فوتو: قاراعاندى وبلىسىنىڭ اكىمدىگى
جاڭا فۋتبول ەكوجۇيەسى جانە 18,5 ملرد تەڭگە ينۆەستيتسيا
قاراعاندى وبلىسىنىڭ اكىمدىگى مەن تيمۋر تۋرلوۆ وڭىردە جاڭا فۋتبول ەكوجۇيەسىن قۇرۋ جۇمىستارىن باستاپ كەتكەن. بۇل ماقساتقا جالپى 18,5 ملرد تەڭگە بولىنگەن:
- 12 ملرد تەڭگە – جاڭا فۋتبول اكادەمياسىن سالۋعا;
- 6,5 ملرد تەڭگە – بالالار-جاسوسپىرىمدەر مەن بۇقارالىق فۋتبولدى دامىتۋعا.
ءىرى جوبالار: ALGA!, Freedom BFL جانە زاماناۋي اكادەميا
قاراعاندى وبلىسىنىڭ فۋتبول قاۋىمداستىعى (QOFA) پرەزيدەنتى حابارلاعانداي, تيمۋر تۋرلوۆتىڭ قولداۋىمەن بىرقاتار ءىرى جوبالار جۇزەگە اسىرىلىپ جاتىر. ولار:
- مەكتەپتىك ALGA! جوباسى – 2029 جىلعا دەيىن 40 مىڭنان استام مەكتەپ وقۋشىسى مەن 3600 ستۋدەنتتى قامتيدى, فۋتبول باستامالارى 100-دەن استام وقۋ ورنىندا ىسكە اسىرىلادى;
- رەسمي بالالار-جاسوسپىرىمدەر ليگاسى Freedom BFL;
- زاماناۋي «شاحتيور» فۋتبول اكادەمياسىنىڭ قۇرىلىسى جانە ءوڭىردى كەشەندى دامىتۋ ستراتەگياسى.
اكادەميا وبلىستاعى بۇقارالىق جانە كاسىبي فۋتبولدى دامىتۋداعى باستى نىسانعا اينالىپ, ورتالىعىندا بالالار-ءجاسوسپىرىم فۋتبولى, ينفراقۇرىلىمدىق جوبالار مەن الەۋمەتتىك باستامالار ورنالاسادى.
اكادەميا شامامەن 10 گەكتار جەردى الادى. جوبا اياسىندا جىل بويى دايىندىق جاساۋعا ارنالعان جابىق مانەج, تولىق ولشەمدى جاتتىعۋ الاڭى, ەكى قاباتتى اكىمشىلىك-بولمە كەشەنى, مەديتسينالىق ورتالىق, باسسەين, ساۋنا, اسحانا جانە تاربيەلەنۋشىلەرگە ارنالعان جاتاقحانا قاراستىرىلعان. بارلىق نىساندار جىلى دالىزدەر ارقىلى بايلانىستىرىلىپ, اۋماققا ۆوركاۋت-زونا, ترەناجەرلار, ساياباق جانە اۆتوتۇراق ورناتىلادى.
نەگىزگى قۇرىلىس جۇمىستارىن 2027 جىلى اياقتاۋ جوسپارلانعان.
جاتتىقتىرۋشىلار ءۇشىن حالىقارالىق تاعىلىمدامالار مەن UEFA ليتسەنزيالارىن الۋ مۇمكىندىگىن قامتيتىن بىلىكتىلىكتى ارتتىرۋ باعدارلامالارى ەنگىزىلگەن. جاڭا جوبا تەك قالالاردا عانا ەمەس, اۋىلدىق ەلدى مەكەندەردە دە جۇيەلى تۇردە سپورت ينفراقۇرىلىمىن دامىتۋعا باعىتتالعان.
باسقا كلۋبتارعا كىمدەر يەلىك ەتەدى؟
وسىلايشا, «شاحتيور» سوڭعى جىلدارى جەكە يەلىككە وتكەن كلۋبتاردىڭ قاتارىنا قوسىلىپ وتىر. بۇعان دەيىن «قايساردىڭ» ينۆەستورى – «TAU Group Ltd» وكىلى يسلامعالي قوزباقوۆ, «قىزىلجاردىڭ» جاڭا يەسى – كاسىپكەر سەرگەي كان, «جەڭىس» كلۋبىنىڭ ينۆەستورى – كاسىپكەر ميحايل لومتادزە, ال, «اقتوبە» فۋتبول كلۋبىنىڭ جاڭا ينۆەستورى – نۇرلان ارتىقباەۆ بولعانى ءمالىم بولدى.
باسەكەلەستىكتى قورعاۋ جانە دامىتۋ اگەنتتىگىنىڭ حابارلاۋىنشا, «استانا», «اتىراۋ», «ورداباسى», «تۇران», «كاسپي» فۋتبول كلۋبتارى دا جەكەشەلەندىرۋگە ۇسىنىلعان ۇيىمداردىڭ تىزىمىندە تۇر.
