك دارحان قىدىرالى, مادەنيەت جانە اقپارات مينيسترلىگى مادەنيەت كوميتەتىنىڭ توراعاسى ەرلان داكەنوۆ, قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ باس حاتشىسى جانار شايمەنوۆا, «ماجار مۇراسى ءۇيى» باس كەڭەسشىسى, ماجارستاننىڭ ەڭبەك سىڭىرگەن ءارتىسى اكوچ گەرگەي ءسوز سويلەدى. سيمپوزيۋم اياسىندا «ورتاق ءۇن: تۇركى مۋزىكالىق اسپاپتارىن زەرتتەۋ جانە حالىقارالىق ىنتىماقتاستىق» تاقىرىبىندا دوڭگەلەك ۇستەل ۇيىمداستىرىلدى. تالقىلاۋ بارىسىندا تۇركى حالىقتارىنىڭ مۋزىكالىق مۇراسىن زەرتتەۋ جانە وسى سالاداعى ينستيتۋتسيونالدىق ىنتىماقتاستىقتى كەڭەيتۋ ماسەلەلەرى كوتەرىلدى.
ءىس-شارادا تۇركى مادەنيەتى جانە مۇراسى قورى مەن ۋزەير گادجيبەيلي اتىنداعى باكۋ مۋزىكا اكادەمياسى بىرلەسىپ باسىپ شىعارعان «تۇركىتىلدەس مەملەكەتتەردىڭ ۇلتتىق مۋزىكالىق اسپاپتارى» كىتابىنىڭ تانىستىرىلىمى ءوتتى. ەڭبەك ءتورت تىلدە دايىندالعان. باسىلىم حالىقارالىق دەڭگەيدە تۇركى مۋزىكالىق مۇراسىن تانىستىرۋ مەن عىلىمي جۇيەلەۋدىڭ ماڭىزدى كوزى ىسپەتتى.
قاتىسۋشىلار تۇركى حالىقتارىنىڭ مۋزىكالىق اسپاپتارىن جاساۋ مۇراسىن ساقتاۋ, زەرتتەۋ جانە بولاشاق ۇرپاققا جەتكىزۋگە ارنالعان قارار قابىلدادى. قۇجاتتا مۋزىكالىق اسپاپتار بويىنشا بىرىڭعاي عىلىمي بازا قۇرۋ, ءداستۇرلى شەبەرلىك مەكتەپتەرىن جۇيەلى زەرتتەۋ, مۋزىكالىق اسپاپ جاساۋدى وقىتاتىن ارنايى كۋرستاردى ءبىلىم باعدارلامالارىنا ەنگىزۋ, سونداي-اق تسيفرلىق ارحيۆتەۋ, 3D-مودەلدەۋ جانە حالىقارالىق عىلىمي ىنتىماقتاستىقتى كەڭەيتۋ سياقتى باسىم باعىتتار كورسەتىلگەن. قاراردا يۋنەسكو جانە يسەسكو اياسىندا تۇركى مۋزىكالىق مۇراسىن حالىقارالىق دەڭگەيدە كەڭىنەن تانىستىرۋعا باعىتتالعان بىرلەسكەن باستامالاردى دامىتۋ كوزدەلگەن جانە تۇركى حالىقتارىنىڭ مۋزىكالىق اسپاپ شەبەرلەرى اسسوتسياتسياسىن قۇرۋ مۇمكىندىگىن قاراستىرۋعا كەلىسىم بىلدىرىلگەن.
