فوتو: اقوردا
ەنەرگەتيكا, ونەركاسىپ كووپەراتسياسى, اۋىل شارۋاشىلىعى, IT, ءبىلىم بەرۋ جانە مەديتسينا سالالارىنداعى بىرلەسكەن جوبالاردى ىسكە اسىرۋعا باسا نازار اۋدارىلدى.
«قازاق پەن تۇرىكمەن – ەجەلدەن دوستىعى جاراسقان تۋىس حالىقتار. ءبىزدىڭ تاريحىمىز جانە ماقسات-مۇراتىمىز – ورتاق, مادەني-رۋحاني قۇندىلىقتارىمىز – ءبىر. ءبىز تۇرىكمەنستانمەن ىنتىماقتاستىقتى تاتۋ كورشىلىك جانە ءوزارا قولداۋ رۋحىندا بارىنشا نىعايتۋعا ايرىقشا ءمان بەرەمىز. جارقىن بولاشاققا بىرگە قادام باسۋ ءۇشىن كۇش جۇمىلدىرامىز. باۋىرلاس حالىقتارىمىزدىڭ يگىلىگى ءۇشىن ستراتەگيالىق سەرىكتەستىكتى نىعايتا تۇسەمىز. مەن بۇعان كامىل سەنەمىن», دەدى مەملەكەت باسشىسى.قازاقستان پرەزيدەنتى ەكى ەل اراسىندا بارلىق دەڭگەيدە بەلسەندى ءارى تابىستى بايلانىس ورناعانىن اتاپ ءوتتى. ۇكىمەتتەرىمىز جۇيەلى جۇمىس جۇرگىزىپ, ۆەدومستۆوارالىق بايلانىس نىعايىپ كەلەدى. ەلدەرىمىز كوپجاقتى قۇرىلىمدار اياسىندا ناتيجەلى قارىم-قاتىناس جاسايدى.
مەملەكەت باسشىسىنىڭ ايتۋىنشا, استانا مەن اشحابادتىڭ وڭىرلىك, حالىقارالىق كۇن تارتىبىندەگى كوپتەگەن ماسەلە بويىنشا كوزقاراستارى مەن ۇستانىمدارى ۇقساس.
قاسىم-جومارت توقاەۆ كەلىسسوزدەر بارىسىندا ساۋدا-ەكونوميكالىق ىقپالداستىققا ايرىقشا نازار اۋداردى. سوڭعى 5 جىلدا ءوزارا ساۋدا كولەمى 4 ەسەدەن اسىپ, جارتى ميلليارد دوللارعا دەيىن ۇلعايدى.
قازاقستاندا تۇرىكمەن كاپيتالى بار 140-قا جۋىق كومپانيا تابىستى جۇمىس ىستەيدى. وسى ارقىلى اتالعان كاسىپورىندار ەكونوميكالىق بايلانىستى نىعايتۋعا زور ۇلەس قوسىپ كەلەدى. قازاقستاننىڭ تۇرىكمەنستانعا قۇيعان ينۆەستيتسياسى 120 ميلليون دوللاردان استى.
مەملەكەت باسشىسى مادەني-گۋمانيتارلىق بايلانىستىڭ دامۋ قارقىنىنا توقتالدى. پرەزيدەنت ەكى ەلدىڭ مادەنيەت كۇندەرىن الما-كەزەك وتكىزۋ, كورنەكتى قايراتكەرلەردىڭ ەسكەرتكىشتەرىن اشۋ شارالارى قوس حالىقتىڭ مادەني-رۋحاني مۇراسىنا ايتارلىقتاي ۇلەس قوسادى دەپ سانايدى.
سەردار بەردىمۇحامەدوۆ قازاقستان مەن تۇرىكمەنستاندى ورتالىق ازياداعى ستراتەگيالىق سەرىكتەس مەملەكەتتەر دەپ اتادى.
«مەملەكەتتەرىمىزدى ۇرپاقتان ۇرپاققا امانات بولىپ, كوزىمىزدىڭ قاراشىعىنداي ساقتاپ كەلە جاتقان ورتاق تاريحي تامىرلاستىق, مادەني-رۋحاني ۇقساستىق, سالت-ءداستۇرىمىزدىڭ جاقىندىعى سەكىلدى قۇندىلىقتار بىرىكتىرەدى. ساياسي-ديپلوماتيالىق سالادا تۇرىكمەنستان مەن قازاقستان جاھاندىق كۇن تارتىبىندەگى وزەكتى ماسەلەلەر بويىنشا سىندارلى ىقپالداستىق ورناتقان. اتاپ ايتقاندا, بەيبىتشىلىك پەن قاۋىپسىزدىكتى ساقتاۋ, ەنەرگەتيكالىق تۇراقتىلىقتى نىعايتۋ, كولىك بايلانىسىن ىلگەرىلەتۋ, ورنىقتى دامۋ ماقساتتارىنا قول جەتكىزۋ جانە كليمات وزگەرىسىنە قارسى كۇرەس ماسەلەلەرى بويىنشا ۇستانىمدارىمىز ورتاق», دەدى تۇرىكمەنستان پرەزيدەنتى.
