2025 جىلدىڭ 9 ايىندا نارەستە ءولىمىنىڭ كورسەتكىشى وتكەن جىلدىڭ سايكەس كەزەڭىمەن سالىستىرعاندا 19,3% - عا تومەندەپ, 1000 ءتىرى تۋىلعانعا 5,84 قۇرادى (2024 جىلى – 7,24).
تيمۋر سۇلتانعازيەۆ مۇنداي ناتيجەلەر العاشقى مەديتسينالىق كومەكتى دامىتۋ, انا مەن بالا دەنساۋلىعىن ساقتاۋ قىزمەتتەرىن نىعايتۋ, جاڭا تۋعان نارەستەلەردى باقىلاۋدىڭ زاماناۋي حاتتامالارىن ەنگىزۋ بويىنشا جۇيەلى جۇمىستاردىڭ ارقاسىندا مۇمكىن بولعانىن اتاپ ءوتتى.
سونداي-اق, ءبىرىنشى ۆيتسە-ءمينيستردىڭ ايتۋىنشا, ءۇش وڭىردە: اتىراۋ, اباي جانە جەتىسۋ وبلىستارىندا نەوناتالدىق ءولىم كورسەتكىشتەرىن جاقسارتۋ ءۇشىن الەۋەت بار. دەنساۋلىق ساقتاۋ مينيسترلىگى جەرگىلىكتى اتقارۋشى ورگاندارمەن بىرلەسىپ قويىلعان ماقساتتارعا قول جەتكىزۋ ءۇشىن شارالار قابىلداۋدا.
قول جەتكىزىلگەن جەتىستىكتەرگە قاراماستان, دەنساۋلىق ساقتاۋ مينيسترلىگى بالالاردىڭ ءومىر ءسۇرۋ ساپاسىن جاقسارتۋ بويىنشا جۇمىستى جالعاستىرادى. ەرەكشە نازار اۋدارىلادى:
➤ مساك دەڭگەيىندە پەدياتريالىق ستاتسيونارلار مەن قىزمەتتەردى دامىتۋ;
➤ ەرتە ارالاسۋ ورتالىقتارىن قۇرۋ جانە كەڭەيتۋ;
➤ پاتروناج قىزمەتىن نىعايتۋ جانە ونى تولىقتىرۋ;
➤ بالالارداعى اۋرۋلاردىڭ الدىن الۋدى جانە ەرتە انىقتاۋدى كۇشەيتۋ.
ء«ار بالانىڭ دەنساۋلىعى - ءبىزدىڭ باسىمدىعىمىز. ءبىز ەلىمىزدىڭ ءار وڭىرىندە زاماناۋي جانە ساپالى مەديتسينالىق قىزمەتتەر قولجەتىمدى بولاتىنداي وڭ وزگەرىستەردى كورىپ, جۇمىستى جالعاستىرامىز», دەپ اتاپ ءوتتى ءبىرىنشى ۆيتسە-مينيستر تيمۋر سۇلتانعازيەۆ.
دەنساۋلىق ساقتاۋ مينيسترلىگى قازاقستاننىڭ كىشكەنتاي ازاماتتارىنىڭ دەنساۋلىعىن قورعاۋعا باعىتتالعان شارالاردىڭ وڭ سەرپىنىن ساقتاپ, نىعايتۋعا نيەتتى.
