اقتوبەدە جەتكىنشەكتەر قورىمدى قيراتىپ كەتتى

استانا. 9 مامىر. اقتوبە ماڭىنداعى بەستاماق اۋىلىندا كەلەڭسىز وقيعا بولدى. ناقتى ايتساق, جەتكىنشەكتەر اۋىلداعى قورىمدى قيراتىپ كەتكەن. بۇل تۋرالى aktobetimes.kz حابارلادى. جەلىككەن جاستار بەيىت باسىنداعى گرانيت ەسكەرتكىشتەردى قيراتىپ, القاگۇلدەرىن تاپتاپ, قورشاۋلارى مەن كرەستەرىن سىندىرىپ تاستاعان. قورىمدى قورلاعان بۇزاقىلار بىردەن ۇستالدى. ولار جاستارى نەبارى 13-14-تەگى بەستاماق اۋىلىنىڭ بالالارى بولىپ شىقتى. كامەلەتتىك جاسقا تولماعان جەتكىنشەكتەردىڭ بۇل ارەكەتكە نە ءۇشىن بارعاندارى بەلگىسىز. الايدا, وسى ەسسىز قىلىقتارىمەن ولاردىڭ تالايدىڭ جانىن جارالاعاندارى انىق. قالالىق ىشكى ىستەر دەپارتامەنتىنىڭ حابارلاۋىنشا, ۇستالعان جەتكىنشەكتەردىڭ بارلىعى ءوز كىنالارىن تولىق مويىندارىنا العان. بەيىت باسىنداعى بۇل باسسىزدىق تۋرالى اكتوبەلىك تۇرعىننىڭ ءبىرى الەۋمەتتىك جەلىدەگى جەكە پاراقشاسىندا جاريالاعان. پاراقشادا: «بۇگىن تاڭدا اپكەم حابارلاسىپ, بەستاماقتاعى قورىمدا اجەمنىڭ باسىنا قويعان ەسكەرتكىشتى سىندىرىپ كەتكەنى تۋرالى جىلاپ تۇرىپ ايتتى. بەيىت باسىنا كەلگەندە – جاعامىزدى ۇستادىق. بۇزاقىلار ەسكەرتكىشكە اق بوياۋ جاعىپ, بىرنەشە بولىككە سىندىرىپ كەتكەن. بەيىتتىڭ جانىندا تۇرعان گۇل سالاتىن قۇمىرا دا قيراپ جاتىر. گۇلدەردىڭ ءبارى قوپارىلعان. ىدىستار سىنىپ, بۇزاقىلار وزگە ءبىر يكونداردى قالدىرىپ كەتكەن. بەيىتتەن ۇلكەن كولەمدى اياق كيىمنىڭ ىزدەرى انىق كورىنەدى. ءبىز وسىلاي قيراپ جاتقان 12 بەيىتتى ساناپ شىقتىق. ونىڭ بارلىعى قارا ءمارماردان تۇرعىزىلعان ەسكەرتكىشتەر. بۇزىلعان تاعى 4 بەيىتتىڭ باسىندا كرەست بولعان. بۇل سوتقارلاردى تابادى دەگەن سەنىمدەمىن. ەسكەرتكىش پەن قورشاۋعا كەتكەن اقشا دا ماڭىزدى ەمەس. تەك وسىنداي باسسىزدىققا بارعانداردىڭ كوزىنە قاراعىم كەلەدى!», – دەپ جازىلعان. قورىمنىڭ قيراپ جاتقانى تۋرالى 2 مامىر كۇنى بەلگىلى بولدى. جابىرلەنۋشىلەر وقيعا ورنىنا بىردەن پوليتسيا قىزمەتكەرلەرىن شاقىرتادى. ءتارتىپ ساقشىلارى گرانيت تاستاردان ساۋساق تاڭبالارىن ءتۇسىرىپ, بەستاماق اۋىلىنىڭ تۇرعىندارىنان جاۋاپ الدى. قازىرگى تاڭدا بۇل كەلەڭسىز جايتقا قاتىستى «ۆانداليزم» بابىمەن قىلمىستىق ءىس قوزعالدى. ەلامان قوڭىر. دەرەك: aktobetimes.kz. سۋرەت: rubsev.ru.